ජාතික ඖෂධ නියාමන අධිකාරියේ (එන්එම්ආර්ඒ) දත්ත මකා දැමීම සම්බන්ධයෙන් එහි දත්ත ගබඩාව පවත්වාගෙන ගිය සමාගමේ හිටපු සහකාර ඉංජිනේරුවෙකු අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබේ.
ජාතික ඖෂධ නියාමන අධිකාරියේ දත්ත ගබඩාවට නීති විරෝධී ලෙස ඇතුළු වී එහි දත්ත මකා දැමීම සම්බන්ධයෙන් එපික් ලංකා ටෙක්නොලොජි (පුද්ගලික) සමාගමේ සහකාර ඉංජිනේරු රාමනායක ආරච්චිගේ දොන් ප්‍රමෝද් දිලුප රාමනායක මෙලෙස අත්අඩංගුවට ගෙන තිබේ.
අධිකාරියේ දත්ත ගබඩාවෙන් දත්ත මකා දැමීමට නියෝග කළ පරිපාලකයා ලෙස ඔහුගේ IP ලිපිනය හඳුනාගෙන ඇත.
මොරටුව විශ්ව විද්‍යාලයේ සහ අපරාධ පරීක්ෂණ දෙපාර්තමේන්තුවේ විද්‍යාගාරය විසින් සිදු කරන ලද සිද්ධියේ වෝහාරික විශ්ලේෂණයෙන් පසුව අදාළ IP ලිපින හඳුනා ගත් අතර හිතාමතාම දත්ත ගබඩාවට ප්‍රවේශ වී අපරාධයක් සිදු කළ බවට සැකපිට සැකකරු අත්අඩංගුවට ගෙන ඇත.
දත්ත මකා දැමීම සඳහා හිතාමතාම දත්ත ගබඩාවට ප්‍රවේශ වීම හේතුවෙන් ප්‍රශ්න කිරීම සඳහා කැඳවා සැකකරු අත්අඩංගුවට ගත් බව රහස් පොලිසිය පැවසීය.
සැකකරු බදාදා කොළඹ ප්‍රධාන මහේස්ත්‍රාත් අධිකරණයට ඉදිරිපත් කිරීමට නියමිතය.
සිද්ධිය සම්බන්ධයෙන් මීට පෙර එපික් ලංකා ටෙක්නොලොජි (පුද්ගලික) සමාගමේ ප්‍රධාන විධායක නිලධාරී තරින්ද කල්පගේ අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන ඇප මත නිදහස් කර තිබේ.
2018 මැයි 3 දා ඖෂධ දත්ත සමුදාය සම්පාදනය කිරීම සඳහා එපික් ලංකා ටෙක්නොලොජි ආයතනය එන්එම්ආර්ඒ සමඟ ගිවිසුමක් අත්සන් කළ බවත් එම ගිවිසුම වසර පහක කාලයක් සඳහා වලංගු බවත් රහස් පොලිසිය අධිකරණයට දන්වා තිබුණි.
දත්ත ගබඩාවේ තිබූ ස්වයංක්‍රීය දත්ත ගොනු මිලියන 1.1 කට ආසන්න ප්‍රමාණයක් අතුරුදහන් වී ඇති බවට වාර්‍තා කරමින් එන්එම්ආර්ඒ හි සභාපතිවරයා විසින් අගෝස්තු 12 දා කරන ලද පැමිණිල්ලක් මත අපරාධ පරීක්ෂණ දෙපාර්තමේන්තුව පරීක්ෂණ ආරම්භ කරන ලදී.
0 Comments