මාර්ග නීති උල්ලංඝනය කරමින් පොලිස් අණ නොතකා, බීමත්ව රිය ධාවනය කළ මෝටර් රථ රියැදුරකු පිටුපස හඹා ගොස් අල්ලාගත් රියැදුරා අත්අඩංගුවට ගැනීමට සූදානම් වූ අවස්ථාවේදී, කාන්තාවන් පිරිසක් සමඟ මෝටර් රථයකින් එම ස්ථානයට පැමිණ, තමන් යුද හමුදා ලුතිනන්වරයකු බව පවසමින් රථවාහන නිලධාරීන්ගේ රාජකාරියට බාධා කර, අඩන්තේට්ටම් කළ පුද්ගලයකු සහ මෝටර් රථ රියැදුරා අත්අඩංගුවට ගත්බව අනුරාධපුර මූලස්ථාන පොලීසිය පවසයි.
මෙලෙස අත්අඩංගුවට පත්ව ඇත්තේ මාර්ග නීති උල්ලංඝනය කරමින්,
පොලිස් අණ නොතකා බීමත්ව මෝටර් රථයක් පදවාගෙන ගිය, අනුරාධපුර අභය මාවතේ පදිංචි පුද්ගලයකු සහ මට්ටක්කුලිය යුද හමුදා කඳවුරක සේවයේ නියුතු අනුරාධපුර පදිංචි යුද හමුදා ලුතිනන්වරයකු බව පොලීසිය පවසයි.
ඉකුත් 16 වැනිදා රාත්රී අනුරාධපුර, දහයියාගම හන්දිය ආසන්නයේදී මාර්ග නීති උල්ලංඝනය කරමින් ගමන් කළ කාර් රථයක් නැවැත්වීමට සංඥා කළ අවස්ථාවේදී එම රථය නොනවත්වා ධාවනය කළ බවත්, ඉන් අනතුරුව මෝටර් රථය පසුපස හඹා ගොස් අනුරාධපුර, ජයන්ති වටරවුම අසලදී නවතා පරීක්ෂා කිරීමේදී රියැදුරා බීමත්ව සිටි බවටත් අනාවරණය වූ බව පොලීසිය පවසයි.
එම අවස්ථාවේදී කාර් රථයේ රියැදුරු අත්අඩංගුවට ගෙන, මාංචු දැමීමට සූදානම් වන අවස්ථාවේදී කාන්තාවන් කිහිප දෙනෙකු සමඟ තවත් කාර් රථයකින් එම ස්ථානයට පැමිණි පුද්ගලයකු , තමන් යුද හමුදාවේ ලුතිනන්වරයකු බව පවසමින් ඉහත සැකකරු අත්අඩංගුවට ගැනීම වළක්වාලමින් කලහකාරී ලෙස හැසිරී රථ වාහන නිලධාරීන්ට අඩන්තේට්ටම් කර ඇති බව පොලීසිය සඳහන් කළේය.
සිද්ධියට සම්බන්ධ සැකකරුවන් දෙදෙනා අත්අඩංගුවට ගෙන ඇත. ඔවුන් අනුරාධපුර මහේස්ත්රාත් අධිකරණයට ඉදිරිපත් කිරීමට නියමිතව ඇත.
Comments
Post a Comment
Your comment will be visible after approval