නීතිපති දෙපාර්තමේන්තුවේ කාර්ය මණ්ඩලය පිළිබඳව සමාජ මාධ්යවල පළ වන අසත්ය චෝදනා සම්බන්ධයෙන් නීතිපති පාරින්ද රණසිංහ මහතා විසින් කරන ලද පැමිණිල්ලකට අනුව අපරාධ පරීක්ෂණ දෙපාර්තමේන්තුව (CID) විමර්ශනයක් ආරම්භ කර ඇත.
නීතිපති දෙපාර්තමේන්තුවේ කාර්ය මණ්ඩල සාමාජිකයන් කිහිප දෙනෙකු තමන්ට එරෙහිව සමාජ මාධ්යවල අසත්ය චෝදනා එල්ල වන බවට නීතිපති පාරින්ද රණසිංහ මහතා වෙත පැමිණිලි කිරීමෙන් අනතුරුව, නීතිපතිවරයා විසින් අපරාධ පරීක්ෂණ දෙපාර්තමේන්තුවට මෙම විමර්ශනය සිදු කිරීම සඳහා උපදෙස් ලබා දී ඇත.
ආරංචි මාර්ග වලින් වාර්තා වන අන්දමට, විශේෂයෙන් උසස්වීම් බලාපොරොත්තුවෙන් සිටින නීතිපති දෙපාර්තමේන්තුවේ ජ්යෙෂ්ඨ නිලධාරීන් ඉලක්ක කරමින් මෙම අසත්ය චෝදනා සමාජ මාධ්යවල ප්රචාරය වන බව සඳහන් වේ.
තමිල් මක්කල් විඩුතල් පුලිගල් (TMVP) නායක සිවනේ සතුරෙයි චන්ද්රකාන්තන් හෙවත් පිල්ලෙයාන් අත්අඩංගුවට ගැනීම සම්බන්ධයෙන් ඉදිරිපත් කළ මූලික අයිතිවාසිකම් පෙත්සම විභාගයට ගත් අවස්ථාවේදී, ඔහුට ඇප ලබා දීමට සහාය දුන් බවට සමාජ මාධ්ය සටහන් මගින් නීතිපති දෙපාර්තමේන්තුවේ ජ්යෙෂ්ඨ නිලධාරියකුට චෝදනා එල්ල කර ඇත. කෙසේ වෙතත්, ආරංචි මාර්ග අනුව, එම මූලික අයිතිවාසිකම් නඩුව විභාග කිරීමේදී ඇප ලබාදීමේ කාරණය සම්බන්ධයෙන් කිසිදු සලකා බැලීමක් සිදු කර නොමැත.
තවත් සමාජ මාධ්ය චෝදනාවක් අනුව, වැඩ තහනමට ලක් වූ පොලිස් ප්රධානී දේශබන්දු තෙන්නකෝන් සම්බන්ධ නඩුවකදී, නීතිපතිවරයා විසින් දෙපාර්තමේන්තුව නියෝජනය කිරීම සඳහා ජ්යෙෂ්ඨ නිලධාරියකු නොයවා ඒ සඳහා කනිෂ්ඨ නිලධාරියකු යවා ඇති බව චෝදනා කෙරේ. නමුත් ආරංචි මාර්ග අනුව, එම අවස්ථාවේදී ජ්යෙෂ්ඨ නිලධාරියකු එම කාර්යය සඳහා යොමු කිරීමට නොසිටි බැවින්,
කනිෂ්ඨ නිලධාරියකු පත් කිරීමට සිදු වූ බව පැහැදිලි කෙරේ.
වර්තමානයේ නීතිපති දෙපාර්තමේන්තුව විසින් මහාධිකරණයේ 600කට වැඩි අධි චෝදනා ප්රමාණයක් ගොනු කර ඇති අවස්ථාවක මෙවැනි අසත්ය චෝදනා සමාජ මාධ්ය හරහා නීතිපති දෙපාර්තමේන්තුවට එල්ල වන බව ආරංචි මාර්ග තවදුරටත් සඳහන් කරයි.
නීතිපති දෙපාර්තමේන්තුව විසින් මෙම සමාජ මාධ්ය චෝදනා සම්බන්ධයෙන් සිදු කරන විමර්ශනයේ වැඩිදුර ප්රගතිය පිළිබඳව තොරතුරු ඉදිරියේදී නිකුත් කිරීමට අපේක්ෂා කෙරේ.
Comments
Post a Comment
Your comment will be visible after approval