පසුගිය අඩ සියවසක කාලය තුළ රිපබ්ලිකන් පක්ෂය ලැබූ දරුණුතම මැතිවරණ පරාජය සනිටුහන් කරමින් අමෙරිකානු මධ්‍යවාර මැතිවරණයෙන් ඩිමොක්‍රටික් පක්ෂය විශිෂ්ට ජයග්‍රහණයක් අත්කර ගෙන තිබේ. මෙම දැවැන්ත පරාජයත් සමඟ රිපබ්ලිකන් පක්ෂය අභ්‍යන්තරයේ දැඩි අර්බුද හටගෙන ඇති අතර, උප ජනාධිපති ජේ.ඩී.
වෑන්ස් විසින් ජනාධිපති ඩොනල්ඩ් ට්‍රම්ප්ගේ ඉරාන යුද ප්‍රතිපත්තිය මීට සෘජුවම වගකිව යුතු බවට චෝදනා කර ඇත.මේ වන විට නිකුත් වී ඇති මැතිවරණ ප්‍රතිඵල අනුව, ඩිමොක්‍රටික් පක්ෂය සෙනෙට් මණ්ඩලයේ බහුතරය සඳහා අවශ්‍ය ආසන 51 ඉක්මවා යමින් ආසන 54ක් ද, නියෝජිත මන්ත්‍රී මණ්ඩලයේ බලය සඳහා අවශ්‍ය ආසන 218 ඉක්මවා යමින් ආසන 237ක් ද දිනාගෙන ඇත. ඇලස්කා සහ මිසිසිපි ප්‍රාන්තවල ඡන්ද ගණනය කිරීම් තවදුරටත් ක්‍රියාත්මක වෙමින් පවතී. මෙය 1974 වෝටර්ගේට් මැතිවරණයෙන් පසු පාලක ජනාධිපතිවරයෙකුගේ පක්ෂයක් ලැබූ දරුණුතම පරාජය ලෙස සැලකේ.
වචන 600කින් යුත් විශේෂ නිවේදනයක් නිකුත් කරමින් උප ජනාධිපති ජේ.ඩී. වෑන්ස් ප්‍රකාශ කර ඇත්තේ, මැතිවරණ පරාජයට ප්‍රධානතම හේතුව යුද්ධය බවයි. මැදපෙරදිග ගැටුමට එරෙහිව කටයුතු කළ ඔහු, පරාජය සහ ඊට හේතු වූ කරුණු පිළිබඳව පක්ෂය තුළ දැඩි මතභේද පවතින බව ද සඳහන් කර ඇත. මේ අතර, ඉරාන ආරක්ෂක නිලධාරී මොහ්සෙන් රෙසායි ප්‍රකාශ කර ඇත්තේ, ඉරාන ජාතිය විසින් ට්‍රම්ප් වෙත යුධ පිටියේදී සහ හෝමුස් හිදී මෙන්ම වොෂින්ටනයේ දේශපාලන පිටියේදී ද උපායමාර්ගික පරාජයක් අත්කර දී ඇති බවයි.
කෙසේ වෙතත්, මෙම දැවැන්ත දේශපාලන පරාජය හමුවේ ජනාධිපති ට්‍රම්ප් ධවල මන්දිරයේ ඉදිකෙරෙමින් පවතින නව උත්සව ශාලාවේ කටයුතු පිළිබඳව සිය පූර්ණ අවධානය යොමු කරමින් සිටීම විශේෂත්වයකි. එහි අවසන් වානේ කණුව එසවීමේ අවස්ථාවට මාධ්‍යවේදීන් සහ ඉදිකිරීම්කරුවන් කැඳවූ ඔහු, විනාඩි 25කට වැඩි කාලයක් එහි අනාගත සැලසුම්, කිරිගරුඬ බිම්, දැවැන්ත විදුලි පහන් සහ කොරින්තියන් කුළුණු ආදිය පිළිබඳව දීර්ඝ විස්තරයක් කළ අතර, තම දේශනයේදී මැතිවරණ ප්‍රතිඵලය පිළිබඳව කිසිදු සඳහනක් කළේ නැත.
උප ජනාධිපතිවරයාගේ ප්‍රකාශය සම්බන්ධයෙන් මාධ්‍යවේදීන් නැගූ ප්‍රශ්නයකට පිළිතුරු දෙමින් ට්‍රම්ප් කියා සිටියේ, යුද්ධය හේතුවෙන් කෙටිකාලීනව ඉන්ධන මිල ඉහළ ගිය බැවින් එම චෝදනාව තරමක් දුරට සත්‍ය විය හැකි බවයි. එහෙත් දිගුකාලීනව බලන කල ඉරානයට න්‍යෂ්ටික යුද්ධයකට යාමට ඉඩ දිය නොහැකි බැවින්, නැවත වරක් තීරණයක් ගැනීමට සිදුවුවහොත් තමන් එම පියවරම ගන්නා බව ඔහු අවධාරණය කළේය. එසේම තමන් මැතිවරණයට තරග කළේ නම් අනිවාර්යයෙන්ම ජයග්‍රහණය කරන බවත්, රැස්වීම්වලදී දක්නට ලැබුණු ජනතා සහයෝගය අපේක්ෂකයින් වෙත ලබා දීමට නොහැකි වීම පරාජයට හේතු වූ බවත් ඔහු වැඩිදුරටත් පැවසීය.
ඩිමොක්‍රටික් පක්ෂය විසින් කොංග්‍රසයේ බලය අත්පත් කර ගැනීමත් සමඟ, අනවසර මිලිටරි ගැටුම් ඇති කිරීම සම්බන්ධයෙන් යුධ ලේකම් පීට් හෙග්සෙත්ට එරෙහිව දෝෂාභියෝගයක් ගෙන ඒමට ඔවුන් සූදානම් වන බව වාර්තා වේ. එහෙත් හෙග්සෙත් බිල්ලට දීමේ සූදානමක් නොමැති බව ට්‍රම්ප් ප්‍රතික්ෂේප කළේය. නව ඩිමොක්‍රටික් කොංග්‍රසය සමඟ සුහදව කටයුතු කිරීමට තමන් බලාපොරොත්තු වන බව පැවසූ ජනාධිපතිවරයා, ඔවුන් විනාශකාරී ලෙස හැසිරෙන්නේ නම් ඊට එරෙහිව තම ජනාධිපති නිෂේධ බලය භාවිතා කරන බවට ද අනතුරු ඇඟවීය.
මැතිවරණ පරාජයත් සමඟ රිපබ්ලිකන් පක්ෂයේ බොහෝ පිරිසක් ට්‍රම්ප්ගේ නායකත්වය, ඉරාන යුද්ධය, දැඩි තීරුබදු ප්‍රතිපත්ති සහ ආර්ථික දුෂ්කරතා දැඩි ලෙස විවේචනය කිරීමට පටන් ගෙන තිබේ. හිටපු රිපබ්ලිකන් කොංග්‍රස් මන්ත්‍රී ජේසන් විලාල්බා ප්‍රකාශ කර ඇත්තේ, මෙම ප්‍රතිඵලය ඇමෙරිකානු දේශපාලනයේ දැවැන්ත පෙරළියක් සලකුණු කරන බවත්, එය ට්‍රම්ප්, ඔහුගේ දේශපාලන ක්‍රමය සහ 'MAGA' ව්‍යාපාරය සම්පූර්ණයෙන්ම ප්‍රතික්ෂේප කිරීමක් බවත්ය.