යාංගල්මෝදර මංසන්ධිය අසල පහළ වළකුඹුර අඔයායවත්ත ප්‍රජා ශාලාව පිටුපස මාඔයේ පෙරේදා(27) පොල්ගහවෙල ශාන්ත බර්නදෙත් මහා විද්‍යාලයේ ඉගෙනුම ලබන සිසුන් 04 දෙනෙක් දියේ ගිලී මිය ගියේ දෙමාපියන් දරුවන් කෙරෙහි තැබූ දහසක් බලාපොරොත්තු සුන් කරමිනි.
දිය නෑමට එක් වූ සිසුන් 10 දෙනා සුපුරුදු ලෙස පාසල් ගොස් අධ්‍යාපන කටයුතුවල නිරත වී සවස 2.00ට පමණ පහළ වළකුඹුර මාඔය අසළ පදිංචි කළණ ලක්ෂිත මිතුරාගේ නිවසට පැමිණ ඇත්තේ කළණ ලක්ෂිත තම මිතුරන් වෙනුවෙන් සකස් කර තිබූ දිවා ආහාරය ලබා ගැනීම සඳහාය. එසේ පැමිණි ඔවුන් දිවා ආහාරය ගැනීමට පෙර මාඔයට ගොස් ඇත්තේ ඔහුගේ නිවස පිටුපස මාඔයේ දිය නාමින් විනෝද වීමටය. ඔවුන් එකිනෙකාගේ දෙමාපියන් හට ඒ බව දන්වා තිබුනද ඔවුන් සියලු දෙනාගේ යටි අරමුණ වී ඇත්තේ ඔවුන් ගේ අවසන් ගමනාන්තය මාඔයේ දියඔ වූ නිසාය.
ඔවුන් සියලු දෙනාට දිවා ආහාරය සකස් කර තිබූ කළණ ලක්ෂිතගේ මව සහ පියා ඔවුනට නොපමාව කෑමට පැමිණෙන ලෙසද ඉල්ලීම් කර ඇති අතර පරිස්සමට නොපමාව පැමිණෙන ලෙසද අවවාද කර ඇත.
කළණ ලක්ෂිත සමඟ මාඔයට ගිය මිතුරන් 11 දෙනා අතරින් 05 දෙනකු දිය නෑමට ගොස් ඇති අතර ඉතිරි 06 දෙනා එහි දිය නොනා එහි රැඳී සිට ඇත.
ගැඔුරු දියට බැස දිය නාමින් විනෝද වන අතර මිතුරු පිරිසේ ඉතිරි 06 දෙනා මාඔයේ ඔබ මොබ ඇවිදිමින් ඔවුන් දිය නාමින් විනෝද වන අයුරු බලමින් සිට ඇත. ගත වුයේ නිමේෂයකි . සියලු දෙනා අන්ද මන්ද කරමින් පතුල නොපෙනෙන ගැඹුරු දිය පතුලේ මිතුරන් පස් දෙනා එකි නෙකා නොපෙනී ගියේ කිසිවකුට සරණක් හෝ පිහිටක් පැතීමටවත් ඉඩ නොතබමිනි. වහා එහි සිටි කළණගේ මිතුරන් උදව් ඉල්ලා කෑ ගැසු අතර අසල්වැසියන් වහා දිව විත් දරුවන් බේරා ගැනීමේ මෙහෙයුම ඇරැඹූහ. ඉන් විනාඩි 20කට ආසන්න කාලයකදී ගිලී සිටි එක් දරුවකු දිය මතු පිටට ගෙන එන්නට ඔවුන් සමත් විය. එම දරුවා ජීවත්ව සිටින අතර ඔහු කුරුණෑගල ශික්ෂණ රෝහලේ ප්‍රතිකාර ලබයි.
අනෙකුත් දරුවන් බේරා ගැනීමේ මෙහෙයුම අඛණ්ඩව සිදු කෙරුණද ඔවුන් ගිලී සිටි ස්ථානය අඩි 35 ක් පමණ වූ ගැඹුරු වක්කලමක් සහිත ස්ථානයක් වූ බැවින් ඔවුන් බේරා ගැනීමේ කාලය තවත් දිගු විය. එ් මොහොතේ පැවැති අධික වර්ෂාව පවා නොතකා තරුණ පිරිස හා ප්‍රදේශවාසීන් ඉතිරි සිව් දෙනා සොයා ගන්නා විට සවස 05 පසු වී තිබිණ. ගොඩ ගත් සියලු දෙනා රෝහල් ගත කළද එක් අයකු හැර ඉතිරි හතර දෙනාම මෙලොව හැර ගොස් අවසන්ය.
ක්‍රීඩා කුසලතාවන්ගෙන් හෙබි රටට දැයට වැඩදායක පුරවැසියන් ලෙස ඉදිරි දිනෙක දී වගකීම් දැරීමට සිටි එම සියලු දෙනා ජල රකුසාට බිලිව මෙලොව හැර ගොස් අවසන්ය.
පහළ වළකුඹුර පදිංචි කළණ ලක්ෂිත අමරසිංහ(14) ශාන්ත බර්නදෙත් මහා විද්‍යාලයේ 09 ශ්‍රේණියේ ඉගෙනුම ලබන 15 න් පහළ ක්‍රිකට් කණ්ඩායමේ නායකත්වය හොබවන අතර 17න් පහළ ක්‍රිකට් කණ්ඩායමද නියෝජනය කරන ඔහු පාසලේ ඉගෙනීමට මෙන්ම බාහිර ක්‍රියාකාරකම්වලදී කැපී පෙනෙන දක්ෂ සිසුවෙකි. කළණගේ පවුලේ ඔහුට තවත් එක් බාල සහෝදරියක් වේ.
පොල්ගහවෙල තලවත්තේගෙදර පදිංචිව සිටි රවිඳු රන්මිණ අමරසිංහ(14) පොල්ගහවෙල ශාන්ත බර්නදෙත් මහා විද්‍යාලයේ 09 සී ශ්‍රේණියේ ඉගෙනුම ලබන ඔහුට පවුලේ වැඩිමහල් සහෝදර යකු සිටී ඔහු පවුලේ බාලයාය.
කවීන් සෙනුර(14) පොල්ගහවෙල මැද්දලන්දේ පදිංචිව සිටි අතර ඔහු පවුලේ වැඩිමලාය. ඔහුට තවත් නැඟණියක් සිටී.
විදෙස් දෙවිමිණ(14) පහළ වළකුඹුර බලගල්ල වත්ත පදිංචිව සිටි අතර ඔහු පවුලේ වැඩිමලාය ඔහුට තවත් සොහොයුරකු ද සිටී.
මෙම මරණයන් දියේ ගිලීමෙන් සිදු වූ මරණයන් බවට සිදු කළ මරණ පරීක්ෂණයේදී අනාවරණය විය. මේ පිළිබඳ පශ්චාත් මරණ පරීක්ෂණය පොල්ගහවෙල ප්‍රාදේශීය ලේකම් කොට්ඨාසයේ හදිසි මරණ පරීක්ෂක එස්. පී. තිලක් ප්‍රේමසිරි මහතාගේ හා දිස්ත්‍රික් වෛද්‍ය නිලධාරී එම්. එස්. පී. කේ. අලවල යන මහත්වරුන් ඉදිරියේදී පැවැත්විණි.
අලව්ව - ජයන්ත දිසානායක
0 Comments