කොළඹ ෂැන්ග්රිලා හෝටලයේ ඊයේ (29) පැවති උත්කර්ෂවත් අවසන් මහා තරගයේදී ලිහාෂා ලින්සේ වයිට්, 2025 වසර සඳහා වන විශ්ව රූ රැජිණ ශ්රී ලංකා (Miss Universe Sri Lanka) කිරුළ දිනා ගැනීමට සමත් වූවාය.
කොළඹ CIS ජාත්යන්තර පාසලින් මෑතකදී අධ්යාපනය හමාර කළ සිසුවියක වන ලිහාෂා මෙවැනි තරගයක් නියෝජනය කළ පළමු අවස්ථාව මෙය විය.
මෙම ජයග්රහණයත් සමග, 2025 වසරේ නොවැම්බර් මස තායිලන්තයේදී පැවැත්වීමට නියමිත 74 වන විශ්ව රූ රැජිණ තරගාවලියේදී ශ්රී ලංකාව නියෝජනය කිරීමේ අවස්ථාව ලිහාෂාට හිමිවනු ඇත.
තරගයේ අවසන් වට කිහිපය තුළ සුවිශේෂී දක්ෂතා දැක්වූ ලිහාෂා, විනිසුරු මඩුල්ලේ ප්රශ්නවලට ලබාදුන් සාර්ථක පිළිතුරු හරහා අවසන් ජයග්රාහිකාව ලෙස අභිෂේක ලැබුවාය. තරගාවලිය පුරා පැවති විවිධ අදියරයන් සාර්ථකව පසුකරමින් ඇය මෙම කිරුළට හිමිකම් කීවාය.
ජයග්රහණයෙන් පසු ලිහාෂා ලින්සේ වයිට් මාධ්ය වෙත ප්රකාශ කරමින්, "මෙම විශිෂ්ට අවස්ථාව ලබා දීම ගැන මම ඉතා කෘතඥ වනවා. ලෝක වේදිකාවේ ශ්රී ලංකාව නියෝජනය කිරීම මගේ ජීවිතයේ මහත් ගෞරවයක්. ජාත්යන්තර තරගාවලියේදී මගේ රට, මගේ සංස්කෘතිය සහ මා විශ්වාස කරන වටිනාකම් නියෝජනය කිරීමට මම සූදානම්," යැයි පැවසුවාය.
Amante සන්නාමය මෙම තරගාවලියේ ප්රධාන අනුග්රාහකයා ලෙස කටයුතු කළ අතර Glow සම අනුග්රාහකත්වය ලබා දෙන ලදී. ලිහාෂා ලින්සේ වයිට් ගේ ජයග්රහණයත් සමග ඉදිරි විශ්ව රූ රැජිණ තරගයේදී ශ්රී ලංකාව පිළිබඳව නව බලාපොරොත්තු තබාගත හැකිවනු ඇත.
Comments
Post a Comment
Your comment will be visible after approval