පසුගිය කාලයේ කොරෝනා සුව කරන්නක් බවට ප්‍රචාරණයක නිරතවෙමින් ජනමාධ්‍ය තුළ ආන්දෝලනයක් මතු කළ ධම්මික පැණිය හෙවත් කෑගල්ල, හෙට්ටිමුල්ල භද්‍රකාලි කෝවිලේ ධනපාල නමැති කපු මහතෙකු හදුන්වාදුන් පැණිය කොවිඩ් රෝගීන්ට ප්‍රතිකාර කිරීම සඳහා නුසුදුසු බව සායනික පරීක්ෂණවලින් තහවුරු වී තිබේ.


මේ ගැන දෙරණ මාධ්‍ය ජාලයට අයත් අරුණ පුවත්පත මගින් අද දින මෙසේ විස්තර කර තිබේ.

රජරට විශ්වවිද්‍යාලයේ වෛද්‍ය පීඨයේ සායනික පරීක්ෂණය සිදුකළේ සෞඛ්‍ය අමාත්‍යාංශයේ උපදෙස් පරිදිය. ඒ අනුව අනුරාධපුර ශික්ෂණ රෝහලේ ප්‍රතිකාර ලබන කොවිඩ් රෝගීන් 68 දෙනකුට එම පැණිය ලබාදී නිරීක්ෂණය කර ඇත. එහෙත් කොවිඩ් රෝගීන්ට සුව වීමක් දක්නට නොලැබුණු බව රජරට විශ්වවිද්‍යාලයේ වෛද්‍ය පීඨයේ වෛද්‍ය සේනක පිලපිටිය ප්‍රකාශ කළේය.

වතුපිටිවල මූලික රෝහලේ කොවිඩ් රෝගීන්ට ලබාදීමේදී 100% ප්‍රතිඵල ලැබුණු බව සෞඛ්‍ය අමාත්‍යාංශය මිට පෙර නිවේදනය කළේය.

සියලු පරීක්ෂණ වාර්තා රජරට විශ්වවිද්‍යාලය විසින් සෞඛ්‍ය අමාත්‍යාංශය පත්කළ විද්වත් කමිටුවට යොමුකර ඇත.

විද්වත් කමිටුව පසුගිය බදාදා (28දා) රැස්වී මේ පිළිබඳ අධ්‍යයනය කර ඇති අතර, එය කොවිඩ් රෝගීන්ට ප්‍රතිකාර කිරීමට නුසුදුසු බව අනාවරණය වී තිබේ.



කෙසේ වෙතත් විද්වත් කමිටු නිර්දේශය රජරට විශ්වවිද්‍යාලයට යොමු කිරීමෙන් පසු ස්ථිර වාර්තාවක් ලබන සතියේදී සෞඛ්‍ය අමාත්‍යාංශයට ලැබීමට නියමිතය.

කොවිඩ් රෝගීන් 100%ක් සුව වන බව ප්‍රකාශ කරමින් සකස් කළ මෙම පැණිය පාර්ලිමේන්තු මන්ත්‍රීවරු ඇතුළු විශාල ජන කොට්ඨාසයක් ලබාගැනීමත් සමග සායනික පරීක්ෂණයක් කිරීමට සෞඛ්‍ය අමාත්‍යාංශය හා ආයුර්වේද දෙපාර්තමේන්තුව තීරණය කළේය.

කෙසේ වෙතත් මෙම පැණියට ආයුර්වේද දෙපාර්තමේන්තුවේ මිල සූත්‍ර කමිටුවද අනුමැතිය ලබාදී ඇත.