බදුලු දුම්රියේ යද්දී සෙල්ෆි ගහන්න ගිය රුසියානු කත මරුට

බදුල්ල - කොළඹ කොටුව පොඩිමැණිකේ දුම්රියේ ගමන් කරමින් සිටි රුසියානු ජාතික සංචාරිකාවක් දුම්රියේ පාපුවරුවේ එල්ලී සෙල්ෆි ඡායාරූපයක් ගැනීමට යාමේදී සිදුවූ අනතුරකින් බරපතල තුවාල ලැබීමෙන් අනතුරුව මියගොස් ඇති බව හාලිඇළ පොලිසිය වාර්තා කරයි.
පර්මිනෝවා ඔල්ගා (Perminova Olga) නම් වූ මෙම විදේශික සංචාරිකාව වයස අවුරුදු 53ක් වූ රුසියානු ජාතිකයෙකි. ශ්‍රී ලංකාවේ සංචාරයක නිරත වීම සඳහා තවත් විදේශීය සංචාරකයින් පිරිසක් සමඟ මෙරටට පැමිණි ඇය, පෙබරවාරි 19 වන දින උදෑසන බදුල්ල දුම්රිය ස්ථානයෙන් කොළඹ කොටුව බලා ධාවනය වන පොඩිමැණිකේ දුම්රියට ගොඩවී ඇල්ල දෙසට ගමන් කරමින් සිටියදී

මෙම අවාසනාවන්ත සිදුවීමට මුහුණ දී තිබේ.
පොලිස් වාර්තා අනුව, දුම්රියේ පාපුවරුවේ එල්ලී සෙල්ෆි ඡායාරූප ගැනීමට උත්සාහ කළ අවස්ථාවේදී දුම්රිය මාර්ගය අසල පිහිටි වේල්ලක ගල් පර්වතයක ගැටී දුම්රියෙන් ඇද වැටුණු ඇය, දුම්රිය මගීන් විසින් හාලිඇළ දුම්රිය ස්ථානය වෙත රැගෙන ගොස් ඇත.
බදුල්ල ශික්ෂණ රෝහලේ හදිසි ප්‍රතිකාර ඒකකයේ ජ්‍යෙෂ්ඨ වෛද්‍ය නිලධාරී වෛද්‍ය පාලිත රාජපක්ෂ මහතාගේ ප්‍රකාශයට අනුව, හිසට සිදුවූ බරපතල තුවාල හේතුවෙන් හදිසි ප්‍රතිකාර ඒකකයට ඇතුළත් කර ප්‍රතිකාර ලබමින් සිටියදී මෙම රුසියානු ජාතික කාන්තාව මියගොස් ඇත.

මෙම සිද්ධිය සම්බන්ධයෙන් බදුල්ල ජ්‍යෙෂ්ඨ පොලිස් අධිකාරී වසන්ත කන්දේවත්ත මහතා සහ ජ්‍යෙෂ්ඨ පොලිස් අධිකාරී පී.එම්. ජයරත්න මහතා විසින් ලබාදුන් උපදෙස් මත හාලිඇළ පොලිස් ස්ථානාධිපති, පොලිස් පරීක්ෂක රුවන් ගුණතිලක මහතා ප්‍රමුඛ නිලධාරීන් විසින් වැඩිදුර පරීක්ෂණ සිදු කරමින් පවතී.
මෙම අවාසනාවන්ත සිදුවීම, දුම්රිය ගමන් කිරීමේදී ආරක්ෂාව පිළිබඳව සැලකිලිමත් විය යුතු ආකාරය පිළිබඳව නැවත වරක් අවධාරණය කරන අතර, විශේෂයෙන් සංචාරකයින් දුම්රිය ගමන්වලදී අනවශ්‍ය අවදානම් ගැනීමෙන් වැළකී සිටීමේ වැදගත්කම පෙන්වා දෙයි.