රුසියානු හමුදාවේ සහායක සේවා රැකියා ලබාදෙන බව සඳහන් කරමින් සංචාරක වීසා මත රැගෙන ගොස් කුලී හේවායන් ලෙස එරට හමුදාවට බඳවාගෙන සිටින ශ්‍රී ලාංකිකයන් දෙදෙනකු පෙරේදා (10) රුසියානු ඉදිරි ආරක්ෂක වළල්ලට එල්ල වූ ඩ්‍රෝන ප්‍රහාරයකින් මියගොස් ඇති බව ආරංචි මාර්ග පවසයි.
යුක්රේන දේශසීමාවේ "ඩොනේෂ්" ප්‍රදේශයේදී යුක්රේන හමුදාව විසින් එල්ල කරන ලද ඩ්‍රෝන ප්‍රහාරයකින් මෙම සෙබළුන් දෙදෙනා ඇතුළු රුසියානු හමුදාවේ කිහිපදෙනකු මියගොස් ඇති බව සඳහන් කරයි.
මෙම ප්‍රහාරය එල්ල වී ඇත්තේ යුද වාහන පෙළකට වන අතර ප්‍රහාරය එල්ල වන විට ඒ ආසන්න ප්‍රදේශයේ ආරක්ෂක කටයුතුවල නිරතව සිටි ශ්‍රී ලාංකිකයකු ඒ සම්බන්ධයෙන් තම නිවෙසට ඊයේ (11) පවසා ඇති බව ද ආරංචි මාර්ග පවසයි. මියගොස් ඇත්තේ සහ මෙම තොරතුරු මෙරටට ලබාදී ඇත්තේ යුද හමුදාවේ සේවය කර විශ්‍රාම ගොස් සිටින අයකු බව ද වාර්තා වෙයි.
සහායක සේවා කටයුතු සඳහා යැයි පවසමින් මෙරට හමුදාවේ විශ්‍රාම ගිය සැලකිය යුතු පිරිසක් රුසියාවට රැගෙන ගොස් අවි පුහුණුව නැවත ලබාදෙමින් කුලී හේවායන් ලෙස රුසියානු ඉදිරි ආරක්ෂක වළල්ලට යොදවන බව රුසියානු හමුදාවෙන් පලාවිත් මේ වන විට මෙරට සිටින යුද හමුදාවේ විශ්‍රාමිකයකු අපරාධ පරීක්ෂණ දෙපාර්තමේන්තුවට මීට දින කිහිපයකට පෙර පැමිණිල්ලක් ද කර තිබේ.
මෙම ජාවාරම සිදු කරන පුද්ගලයන් හා ඒජන්සි සම්බන්ධයෙන් බොහෝ තොරතුරු අපරාධ පරීක්ෂණ දෙපාර්තමේන්තුවට ලබාදෙමින් පවසා ඇත්තේ රුසියානු හමුදාවේ කුලී හේවායන් ලෙස යොදවා ඇති ශ්‍රී ලාංකික විශ්‍රාමික හමුදා සෙබළුන් අන්ත ලෙස දුක් විඳින බවයි. බිලි බෝයි ලෙස යොදා ගන්නා ඔවුන්ට පැන යෑමට ද නොහැකි අතර පසුපසට පැමිණෙන්නේ නම් වෙඩි තබන බව ද වාර්තා වෙයි. පලා යෑමට සූදානම් වුවහොත් සිදුවන්නේ ද වෙඩි කන්නට බව එම සෙබළා අපරාධ පරීක්ෂණ දෙපාර්තමේන්තුව හමුවේ පවසා ඇත.
දින ගණනක් නිරාහාරව සිට කැලෑ මාර්ගයක් ඔස්සේ ගමන් කොට රුසියාවේ ශ්‍රී ලංකා තානාපති කාර්යාලයේ ද සහාය ඇතිව මෙරටට පැමිණි බව රුසියානු හමුදාවෙන් පලා ආ ශ්‍රී ලාංකිකයා පවසා තිබේ. රුසියානු භාෂාවෙන් ඇති ලියකියවිලි පෙන්වා මෙම වංචාව සිදු කරන පුද්ගලයන් සම්බන්ධයෙන් අපරාධ පරීක්ෂණ දෙපාර්තමේන්තුව පුළුල් විමර්ශනයක් ආරම්භ කර තිබේ.
(ගයාන් කුමාර වීරසිංහ සහ මහින්ද අලුත්ගෙදර)
0 Comments