විදේශ රටවලින් ආනයනය කරන ලද නවීන පන්නයේ උපකරණ යොදාගෙන කේරළ ගංජා සහ අයිස්
මත්ද්‍රව්‍ය පානයට
පහසුකම්ද සලසන අතරවාරයේ කාන්තාවන් මුදලට අලෙවි කිරීමේ මෙම ජාවාරම මෙහෙය වූ කළුතර උතුර වස්කඩුව නිවාඩු නිකේතනයක හිමිකරු ඇතුළු පුද්ගලයන් පස් දෙනකු ඊයේ (7දා) අත්අඩංගුවට ගෙන තිබේ.
නවීන පන්නයේ උපකරණවලට අයිස් මත්ද්‍රව්‍ය හෝ කේරළ ගංජා ඇතුළු කර රසායනික ද්‍රව්‍ය යොදා එම උපකරණ ගල්අඟුරු හා වතුරින් පණ ගන්වා ඊට සවිකර තිබෙන
නළ මාර්ගයෙන් එයින් පිටවන දුම ආඝ්‍රාණය කිරීමට අවශ්‍ය පහසුකම් සලසා ඇතැයි වැටලීම කළ පොලිස්
නිලධාරියෙක් පැවැසීය.
කොරෝනා වසංගත තත්ත්වය හමුවේ සංචාරකයන්ගේ පැමිණීම ද අඩුවීම හේතුවෙන් මෙම මහා පරිමාණ
මත්ද්‍රව්‍ය ජාවාරම ජයටම කර ඇතැයි පොලිස් නිලධාරියා පැවැසීය.
මෙම ස්ථානයට පැමිණෙන විදේශීය සංචාරකයන්ගෙන් මේ අයුරින් මත්ද්‍රව්‍ය පානය කිරීමට පහසුකම් සැලසීම සඳහා රුපියල් 3,500ක් දේශීය පුද්ගලයකුගෙන් රු. 1,500 අයකර ඇති බව කළ විමර්ශනවලදී
හෙළි වූ බව පොලිස් නිලධාරියා පැවැසීය.
කාන්තාවන්ගේ පහස ලබා ගැනීම සඳහා පැමිණෙන පුද්ගලයන් උපක්‍රමශීලීව මත්ද්‍රව්‍ය පානයට හුරුකර එය වර්ධනය කර ගැනීම සැකකරුවන්ගේ ප්‍රධාන අරමුණ වී ඇති බව මෙම ස්ථානයේ වැටලීමේදී තහවුරු වූ බව පොලිස් නිලධාරියා වැඩිදුරටත් පැවැසීය.
වැටලීම සිදුකරන අවස්ථාවේ කිසිදු කාන්තාවක් එහි නොසිටි බවද පොලිසිය කියයි. අත්අඩංගුවටගත් ප්‍රධාන සැකකරු වයස අවුරුදු 37ක පුද්ගලයෙක් බවත් සෙසු සැකකරුවන් වයස අවුරුදු 20 සහ 25 අතර පසුවන්නන් බවත් පොලිසිය කියයි.
ඔවුන් සියලු දෙනාම වස්කඩුව සහ අවට පදිංචිකරුවන් බව පොලිසිය කියයි.
සැකකරුවන් සමඟ අයිස් මත්ද්‍රව්‍ය සහ කේරළ ගංජා පානය සඳහා යොදාගත් නවීන උපකරණ
දෙකක්, අයිස් මත්ද්‍රව්‍ය ග්‍රෑම් 14ක් කේරළ ගංජා ග්‍රෑම් 20ක් රාත්‍රි සමාජශාලා සඳහා
කරන පෙති 20ක්, අඩි හතරක් පමණ උසින් යුත් සරුවට වැඩුණු ගංජා ගස් හතරක්, ජංගම දුරකථන
6ක්, ජාවාරමෙන් උපයා ගත් බවට සැක කරන රුපියල් 64,000ක මුදලක් හා ත්‍රිරෝද රථයක්ද පොලිස්
භාරයට ගෙන ඇත.
සැකකරුවන් කළුතර මහෙස්ත්‍රාත් අධිකරණය වෙත ඉදිරිපත් කිරීමට නියමිතව තිබිණි.
(එම්.සී. පෙරේරා )
