හන්තාන කන්දේ අතරමං වූ පාසල් සිසුන් දස දෙනෙක් ආරක්ෂිතව මුදවා ගැනේ

පාසල් නිවාඩු සමයේ විනෝද චාරිකාවක් සඳහා හන්තාන කන්ද නැරඹීමට ගිය කොළඹ ඩී.එස්. සේනානායක සහ කැලණිය ගුරුකුල විද්‍යාලවල  පාසල් සිසුන් දස දෙනෙකු අතරමං වීමෙන් පසු ඔවුන් ආරක්ෂිතව මුදවා ගැනීමට ශ්‍රී ලංකා යුද හමුදාව සහ පොලිසිය සමත් විය.

වයස අවුරුදු 16-17 අතර පසුවන මෙම සිසුන් පිරිස දෙසැම්බර් 4 වන දින පේරාදෙණිය සරසවිගම ප්‍රදේශයේ සිට හන්තාන කන්ද තරණය කිරීම ආරම්භ කර තිබේ. කෙසේ වෙතත්, සවස 6.00 පමණ වන විට පැවති අධික මීදුම සහ ශීතල තත්ත්වය හේතුවෙන් සමහර සිසුන්ට මාංශ පේශි කැක්කුම් ඇති වී ඇති අතර, ගමන් මාර්ගය සොයා ගැනීමටද නොහැකි වී තිබේ.

තත්ත්වයේ බැරෑරුම්කම තේරුම් ගත් සිසුන් පොලිස් හදිසි ඇමතුම් ඒකකය අමතා උදව් ඉල්ලා සිටි අතර, ඒ අනුව 111 බලසේනා මූලස්ථානය හා 2 ශ්‍රී ලංකා සිංහ රෙජිමේන්තුවේ භට පිරිස් එක්ව මුදවා ගැනීමේ මෙහෙයුම ආරම්භ කර තිබේ.

දෙසැම්බර් 5 වන දින අලුයම වන විට සියලු සිසුන් ආරක්ෂිතව පහළට රැගෙන ඒමට හැකි වී තිබේ.

මෙම සිද්ධිය සම්බන්ධයෙන් අදහස් දැක්වූ පොලිස් නිලධාරියෙක්, දෙසැම්බර් මාසයේදී පවතින ඝන මීදුම සහ තද සුළං තත්ත්වය හේතුවෙන් හන්තාන කන්ද තරණය කිරීමෙන් වැළකී සිටින ලෙස උපදෙස් දුන් අතර, සංචාරකයින් මෙම ප්‍රදේශය ගවේෂණය කිරීමේදී පළපුරුදු මාර්ගෝපදේශකයෙකුගේ සහාය ලබා ගැනීම වැදගත් බව අවධාරණය කළේය.