අයහපත් කාලගුණ තත්ත්වය හේතුවෙන් යාල ජාතික වනෝද්යානය අද (01) දින සිට තාවකාලිකව වසා දැමීමට බලධාරීන් තීරණය කර ඇත. පවතින වැසි තත්ත්වය පහව යන තුරු වනෝද්යානය වසා තැබීමට තීරණය කර ඇති බව යාල වනෝද්යාන පාලක මනෝජ් විද්යාරත්න මහතා නිවේදනය කර සිටී.
පසුගිය දින දෙක තුළ ඇදහැළුණු ධාරානිපාත වර්ෂාව හේතුවෙන් යාල වනෝද්යානයේ මාර්ග බොහොමයක් ජලයෙන් යටවී ඇති අතර, වනෝද්යානය තුළ ඇති වැව් ඉවුරු කිහිපයක් ද කඩාගෙන ගොස් ඇති බව වාර්තා වේ. මෙම තත්ත්වය යටතේ වනසතුන්ගේ ආරක්ෂාව මෙන්ම සංචාරකයින්ගේ ආරක්ෂාව සඳහාම වනෝද්යානය තාවකාලිකව වසා දැමීමට තීරණය කර ඇත.
ඒ අනුව යාල කලාප අංක 1ට අදාළ කටගමුව හා පලටුපාන පිවිසුම් දොරටු දැනටමත් වසාදමා ඇත. යාල වනෝද්යානයේ පිවිසුම් මාර්ගයේ නිමලව ප්රදේශයේ මාර්ග කිහිපයක් මේ වනවිට ගංවතුරෙන් යටවී ඇති බව ද වාර්තා වේ.
කෙසේ වෙතත්, යාල සෆාරි ජීප් රථ එකමුතුවේ සභාපති තරිඳු ජයසිංහ මහතා සඳහන් කර සිටින්නේ, කිසිදු පූර්ව දැනුම්දීමකින් තොරව ගත් මෙම තීරණය හේතුවෙන් දැනටමත් මුදල් ගෙවා සිටි සංචාරකයින් දැඩි අපහසුතාවට ලක්ව ඇති බවයි.
බලධාරීන් විසින් වැසි තත්ත්වය පහව යන තුරු පමණක් වනෝද්යානය වසා තැබීමට තීරණය කර ඇති අතර, තත්ත්වය යථා තත්ත්වයට පත්වූ පසු වනෝද්යානය නැවත විවෘත කිරීමට අපේක්ෂා කරයි.
Comments
Post a Comment
Your comment will be visible after approval