තරග පාවාදීමේ චෝදනා එල්ලවී ඇති ශ්රී ලංකා ජාතික ක්රිකට් කණ්ඩායමේ හිටපු ක්රීඩක සචිත්ර සේනානායකට එළඹෙන සැප්තැම්බර් මස 25 වන දින අධිකරණයේ පෙනී සිටින ලෙස හම්බන්තොට මහාධිකරණය විසින් දැඩිව නියම කර තිබේ. ක්රීඩා වැරදි වැළැක්වීමේ පනත යටතේ මෙරට ක්රීඩකයෙකුට එරෙහිව අධිකරණයේ නඩු පැවරූ ප්රථම අවස්ථාව ලෙස මෙම සිදුවීම ඉතිහාසගත වේ.
නීතිපතිවරයා විසින් ගොනු කර තිබූ අධිචෝදනා පත්ර භාරදීම සඳහා අදාළ නඩුව ඔක්තෝබර් 09 වන දින කැඳවූ අවස්ථාවේදී විත්තිකාර සචිත්ර සේනානායක අධිකරණය හමුවේ පෙනී නොසිටියේය. ඔහු විදෙස්ගතව සිටින බව ඔහුගේ නීතිඥවරයා අධිකරණයට දැනුම් දුන් අතර, එම අවස්ථාවේදී සේනානායකගේ බිරිඳ නීතිඥවරුන් සමඟ අධිකරණයේ පෙනී සිටියාය. ඉදිරිපත් වූ කරුණු සලකා බැලූ මහාධිකරණ විනිසුරු ටිකිරි කේ. ජයතිලක මහතා, මීළඟ නඩු දිනයේදී විත්තිකරුගේ පැමිණීම අනිවාර්ය බවට නියෝග කළේය.
මෙම චෝදනාවලට පදනම් වී ඇත්තේ 2020 වසරේ පැවති ශ්රී ලංකා ප්රිමියර් ලීග් (LPL) ක්රිකට් තරගාවලිය අතරතුර සිදුවූ බව කියන සිදුවීමකි. එම තරගාවලියේ කලම්බු කින්ග්ස් කණ්ඩායම නියෝජනය කළ තරිඳු රත්නායක නැමැති ක්රීඩකයාට, තරග පාවාදීම සඳහා වෙනත් පාර්ශවයකින් ලැබුණු යෝජනාවක් පිළිබඳව ජාත්යන්තර ක්රිකට් කවුන්සලයේ දූෂණ විරෝධී ඒකකයට වාර්තා නොකරන ලෙස සචිත්ර සේනානායක විසින් ඔහුව පොළඹවා, ඒ සඳහා උපදෙස් ලබාදුන් බවට නීතිපතිවරයා චෝදනා නගා ඇත.
තවද, මෙම සිදුවීමට සම්බන්ධ "සායිඩි" නමැති මෙතෙක් අත්අඩංගුවට ගෙන නොමැති පුද්ගලයෙකු විසින් තරිඳු රත්නායක අමතා, "already spoke to the management. You will get games, and you have to give something for them too ok" යනුවෙන් කළ දැනුම්දීමක් පිළිබඳව බලධාරීන්ට පැමිණිලි කිරීම වැළැක්වීමට සචිත්ර සේනානායක කටයුතු කළ බවද අධිචෝදනා පත්රයේ වැඩිදුරටත් සඳහන් වේ.
Comments
Post a Comment
Your comment will be visible after approval