ලොරියකට යටවුණු 60 හැවිරිදි පුද්ගලයකු කැලයකට විසිකර දමා පලා ගොස් සිටි ලොරි රථයේ රියැදුරු දීර්ඝ විමර්ශනයකින් පසු ඊයේ (17) අත්අඩංගුවට ගත් බව මිනුවන්ගොඩ පොලීසිය පවසයි.
ඉකුත් 9වැනිදා සවස 4.00ත් 5.00ත් කාලය අතර මිනුවන්ගොඩ, නිල්පනාගොඩ පාසල අසලදී මේ අනතුර සිදුවී ඇතැයි පොලීසිය කියයි. මිනුවන්ගොඩ පොලීසියේ රථවාහන අංශය පැවසුවේ මාර්ගය අයිනේ ගමන් කරමින් සිටි මේ පුද්ගලයා ලොරියේ ගැටීමෙන් පසු ලොරි රියැදුරා තුවාල ලැබූ පුද්ගලයා ඒ අසල කැලයට විසිකර දමා කටුවැල්ලේගම දෙසට පලා ගොස් ඇති බවයි.
නමුත් මේ අනතුර සහ තුවාලකරු කැලයට විසිකර දමා ලොරි රියැදුරා පලා යන බව ඒ අවට සිටි කාන්තාවන් පිරිසක් දැක කෑ ගසා අවට ජනතාව දැනුම්වත් කිරීමෙන් පසු ප්රදේශවාසීන් පිරිසක් ලොරිය පසුපස ලුහුබැඳ ගොස් අල්ලාගෙන අනතුර සිදු වූ ස්ථානයට රැගෙන විත් ඇතැයි වාර්තා වෙයි.
අනතුරුව ප්රදේශවාසීන්ගේ බල කිරීම මත ලොරියේ රියදුරා විසින් තුවාල ලැබූ පුද්ගලයා ලොරි රථයේම දමාගෙන මිනුවන්ගොඩ රෝහලට රැගෙන විත් භාරදී ඇති අතර රියදුරා රෝහලට පවසා ඇත්තේ තුවාල ලැබූ පුද්ගලයා පාරේ වැටී සිටියදී රෝහලට රැගෙන ආ බවයි.
අනතුරුව ලොරියේ රියැදුරා රෝහලෙන් ද මඟහැර ගොස් ඇති අතර මේ පිළිබඳව මිනුවන්ගොඩ පොලීසියේ රථවාහන අංශයේ ස්ථානාධිපති උප පොලිස් පරීක්ෂක නිමල් චන්ද්රසිරි මහතාට ලද පැමිණිල්ලට අනුව වහා ක්රියාත්මක වූ ඒ මහතා ලොරියේ රියැදුරා රෝහලට දුන් තොරතුරු සහ වාහනයේ අංකය, සීසීටීවී දර්ශන ඇතුළු තොරතුරු රැසක් ඔස්සේ විමර්ශන ආරම්භ කර අනතුර සිදුකර පලා ගොස් සිටි ලොරි රියැදුරා සහ ලොරිය අත්අඩංගුවට ගෙන ඇත.
අත්අඩංගුවට ගත් රියැදුරා දූනගහ ප්රදේශයේ පදිංචි 45 හැවිරිදි අයෙකු බවත් ඔහුට රිය පැදවීම සඳහා රියැදුරු බලපත්රයක්ද නොමැති අයෙකු බව කරන ලද විමර්ශනවලදී අනාවරණය වූ බව
රථවාහන අංශයේ ස්ථානාධිපති නිමල් චන්ද්රසිරි මහතා පැවසීය.
අනතුරින් තුවාල ලැබූ පුද්ගලයා මේ වන විට කොළඹ ජාතික රෝහලේ දැඩි සත්කාර ඒකකයේ ප්රතිකාර ලබන බව පොලීසිය පවසයි.
මිනුවන්ගොඩ පොලීසියේ ස්ථානාධිපති ප්රධාන පොලිස් පරීක්ෂක සුදේෂ් ප්රියදර්ශන මහතාගේ උපදෙස් පරිදි රථවාහන අංශයේ ස්ථානාධිපති උප පොලිස් පරීක්ෂක නිමල් චන්ද්රසිරි මහතා ඇතුළු නිලධාරීන් කණ්ඩායමක් මේ පිළිබඳව විමර්ශන සිදුකර ලොරි රථය සහ එහි රියැදුරා අත්අඩංගුවට ගෙන වැඩිදුර පරීක්ෂණ ආරම්භ කර ඇත.