ස්පාඤ්ඤයේ අධිවේගී දුම්රිය මාර්ගවල 2026 වසරේ සිදුවූ මාරාන්තික දුම්රිය අනතුරු දෙකක් මුල්කරගනිමින් එරට ප්‍රවාහන අමාත්‍ය ඔස්කාර් පුවෙන්ටේ හදිසියේ සිය ධුරයෙන් ඉල්ලා අස්වීමත් සමඟ, කැබිනට් මණ්ඩලයේ නව සංශෝධනයක් සිදු කිරීමට ස්පාඤ්ඤ අග්‍රාමාත්‍ය පේද්‍රෝ සැන්චෙස් පියවර ගෙන තිබේ.
ඒ අනුව, ප්‍රවාහන අමාත්‍යාංශයේ කටයුතු තාවකාලිකව මෙහෙයවීම සඳහා ආර්ථික කටයුතු අමාත්‍යවරයා මෙන්ම සිය නියෝජ්‍යවරයෙකු ද වන කාලෝස් ක්වෙර්පෝ පත් කළ බව අග්‍රාමාත්‍යවරයා නොවැම්බර් 4 වැනිදා නිවේදනය කළේය. ක්වෙර්පෝ යනු අතිමහත් කළමනාකරණ හැකියාවක් සහ අවංකභාවයක් පෙන්නුම් කළ අයෙකු බව අග්‍රාමාත්‍යවරයා එහිදී වැඩිදුරටත් පැවසීය.
පුද්ගලයින් 115 දෙනෙකුට ජීවිත අහිමි කරමින් සිදුවූ මෙම මාරාන්තික දුම්රිය අනතුරු සම්බන්ධයෙන් ප්‍රවාහන අමාත්‍යවරයා වගකීම භාරගත යුතු බවට විපක්ෂයෙන් සහ සන්ධානගත පාර්ශ්වයන්ගෙන් දැඩි බලපෑම් එල්ල වෙමින් තිබුණි. නොවැම්බර් 3 වැනිදා රාත්‍රියේ පාර්ලිමේන්තු කමිටුවක් හමුවේ පැය හතරක පමණ කාලයක් දැඩි ප්‍රශ්න කිරීම්වලට ලක්වීමෙන් අනතුරුව, 57 හැවිරිදි පුවෙන්ටේ සිය ඉල්ලා අස්වීමේ තීරණය නීති සම්පාදකයින් හමුවේ ප්‍රකාශයට පත් කළේය.
කෙසේ වෙතත්, පසුව අනාවරණය වූයේ ඔක්තෝබර් 28 වැනිදා මධ්‍යම ස්පාඤ්ඤයේ උර්ඩා ප්‍රදේශයේදී සිදුවූ දෙවැනි දුම්රිය අනතුරින් අනතුරුවම ඔහු මෙම තීරණය ගෙන තිබූ බවයි. නමුත් ඒ බව අග්‍රාමාත්‍යවරයාගෙන් පවා වසන් කළ ඔහු, සිය පවුලේ සාමාජිකයින්ට පමණක් ඒ බව දන්වා තිබුණි. ඊට පෙර ඔහු ප්‍රසිද්ධියේ පවසා තිබුණේ, පද්ධතියේ පවතින අඩුපාඩු සකස් කරමින් විමර්ශන කටයුතු සඳහා තමන් තවදුරටත් ධුරයේ රැඳී සිටින බවයි.
කෙටි රූපවාහිනී පණිවිඩයක් මගින් අග්‍රාමාත්‍ය සැන්චෙස් පුවෙන්ටේගේ දේශපාලනමය ගරුත්වය අගය කළ අතර, ඔහුගේ මෙම තීරණය දුම්රිය පද්ධතිය කෙරෙහි යළි විශ්වාසය ගොඩනැගීමට රටට උපකාරී වූ බව පැවසීය. "ඔහු වැනි දේශපාලනඥයින් අපේ රටට ගෞරවයක් ගෙන දෙනවා වගේම, අපි සියලුදෙනාම එක සමාන නැති බව පෙන්වා දෙනවා. සමහරු නිකම්ම දේශනා කරද්දී තවත් අය තමන්ගේ උපරිමය ලබා දෙනවා," යනුවෙන් පැවසූ අග්‍රාමාත්‍යවරයා, පුවෙන්ටේ ගැටලුවලට විසඳුම් ලබා දී ඉන්පසුව ගෞරවනීය ලෙස ඉවත් වූ බව ප්‍රකාශ කළේය.
