පොළොන්නරුව මහ රෝහලේ සේවය කරමින් දහස් ගණනක් රෝගීන්ගේ ජීවිත සුවපත් කළ විශේෂඥ ශල්‍ය වෛද්‍ය රෝහණ ගමගේ පෙරේදා (06) පස්වරුවේ සිදුවූ අනපේක්ෂිත රිය අනතුරකින් දැයෙන් සමුගත්තේය. ඔහුගේ අවසන් කටයුතු ඊට පසුදා (7) සිදුවිය.
පොළොන්නරුව – හබරණ ප්‍රධාන මාර්ගයේ 39 වන කිලෝමීටර් කණුව ආසන්නයේදී මෙම ඛේදවාචකය සිදුවිය.මින්නේරිය දෙසින් හබරණ දෙසට වෛද්‍යවරයා ධාවනය කළ මෝටර් රථය, ප්‍රතිවිරුද්ධ දෙසින් පැමිණි බර පස් ප්‍රවාහන ටිපර් රථයක මුහුණට මුහුණ ගැටී තිබුණි. ගැටීමේ ප්‍රබලත්වය හමුවේ මෝටර් රථයට දැඩි හානි සිදුව ඇති අතර, රථ දෙකෙහිම රියදුරන් බරපතල තුවාල ලැබූහ.
අනතුරින් බරපතල තත්ත්වයේ පසුවූ 49 හැවිරිදි වෛද්‍යවරයා ප්‍රදේශවාසීන් සහ පොලිසිය එක්ව වහාම හබරණ ප්‍රාදේශීය රෝහල වෙත ඇතුළත් කරන විටත් ඔහු මෙලොවින් සමුගෙන සිටියේය. පොළොන්නරුව නව නගරයේ පදිංචිකරුවකු වූ ඔහුගේ අභාවය රෝහල් කාර්ය මණ්ඩලය ඇතුළු මුළු ප්‍රදේශයම දැඩි කම්පනයකට පත්කර තිබුණි.
සිය ශල්‍ය වෛද්‍ය සංගමයේ සාමාජිකයින් හා ඥාති හිතවතුන්ගේ සෝසුම් මැද අවසන් කටයුතු ඊයේ සිදුවිය.