කොග්ගල රාජ්‍ය බැංකුවක ගිණුම් පවත්වාගෙන යන ගිණුම් හිමියන්ගේ තොරතුරු ඇතුළත් පරිගණක දත්ත පද්ධතියට අනවසරයෙන් ඇතුළුවී ඇඟලුම් කම්හල් සේවිකාවකගේ ගිණුමෙන් රුපියල් දාහත් ලක්ෂයකට අධික මුදලක් වංචනික ලෙස ලබා ගැනීම සම්බන්ධයෙන් ගිණුම් හිමිකාරියගේ සහෝදරියක අත්අඩංගුවට ගත් බව ගාල්ල පොලිසිය පවසයි.
මාපලගම පදිංචි අවිවාහක තරුණියක් කොග්ගල නිදහස් වෙ‍ෙළඳ කලාපයේ ඇඟලුම් කම්හලක සේවය කරමින් සිටියදී වැටුපෙන් එකතු කරගත් රුපියල් ලක්ෂ 13 කින් කොග්ගල රාජ්‍ය බැංකු ශාඛාවක ගිණුමක් ආරම්භ කර පවත්වාගෙන යමින් සිටියදී ඇඟලුම් කම්හල වසා දැමීම නිසා ඇයට රුපියල් ලක්ෂ 16ක වන්දියක් ද ලැබී ඇත.
එම මුදල ද සමඟ ගිණුමේ තිබූ රුපියල් ලක්ෂ තිහකට ආසන්න මුදලින් ඇය 2022 වසරේ ජූලි මාස‍යේ ලක්ෂ 15ක ස්ථාවර ගිණුමක් ආරම්භ කර ඇත. පසුගිය වසරේ ජූලි මස ස්ථාවර ගිණුමට කල් පිරීමෙන් පසු ඇය ලක්ෂ දහයක් ලබාගෙන ඉතිරි ලක්ෂ 20කට ආසන්න මුදල ගිණුමේ තිබියදී එම මුදලින් යළිත් ලක්ෂ 15ක ස්ථාවර ගිණුමක් ආරම්භ කිරීමට බැංකුවට ගොස් ඉල්ලුම්පත්‍ර පුරවා දුන් පසු බැංකුව පවසා ඇත්තේ ගිණුමේ ඇත්තේ රුපියල් විසි එක් දහසක් පමණක් බවය.
එවිට ඇය කළමනාකරු හමුවී මේ ගැන පැවැසූවිට කළමනාකරු පරික්ෂා කර බලා පවසා ඇත්තේ ගිණුමේ තිබූ රුපියල් ලක්ෂ 17කට අධික මුදල හැක් කර ඇති බවය. පසුව ඇය මේ පිළිබඳ ගාල්ල පොලිසියේ විශේෂ අපරාධ විමර්ශන අංශයට පැමිණිලි කර ඇත.
ගාල්ල ජ්‍යෙෂ්ඨ පොලිස් අධිකාරි සතිස් ගමගේ, මූලස්ථාන පොලිස් පරීක්ෂක එස්.එස්. ජයවීර යන මහත්වරුන්ගේ උපදෙස් පරිදි විශේෂ අපරාධ විමර්ශන අංශයේ ස්ථානාධිපති ප්‍රධාන පොලිස් පරීක්ෂක පුලස්ති සොයිසා, උප පොලිස් පරීක්ෂකවරුන් වන උදය කාන්ත, ප්‍රේමකුමාර, කාන්තා සැරයන් ජයවර්ධන (6058) යන මහත්ම මහත්මීන් විසින් සිද්ධිය සම්බන්ධයෙන් පරීක්ෂණ පවත්වා සැකකාරිය අත්අඩංගුවට ගෙන ඇත.
එස්. දීයගහගේ
0 Comments