
සම්බාහන මධ්යස්ථානයක තෙරපිවරියකට පහරදී, ඇයව පැහැරගෙන ගොස් මුදල් කොල්ලකෑම් ඇතුළු චෝදනා රැසක් මත පානදුර කොට්ඨාස අපරාධ විමර්ශන කාර්යාංශයට අනුයුක්ත පොලිස් කොස්තාපල්වරයෙකු වාද්දූව පොලීසිය විසින් අත්අඩංගුවට ගෙන තිබේ.
මෙම සිදුවීම වාර්තා වී ඇත්තේ වාද්දුව, තල්පිටිය ප්රදේශයේ පිහිටි සම්බාහන මධ්යස්ථානයකිනි.
සැකකාර පොලිස් නිලධාරියා එම ස්ථානයට ගොස් තෙරපිවරියගෙන් ලිංගික අල්ලස් ඉල්ලා ඇති අතර, ඇය එය ප්රතික්ෂේප කිරීමත් සමඟ මෙම ගැටුම හටගෙන ඇත. එහිදී සැකකරු විසින් තෙරපිවරියට පහර දී තිබේ.
පසුගිය 25 වන දා රාත්රී 11.55ට පමණ 119 පොලිස් හදිසි ඇමතුම් අංශයට ලද තොරතුරක් මත නිලධාරීන් එම ස්ථානයට පැමිණ විමර්ශන ආරම්භ කර ඇත. පොලිස් නිලධාරීන් පැමිණෙන විට සැකකරු විසින් තෙරපිවරියව එම ස්ථානයෙන් පැහැරගෙන ගොස් තිබූ බව අනාවරණය විය.
පසුව වාද්දුව නගර මධ්යයේ රාජ්ය බැංකුවක් අසලදී සැකකරු විසින් නැවතත් එම කාන්තාවට පහර දෙන අවස්ථාවේදී, අවට සිටි පිරිසක් මැදිහත් වී ඇයව බේරාගෙන තිබේ.
එහිදී තුවාල ලබා සිටි කාන්තාව 1990 සුවසැරිය ගිලන් රථ සේවාව මගින් පානදුර මූලික රෝහල වෙත යොමු කිරීමට පොලීසිය කටයුතු කළේය.
තමන්ට පහර දී සම්බාහන මධ්යස්ථානයේ ලාච්චුවේ තිබූ රුපියල් 20,000ක මුදලක් කොල්ලකා, තවත් මුදල් ලබා ගැනීම සඳහා තමන්ව ඒ.ටී.එම්. යන්ත්රයක් අසලට බලහත්කාරයෙන් රැගෙන ආ බවට තෙරපිවරිය පොලීසියට ප්රකාශයක් ලබා දී ඇත. එම ප්රකාශය මත ක්රියාත්මක වූ පොලීසිය සැකකාර කොස්තාපල්වරයා අත්අඩංගුවට ගත් අතර, වාද්දුව පොලිස් ස්ථානාධිපතිවරයාගේ උපදෙස් මත වැඩිදුර විමර්ශන සිදු කරයි.
Comments
Post a Comment
Your comment will be visible after approval