හන්තාන ප්‍රදේශයේ සුවිසල් නිවෙසක් කුලියට ගෙන මව සහ දියණිය එක්ව පවත්වාගෙන ගිය ගණිකා නිවාසයක් වටලා මහනුවර කොට්ඨාස අපරාධ විමර්ශන ඒකකය මඟින් කාන්තාවන් තිදෙනකු සැකපිට අත්අඩංගුවට ගනු ලැබ තිබේ.
මේ ගණිකා නිවෙසේ කළමනාකාරිනිය ලෙස දියණිය ද, මුදල් අයකැමි ලෙස මව ද කටයුතු කර තිබෙන බව පොලිස් පරීක්ෂණවලින් අනාවරණය වී ඇත.
සැකපිට අත්අඩංගුවට ගත් මව සහ දියණිය ගලෙන්බිඳුණුවැව පදිංචිකරුවන් බව පොලිසිය පවසයි.
ගණිකා නිවාසය පිළිබඳව සති දෙකක කාලයක් පොලිස් නිලධාරීන් ආවේශන රාජකාරිවල නිරතව සිට උපාය දූතයකු යොදවා රුපියල් පන්දහසක මුදලකට ගණිකා සේවය ගැනීමට සැලැස්වීමෙන් පසු පොලිසිය අදාළ වැටලීම සිදු කර තිබේ.
වැටලීම සිදු කරන අවස්ථාවේ එහි මව සහ දියණියට අමතරව එක් කාන්තාවක් පමණක් සිට ඇත. ප්‍රශ්න කිරීමේදී ඔවුන් පවසා ඇත්තේ අවුරුදු නිවාඩුවට ගිය සෙසු කාන්තාවන් යළි සේවයට වාර්තා නොකළ බවයි.
අත්අඩංගුවට ගත් අනෙක් කාන්තාව 28 හැවිරිදි මාවනැල්ල ප්‍රදේශයේ පදිංචිකාරියකි.
මහනුවර කොට්ඨාස භාර ජ්‍යෙෂ්ඨ පොලිස් අධිකාරි අනුරුද්ධ බණ්ඩාරනායක මහතාගේ උපදෙස් මත, කොට්ඨාස අපරාධ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක තිලක් සමරනායක මහතාගේ මෙහෙයවීමෙන් පොලිස් පරීක්ෂක වීරරත්න, උප පොලිස් පරීක්ෂක ධම්මික, කාන්තා පොලිස් සැරයන් (5044) මංජුලා, පොලිස් කොස්තාපල් (69707) හේමසිරි, පොලිස් කොස්තාපල් (60707) චානක යන නිලධාරීන් වැටලීම සිදු කර ඇත.
(අසේල කුරුළුවංශ)
0 Comments