සිරදඬුවම් නියම වී සිටින බොදුබල සේනා සංවිධානයේ මහලේකම් ගලගොඩඅත්තේ ඥානසාර හිමියන් නිදහස් කරන ලෙස බලකරමින් විහාරමහාදේවි උද්‍යාන පරිශ්‍රයේ පැවැත්වුන විරෝධතාවයට අදාළව දැඩි නීතිමය පියවර ක්‍රියාත්මක කිරීමට අධිකරණය තීරණය කර තිබේ. ඒ අනුව, අදාළ විරෝධතාවය අතරතුර නීත්‍යානුකූල බලපත්‍රයක් නොමැතිව ශබ්ද විකාශන යන්ත්‍ර භාවිත කළ සැකකරුවන් වහාම අත්අඩංගුවට ගන්නා ලෙස කොළඹ අතිරේක මහෙස්ත්‍රාත් ලහිරු සිල්වා කුරුඳුවත්ත පොලිසියට නියෝග කළේය.
මෙම නියෝගය නිකුත් කෙරුණේ කුරුඳුවත්ත පොලිසියේ ස්ථානාධිපති, ප්‍රධාන පොලිස් පරීක්ෂක සාගර දයාරත්න විසින් කරනු ලැබූ පැමිණිල්ලකට අනුව ඊයේ දිනයේදී අධිකරණය වෙත කරුණු වාර්තා කිරීමෙන් අනතුරුවය.
පැමිණිල්ල වෙනුවෙන් අධිකරණයේ පෙනී සිටි කුරුඳුවත්ත පොලිසියේ නිලධාරීන් එහිදී පෙන්වා දුන්නේ, විහාරමහාදේවි උද්‍යානයේ රැඳී සිටින ස්වාමීන් වහන්සේලා සහ සිවිල් ක්‍රියාකාරීන් අධිකරණ නියෝග පවා නොසලකා හරිමින් අඛණ්ඩව විරෝධතාවයේ නිරත වන බවයි. එපමණක් නොව, ඔවුන් කිසිදු නීත්‍යානුකූල අවසරයකින් හෝ බලපත්‍රයකින් තොරව ශබ්ද විකාශන යන්ත්‍ර ද භාවිත කර ඇති බව පොලිසිය විසින් අධිකරණය හමුවේ වැඩිදුරටත් අවධාරණය කරන ලදී.
මේ වන විටත් සිද්ධියට අදාළව විමර්ශන කටයුතු ආරම්භ කර ඇති බව පොලිස් නිලධාරීන් අධිකරණයට දන්වා සිටියේය.
ඉදිරිපත් වූ සියලු කරුණු කෙරෙහි අවධානය යොමු කළ අතිරේක මහෙස්ත්‍රාත්වරයා, බලපත්‍ර රහිතව ශබ්ද විකාශන යන්ත්‍ර භාවිත කළ සැකකරුවන් නීතියේ රැහැනට කොටුකර ගන්නා ලෙසට පොලිසියට නියම කළ අතර, අදාළ විමර්ශනවල ප්‍රගතිය කඩිනමින් අධිකරණය වෙත වාර්තා කරන ලෙසටද කුරුඳුවත්ත පොලිසියට වැඩිදුරටත් නියෝග කළේය.
