ඔක්ස්ෆර්ඩ් ඇස්ට්‍රාසෙනකා එන්නත අවුරුදු 18 ට අඩු දරුවන්ට ලබා දෙමින් එන්නත දරුවන්ට සුදුසුදැයි සෙවීමට කළ සායනික අත්හදා බැලීම් වහා නැවැත්විමට ඔක්ස්ෆර්ඩ් විශ්ව විද්‍යාලය ඊයේ තීරණය කළේය. ඔක්ස්ෆර්ඩ් විශ්ව විද්‍යාලයේ වෛද්‍ය පර්යේෂකයන් මෙසේ තීරණය කළේ එන්නත ලබා ගැනීමෙන් පසු රුධිර කැටි ඇතිවීමේ බියක් හටගෙන ඇති බැවින් සහ ඒ සම්බන්ධයෙන් පුළුල් විමර්ශනයක් පැවැත්වෙන බැවිනි. ඇස්ට්‍රාසෙනකා එන්නත නිපදවූයේ ද ඔක්සෆර්ඩ් විශ්ව විද්‍යාලයේ වෛද්‍ය පරේෂකයන් මැදිහත් වීමෙනි.
විද්‍යාඥයන් එන්නත නිපදවීම කළේ ඇස්ට්‍රාසෙනකා ඖෂධ සමාගම සමඟ හවුලේය. ඇස්ට්‍රාසෙනකා යනු ලොව පිළිගත් ඖෂධ නිෂ්පාදන සමාගමකි. ‘කෝවිඩ් 19" හෙවත් නව කොරෝනා වයිරසයට එරෙහිව අවුරුදු 18 ට අඩු දරුවන්ට කිසිදු එන්නතක් නිර්දේශ කර නැත. දරුවන් වෙනුවෙන්ද එන්නතක අවශ්‍යතාව ඇති බැවින් ඔක්ස්ෆර්ඩ් ඇස්ට්‍රාසෙනකා එන්නත පමණක් නොව, ඇමෙරිකාවේ ෆයිසර්' සහ 'මොඩර්නා' යන එන්නත් ද දරුවන් යොදා ගනිමින් අත්හදා බැලීම් සිදු කරයි.
මෙම ඔක්ස්ෆර්ඩ් ඇස්ට්‍රාසෙනකා එන්නත මේ වනවිට ලොව රටවල් රැසකට භාවිතයට ගැනෙන නමුත්, එන්නත ලබා ගැනීමෙන් රුධිරය කැටි ගැසිමේ අවදානමක් පවතින බවට බියක් නිර්මාණය වී තිබේ. මහා බ්‍රිතාන්‍යයේ පමණක්, එන්නත ලබා ගැනීමෙන් පසු රුධිරය කැටි ගැසීමෙන් මියගිය ගණන 7 කි. දරුවන් යොදා ගනිමින් කළ අත්හදා බැලීම් වහා නැවැත්වීමට ඔක්ස්ෆර්ඩ් විශ්ව විද්‍යාලයේ විද්‍යාඥයන් තීරණය කර ඇත්තේ මේ නිසාය. මහා බ්‍රිතාන්‍යයේ ඖෂධ නියාමන අධිකාරිය එම මරණ සිදුවුණු ආකාරය සම්බන්ධයෙන් පුළුල් විමර්ශනයක් ආරම්භ කර ඇති අතර එම විමර්ශන අවසන් වීමෙන් පසු දරුවන් යොදා ගනිමින් කරන අත්හදා බැලීම් යළි ආරම්භ කරන බව ඔක්ස්ෆර්ඩ් විශ්ව විද්‍යාලය නිකුත් කළ නිවේදනයක දැක්වෙයි.
0 Comments