පසුගිය 2022 වසරේ ජූලි මස 9 වැනිදා අරගලය පැවැති අවස්ථාවේ නිට්ටඹුව කොළඹ මගී බස් රථයක් ගිනි තැබූ බවට සැකපිට අල්ලා පසුව ඇප මත මුදාහැර ඇති සැකකරුවකු එම නඩුවෙන් මුදාහරින ලෙස කොටුව මහේස්ත්රාත් කෝසල සේනාධීර මහතා ඊයේ (02) නියෝග කළේය.
සැකකරුට එරෙහිව තාක්ෂණික සාක්ෂි හෝ ඇසින් දුටු සාක්ෂි කිසිවක් ඉදිරිපත් නොකිරීම මත මහේස්ත්රාත්වරයා මේ නියෝගය සිදු කළේය. සැකකරු වෙනුවෙන් පෙනී සිටි නීතිඥවරයා සැකකරු මුදාහරින ලෙස ඉල්ලා සිටි අවස්ථාවේ සැකකරු සම්බන්ධයෙන් පවතින සාක්ෂි මොනවාද යන්න මහේස්ත්රාත්වරයා මේ සිද්ධිය සම්බන්ධයෙන් විමර්ශන සිදු කළ කොළඹ අපරාධ කොට්ඨාසයෙන් විමසා සිටියේය. එහිදී ඔවුන් පවසා සිටියේ මේ සම්බන්ධයෙන් නීතිපතිවරයාගේ මතය විමසා ඇති බවය. ඒ කරුණු සලකා බැලූ මහේස්ත්රාත්වරයා මේ සිද්ධිය සම්බන්ධයෙන් පැමිණිල්ල ගොනු කිරීම අවශ්ය නැති බව සඳහන් කළ අතර සාක්ෂි නැතිව සැකකරුවන් රඳවා ගැනීමට නොහැකි බවත් නඩුව පවත්වාගෙන යාමේ ප්රතිඵලයක් නොමැති බවත් කියමින් සැකකරු සිද්ධියෙන් මුදාහරින ලෙස නියෝග කළේය.
අරගලය පැවති දින අරගලයට ජනතාව රැගෙන පැමිණි නිට්ටඹුව කොළඹ බස් රථයක් කොළඹ කොල්ලුපිටිය පෙරහැර රථ ගාලේ නවතා තිබියදී එම බස් රථය ගිනි තැබූ බවට කොල්ලුපිටිය පොලිසිය අත්අඩංගුවට ගනු ලැබූ සැකකරු අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගත කර පසුව ඇප මත මුදා හැර තිබිණි.
මෙලෙස ඇප මත මුදා හැර ඇත්තේ කොල්ලුපිටිය පදිංචි පී. මොහොමඩ් අස්ලම් නමැති පුද්ගලයෙකි.
සුභාෂිණී සේනානායක
Comments
Post a Comment
Your comment will be visible after approval