ජනාධිපතිවරයකු තෝරා පත් කර ගැනීමේ පනතට අනුව පිළිගත් දේශපාලන පක්ෂයකින් ඉදිරිපත් වන අපේක්ෂකයකු ඇප වශයෙන් තැන්පත් කළ යුතු මුදල රුපියල් මිලියන 2.6ක් හා ස්වාධීන අපේක්ෂකයකු තැන්පත් කළ යුතු මුදල රුපියල් මිලියන 3.1ක් දක්වා ඉහළ දමා තිබේ.
1981 අංක 15 දරන ජනාධිපතිවරයා තෝරා පත් කර ගැනීමේ පනතට අනුව මෙය සිදු කරනු ලබන අතර ජනාධිපති රනිල් වික්‍රමසිංහ, අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ ඇමැති විජයදාස රාජපක්ෂ මහත්වරුන් එක්ව ඉදිරිපත් කළ යෝජනාවට කැබිනට් අනුමැතිය හිමිව ඇත.
1981 අංක 1 දරන පාර්ලිමේන්තු මැතිවරණ පනතට අනුව පිළිගත් දේශපාලන පක්ෂයකින් ඉදිරිපත් වන එක් අපේක්ෂකයකුගේ ඇප තැන්පතුව රුපියල් 11,000ක් දක්වාත් ස්වාධීන කණ්ඩායමක එක් අපේක්ෂකයකුගේ ඇප තැන්පතුව රුපියල් 16,000 දක්වාත් ඉහළ දමා තිබේ.
1988 අංක 2 දරන පළාත් සභා ඡන්ද විමසීම් පනතට අනුව පිළිගත් දේශපාලන පක්ෂයකින් ඉදිරිපත් වන එක් අපේක්ෂකයකුගේ ඇප තැන්පතුව රුපියල් 6000 දක්වාත් ස්වාධීන කණ්ඩායමක එක් අපේක්ෂකයකුගේ ඇප තැන්පතුව රුපියල් 11,000 දක්වාත් ඉහළ දමා ඇත.
ජනාධිපතිවරයා තෝරා පත් කර ගැනීමේ පනතේ, පාර්ලිමේන්තු මැතිවරණ පනතේ සහ පළාත් සභා ඡන්ද විමසීම් පනතේ විධිවිධාන පරිදි දැනට පවතින ඇප තැන්පතු මුදල් සීමාවන් කාලෝචිත පරිදි වත්මන් සමාජ, ආර්ථික සහ දේශපාලන පසුබිම් අනුව යාවත්කාලීන කිරීම සුදුසු බවට හඳුනාගෙන ලැබ ඇත.
ඒ අනුව අදාළ ඇප තැන්පත් මුදල් සංශෝධනය කිරීමට පනත් කෙටුම්පතක් සකස් කරන ලෙස නීති කෙටුම්පත් සම්පාදකට උපදෙස් දීමට මෙලෙස අනුමැතිය හිමිව තිබේ.
ජනාධිපතිවරයකු තෝරා පත් කර ගැනීමේ පනතට අනුව පිළිගත් දේශපාලන පක්ෂයකින් ඉදිරිපත් වන අපේක්ෂකයකු දැනට ඇප වශයෙන් තැන්පත් කළ යුතු මුදල වන්නේ රුපියල් 50,000ක් වන අතර ස්වාධීන අපේක්ෂකයකු තැන්පත් කළ යුතු මුදල රුපියල් 75,000කි.
(නුවන් කොඩිකාර)
0 Comments