කළුතර කුරුණෑගලින් ඉදිරියේ ගම් කුකුළු මස් හා ගම් බිත්තර

ව්‍යව­සා­ය­ක­යන් 10,000ක් ගම් බිත්තර නිෂ්පා­ද­න­යට යොමු කර, එම­ඟින් අඩු ආදා­ය­ම්ලාභි පවුල් ලක්ෂ 12ක් සවි­බල ගැන්වීමේ ව්‍යාපෘ­ති­යක් සත්ත්ව නිෂ්පා­දන හා සෞඛ්‍ය දෙපා­ර්ත­මේ­න්තුව සහ සමෘද්ධි සංව­ර්ධන දෙපා­ර්ත­මේ­න­තුව එක්ව ක්‍රියා­ත්මක කර ඇත.
මෙහි සමා­ර­ම්භක අව­ස්ථාව ‘සුබ සාධ­න­යෙන් ව්‍යව­සා­ය­ක­ත්ව­යට’ තේමාව යටතේ සමාජ සවි­බල ගැන්වීමේ රාජ්‍ය ඇමැති අනුප පස්කු­වල් හා පශු සම්පත් සංව­ර්ධන රාජ්‍ය ඇමැති ඩී.බී. හේරත් මහ­ත්ව­රුන්ගේ ප්‍රධා­න­ත්ව­යෙන් සමෘද්ධි සංවර් ධන දෙපා­ර්ත­මේ­න්තු­වේදී පසු­ගි­යදා (8) ආරම්භ කෙරිණි.

අඩු ආදා­ය­ම්ලාභි පවුල් ලක්ෂ 12ක් සවි­බල ගැන්වෙන මේ වැඩ­පි­ළි­වෙ­ළෙහි මූලික අදි­යර ලෙස කළු­තර කුරු­ණෑ­ගල දිස්ත්‍රික්ක මුල් කර­ගෙන නියමු ව්‍යාපෘ­ති­යක් ආරම්භ කෙරේ. මේ පිළි­බඳ අව­බෝ­ධතා ගිවි­සු­මට කාන්තා ළමා කට­යුතු හා සමාජ සවි­බල ගැන්වීමේ අමා­ත්‍යාං­ශය වෙනු­වෙන් සමෘද්ධි සංව­ර්ධන දෙපා­ර්ත­මේ­න්තු­වද කෘෂි­කර් ම හා වැවිලි කර්මාන්ත අමා­ත්‍යාං­ශය හා පශු සම්පත් සංව­ර්ධන රාජ්‍ය අමා­ත්‍යාං­ශය වෙනු­වෙන් සත්ත්ව නිෂ්පා­දන හා සෞඛ්‍ය දෙපා­ර්ත­මේ­න්තු­වද නියෝ­ජ­නය කර­මින් නිල­ධා­රීහු අත්සන් කළහ. මේ අනුව කළු­තර හා කුරු­ණෑ­ගල යන දිස්ත්‍රි­ක්වල එක් දිස්ත්‍රි­ක්ක­ය­කට නිෂ්පා­දන ගම්මාන 50 බැගින් ගම් බිත්තර නිෂ්පා­දන ගම්මාන 100ක් ආරම්භ කෙරේ. එක් ගම්මා­න­යක ව්‍යව­සා­යක පවුල් සංඛ්‍යාව 100ක් වන අතර, එක් පවු­ල­කට පිරි­නැ­මී­මට අපේ­ක්ෂිත කුකුළු පැටව් ගණ­නද 100කි. එම­ඟින් රටේ ගම් බිත්තර නිෂ්පා­දන ව්‍යව­සා­ය­ක­යන් 10,000ක් නිර්මා­ණය කරන අතර ජාතික පෝෂණ අව­ශ්‍ය­තාව සඳහා ගම් බිත්තර ලබා­ගැ­නී­මට අවශ්‍ය පරි­ස­ර­යද සකස් කෙරේ.

අඩු ආදා­ය­ම්ලාභී පවු­ල්වල ආදා­යම ඉහළ නැංවී­මද මෙම­ඟින් අපේ­ක්ෂා­වයි, අති­රේක ඵල­යක් ලෙස වෙළෙ­ඳ­පො­ළට ගම් කුකුළු මස් සැප­යී­මද මෙම­ඟින් සිදු කෙරේ.

ව්‍යව­සා­ය­ක­යන්ට අවශ්‍ය අර­මු­දල් උදෙසා සහන පොලී ණය දීම සමෘද්ධි බැංකු හරහා සිදු කෙරේ. අවශ්‍ය තාක්ෂ­ණික සහය හා ගොවි­පොළ පාල­නය පිළි­බඳ සහාය සහ මූලික අදි­යරේ ගම් බිත්තර හෝ ගම් කුකුළු පැට­වුන් දීම සත්ත්ව නිෂ්පා­දන හා සෞඛ්‍ය දෙපා­ර්ත­මේ­න්තුව විසින් සිදු කරනු ඇත.

ව්‍යාපෘ­තිය 2024 මැයි සිට 2027 අප්‍රේල් තෙක් වසර තුනක් සඳහා බල පැවැත්වේ. පසු­ගිය කොරෝනා සමයේ සත්ත්ව පාලන ක්ෂේත්‍රයේ ඇති වූ පසු­බෑම මත වෙළෙ­ඳ­ප­ළට අවශ්‍ය බිත්තර ප්‍රමා­ණය නොලැ­බීම නිසා බිත්තර ආන­ය­නය කිරී­මට සිදු වූ අතර, එම තත්ත්වය මේ වන විට ක්‍රමි­කව පාල­නය කර­ගෙන ඇති බවත්, එදා පැවැති ගමේ පෝෂණ රටාව යළි අත්පත් කර­දී­ම­ටත්, ගම තුළ ව්‍යව­සා­ය­ක­යන් නිර් මාණය කිරී­ම­ටත් මේ ව්‍යාපෘ­තිය ඉතා වැද­ගත් කාර්ය­භා­ර­යක් ඉ‍ටු කරනු ඇතැයි තමා විශ්වාස කරන බව පශු සම්පත් සංව­ර්ධන රාජ්‍ය අමාත්‍ය ඩී.බී. හේරත් මහතා මෙහිදී පැව­සීය.

මෙහි දී අද­හස් දැක්වූ සමාජ සවි­බල ගැන්වීමේ රාජ්‍ය ඇමැති අනුප පස්කු­වල් මහතා කියා සිටියේ සුබ සාධක රාජ්‍ය­යෙන් ව්‍යව­සා­යක රාජ්‍ය­යක් නිර්මා­ණය කිරීමේ අර­මුණ මේ හරහා ජය ගැනී­මට හැකි බවයි. ඒ සඳහා අවශ්‍ය මූල්‍ය ශක්තිය සමෘද්ධි සංවර් ධන බැංකුව හරහා ලබා­දී­මට හැකි බවද ඒ මහතා පෙන්වා දුන්නේය.
බුද්ධිකා ඉඹු­ලාන