නීතිය ක්‍රියාත්මක කිරීමට ගිය පොලිස් නිලධාරියකුට අමානුෂික ලෙස පහර දී ඔහුගේ ඇසක් අන්ධ කර, දත් එකොළහක් කඩා දමමින් ඝාතනය කිරීමට තැත් කිරීමේ නඩුවකට වරදකරු වී සිරදඬුවම් නියම වූ ප්‍රධාන විත්තිකරුවකු මේ වන විට අධිකරණය මඟහැර පලාගොස් තිබේ. මෙලෙස සැඟව සිටින්නේ කොබෙයිගනේ විවිධ සේවා සමුපකාර සමිතියේ හිටපු සභාපතිවරයා ලෙස කටයුතු කළ ආර්.
ඒ. සිසිර කුමාර රාමනායක නමැත්තාය. ඔහුව වහාම අත්අඩංගුවට ගෙන අධිකරණය හමුවට ඉදිරිපත් කරන ලෙස වයඹ පළාත්බද මහාධිකරණ විනිසුරු ටිකිරි ජයතිලක මහතා විසින් නිකවැරටිය කොට්ඨාස භාර ජ්‍යෙෂ්ඨ පොලිස් අධිකාරිවරයාට නියෝග කරමින් මේ වන විට විවෘත වරෙන්තුවක් නිකුත් කර ඇත.මෙම අමානුෂික ප්‍රහාරය එල්ල වන්නේ මීට වසර ගණනාවකට පෙර, එනම් 2006 වසරේ මාර්තු මස 03 වැනිදාය. එවකට රස්නායකපුර පොලිසියේ ස්ථානාධිපතිවරයා ලෙස කටයුතු කළ පොලිස් පරීක්ෂක ප්‍රදීප් කරුණාධීර මහතා දැදුරුඔයේ සිදුවෙමින් පැවති නීතිවිරෝධී වැලි ජාවාරමක් වැටලීම සඳහා එහි ගියේය. එහිදී එම ජාවාරමේ නිරත වෙමින් සිටි ජාවාරම්කරුවන් අත්අඩංගුවට ගැනීමට යාමේදී ඔවුන් විසින් ස්ථානාධිපතිවරයාට මෙම සාහසික පහරදීම සිදු කර තිබුණි.
පහරදීමේ ස්වභාවය කෙතරම් බරපතළ වී ද යත්, ඉන් පොලිස් පරීක්ෂක ප්‍රදීප් කරුණාධීර මහතාගේ දත් එකොළහක් කැඩී ගොස් එක් ඇසක් සම්පූර්ණයෙන්ම අන්ධ විය. ඔහු මරා දැමීමේ අරමුණින්ම එල්ල වූ මෙම ප්‍රහාරයෙන් පසු අදාළ අපරාධයට සම්බන්ධ විත්තිකරුවන්ට නීතියෙන් දඬුවම් නියම වූයේ සිද්ධියෙන් වසර ගණනාවකට පසුව වීම ද මෙහි ඇති විශේෂත්වයකි.
දීර්ඝ නඩු විභාගයකින් අනතුරුව, මේ වන විට අධිකරණය මඟහැර සිටින කොබෙයිගනේ සමුපකාර සමිතියේ හිටපු සභාපති සිසිර කුමාර රාමනායකට වයඹ පළාත්බද මහාධිකරණ විනිසුරු ටිකිරි ජයතිලක මහතා විසින් වසර පහක බරපතළ වැඩ සහිත සිරදඬුවමක් නියම කරනු ලැබීය. ඊට අමතරව, මෙම නඩුවේ හයවැනි විත්තිකරුගේ සිට නවවැනි විත්තිකරු දක්වා වූ පුද්ගලයන් සිවුදෙනාට වසර හතර බැගින් ද, සෙසු විත්තිකරුවන්ට වසර දෙක බැගින් ද බරපතළ වැඩ සහිත සිරදඬුවම් නියම කෙරිණි.
මෙලෙස වසර හතරක සහ දෙකක සිරදඬුවම් නියම වූ පිරිස අතර කොබෙයිගනේ ප්‍රාදේශීය සභාවේ එවකට හිටපු උප සභාපති ඒ. මහින්ද කුමාරසිරි ද වෙයි. කේ.පී. සමන්සිරි, එන්.එම්. බුද්ධික ප්‍රසාද්, කේ.ඒ. නිලන්ත සමන් කුමාර, ප්‍රියන්ත කුමාර, එල්. ඉන්දික නුවන් සම්පත්, පී.එම්. නිමල් සිරිවර්ධන, ආර්.එම්. රංජන් රාමනායක, ආර්. එම්. ජයලත් ප්‍රදීප් කුමාර, ඒ.එල්. රාමනායක, එස්. එම්. සුනිල් ප්‍රියන්ත, එල්. ලලිත් ප්‍රේමකුමාර, එස්. ඒ. නිලන්ත සමරතුංග, එල්. අජන්ත සමරවීර, එස්. ඒ. නිලන්ත සමරවීර, එස්. ඒ. ලක්ෂ්මන්, ඒ. අසංක ඉන්ද්‍රජිත් සහ වර්ණකුලසූරිය අනිල් ක්‍රිෂාන්ත යන අය එලෙස දඬුවම් ලැබූ සෙසු විත්තිකරුවෝ වෙති.
වසර ගණනාවකට පසු මෙම සාහසික අපරාධය වෙනුවෙන් යුක්තිය ඉටුවී තිබුණ ද, සිරදඬුවම් නියම වූ ප්‍රධාන විත්තිකරු වන හිටපු සමුපකාර සභාපතිවරයා තවමත් නීතියේ රැහැනින් මිදී සැඟවී සිටී. කෙසේ වෙතත්, වයඹ පළාත්බද මහාධිකරණය විසින් නිකුත් කර ඇති නවතම විවෘත වරෙන්තුවත් සමඟ ඔහුව නීතිය හමුවට ගෙන ඒමේ වගකීම දැන් නිකවැරටිය ජ්‍යෙෂ්ඨ පොලිස් අධිකාරිවරයා ප්‍රමුඛ පොලිස් නිලධාරීන්ට පැවරී තිබේ.