පන්නිපිටිය ප්‍රදේශයේ වාසය කරන මහරගම අපේක්ෂා රෝහලේ සේවය කරනු ලබන වෛද්‍යවරයෙකු පාසල් සිසුවෙකුට වෙඩිතැබීමේ සිදුවීමක් නිසා අත්අඩංගුවට පත්ව තිබේ.
වාර්තාවන ආකාරයට
මෙම වෛද්‍යවරයා වාසය කරන්නේ ඇරැව්වල ධර්මපාල විද්‍යාලයේ ක්‍රීඩා පිටිය යාබද නිවසකය. මෙම ක්‍රීඩා පිටියේ ඊයේ සවස සෙල්ලම් කරමින් සිටි සිසුවෙකු අතින් ටෙනිස් පන්දුවක් අත්වැරදීමකින් වෛද්‍යවරයාගේ නිවස වෙත යොමුව ඇති අතර එම අවස්ථාවේ සිද්ධියට උරණවූ වෛද්‍යවරයා සිසුවාට වායු රයිෆලයකින් වෙඩි තබා ඇත. මේ හේතුවෙන් එම සිසුවා තුවාල ලබා රෝහල් ගත කොට ඇතැයි වාර්තා විය.
පාසලේ ක්‍රීඩා පිටියේ ක්‍රීඩා කරමින් සිටි මේ සිසුවා පන්දුව වෛද්‍යවරයාගේ වත්තකට යාම නිසා එය නැවත ලබා ගැනීමට යාමේදී මෙම සිදුවීමට මුහුණපා ඇති බව පොලිසිය වාර්තා කර තිබේ.

මෙලෙස පාසැල් සිසුවාට වෙඩි තබා ඇත්තේ මහරගම අපේක්ෂා රෝහලේ සේවය කරනු ලබන වෛද්‍යවරයෙකු වන අතර ඔහුව මහරගම පොලිසිය විසින් අත්අඩංගුවට ගෙන තිබෙයි.

තුවාල ලැබූ පාසැල් සිසුවා කළුබෝවිල රෝහලට ඇතුලත් කර ඇති අතර ඔහුගේ තත්ත්වය බරපතල නොවන බව රෝහල් ආරංචි මාර්ග සඳහන් කර ඇත.
අත්අඩංගුවට ගනු ලැබූ සැකකාර වෛද්‍යවරයා අද දිනයේදී නුගේගොඩ මහේස්ත්‍රාත් අධිකරණය හමුවට ඉදිරිපත් කිරිමට නියමිතයි.