නීතිඥයෙකු සහ හිටපු නගරාධිපතිවරයෙකු වන පුවෙන්ටේ, 2023 නොවැම්බර් මාසයේදී ප්‍රවාහන අමාත්‍ය ධුරයට පත්වූ අතර, යුරෝපා සංගමයේ ප්‍රතිසාධන අරමුදල්වල ආධාර ද සහිතව ස්පාඤ්ඤ දුම්රිය ජාලය පුළුල් කිරීමේ කටයුතු මෙහෙයවීය. එහෙත් නඩත්තු කටයුතු සඳහා ප්‍රමාණවත් ආයෝජනයක් සිදු නොකිරීම සහ නිරන්තර බිඳවැටීම් හේතුවෙන් ඔහු වසර ගණනාවක් පුරා වෘත්තීය සමිති සහ විපක්ෂයේ දැඩි විවේචනයට ලක්ව සිටියේය. පසුගිය පෙබරවාරි මාසයේදී ද මැඩ්රිඩ්-සෙවිල් මාර්ගයේම සිදුවූ තවත් මාරාන්තික අනතුරකින් පසුව ඔහුට ඉල්ලා අස්වන ලෙස බල කරමින් සෙනෙට් සභාවට යෝජනාවක් ද ඉදිරිපත් විය. ඔක්තෝබර් 28 අනතුර සිදුවූයේද එම මාර්ගයේමය.
අග්‍රාමාත්‍ය සැන්චෙස්ගේ අතිශය විශ්වාසවන්ත සහ ප්‍රබල අමාත්‍යවරයෙකු වූ පුවෙන්ටේගේ හදිසි ඉවත්වීම, එළඹෙන මැතිවරණ ව්‍යාපාරය සඳහා සූදානම් වෙමින් සිටින පාලක සමාජවාදී පක්ෂයට දැඩි පාඩුවක් වී තිබේ. ඔක්තෝබර් 28 අනතුරෙන් පසු සිදු කළ මත විමසුම්වලදී ද පාලක පක්ෂයේ සහයෝගයේ යම් පසුබෑමක් පෙන්නුම් කර තිබුණි. සමාජ සේවා පවත්වාගෙන යාම සහ නිවාස අර්බුදයට විසඳුම් සෙවීම මත පදනම්ව මෙම මැතිවරණ ව්‍යාපාරය මෙහෙයවීමට පාලක පක්ෂය අපේක්ෂා කර තිබිණි.
මාධ්‍ය විචාරකයින් විසින් අග්‍රාමාත්‍යවරයාගේ "ප්‍රහාරක සුනඛයා" (attack dog) ලෙසද හැඳින්වූ පුවෙන්ටේ, X සමාජ මාධ්‍ය වේදිකාවේ සහ පාර්ලිමේන්තුව තුළ ප්‍රතිවාදීන් සමඟ නිරන්තරයෙන් ගැටුණු ආක්‍රමණශීලී චරිතයක් විය. එම ස්වභාවය නිසාම අග්‍රාමාත්‍ය සැන්චෙස්ගෙන් පසු පක්ෂයේ නායකත්වයට පත්විය හැකි ප්‍රධාන අපේක්ෂකයෙකු ලෙසද ඔහු කතාබහට ලක්ව සිටියේය.
පුවෙන්ටේගේ ඉල්ලා අස්වීම නිල රාජ්‍ය ගැසට් පත්‍රයේ පළවීමෙන් පසු බලාත්මක වනු ඇත. එමෙන්ම එළඹෙන නොවැම්බර් 29 වැනිදා පැවැත්වෙන මැතිවරණය සඳහා තමන් අපේක්ෂකයෙකු ලෙස ඉදිරිපත් නොවන බවද ඔහු වැඩිදුරටත් තහවුරු කර තිබේ.