ලෝකයේ මිල අධිකම සිගරට් අලෙවි කරන රට බවට ශ්‍රී ලංකාව පත්ව තිබේ. ඒ, පුද්ගලයකුගේ ක්‍රය ශක්තිය පදනම් කර ගනිමින් ඔක්ස්ෆර්ඩ් ඉකොනොමික්ස් ආයතනය විසින් සිදු කරන ලද නවතම අධ්‍යයනයකට අනුවය.
ලෝක සෞඛ්‍ය සංවිධානයේ දත්ත උපුටා දක්වමින් සිදු කර ඇති මෙම පර්යේෂණය, දුම්පානය අවම කිරීම සඳහා ලෝක සෞඛ්‍ය සංවිධානය හඳුන්වා දී ඇති ගෝලීය දුම්කොළ බදු ප්‍රතිශත මිණුම් ලකුණෙහි සැබෑ ඵලදායීතාව දැඩි ලෙස ප්‍රශ්න කිරීමට ලක් කර ඇත.සිගරට්ටුවක මිලෙන් සියයට 75ක අගයක් බදු ලෙස අය කිරීම ලෝක සෞඛ්‍ය සංවිධානයේ ගෝලීය මිණුම් ලකුණයි. එහෙත්, හුදෙක් මෙම නිශ්චිත බදු ප්‍රතිශතය අත්පත් කර ගැනීමෙන් පමණක් දුම්පානය කරන පිරිස ස්වයංක්‍රීයව අඩුවීමක් සිදු නොවන බව ඔක්ස්ෆර්ඩ් ඉකොනොමික්ස් වාර්තාව පෙන්වා දෙයි. ඔවුන් පවසන්නේ ගෝලීය ඉලක්කයක් පසුපස හඹා යනවාට වඩා, විවිධ රටවල් අතර පවතින දැවැන්ත ආර්ථික වෙනස්කම් සහ එම රටවල පවතින සැබෑ ආර්ථික යථාර්ථයන් කෙරෙහි අවධානය යොමු කරමින් දුම්කොළ බදු ප්‍රතිපත්ති සකස් කළ යුතු බවයි.
පර්යේෂණ දත්ත මඟින් අනාවරණය වී ඇති වඩාත් තීරණාත්මක කරුණ වන්නේ, සිගරට් සිල්ලර මිලෙහි අන්තර්ගත බදු අනුපාතය සහ රටක සමස්ත දුම්පාන අනුපාතය අතර කිසිදු අර්ථවත් සම්බන්ධතාවක් නොමැති බවයි. ඉහළ බදු ප්‍රතිශතයක් පනවා ඇති පමණින් එම රටවල් අඩු දුම්පාන මට්ටම් වාර්තා කර නොමැත. ඒ අනුව, දුම්කොළ පාලනයේ සාර්ථකත්වය මැන බැලීමට හෝ බදු උපායමාර්ග සැලසුම් කිරීමට තනි ගෝලීය මිණුම් ලකුණක් භාවිත කිරීම කෙතරම් දුරට ඵලදායීද යන්න පිළිබඳව මෙම සොයාගැනීම් හරහා බරපතළ ගැටලුවක් මතු කර තිබේ.
දුම්කොළ පාලන ක්‍රියාවලිය සාර්ථක කර ගැනීම සඳහා හුදෙක් බදු ඉලක්ක මත පමණක් යැපීමේ ඇති දුර්වලතාව සම්බන්ධයෙන් ජාත්‍යන්තර සංවිධාන මීට පෙරද අවධානය යොමු කර ඇත. සිල්ලර මිලෙහි බදු ප්‍රතිශතය මත පමණක් රඳා පැවතීම දුම්කොළ ඉල්ලුම මැඩපැවැත්වීමට ප්‍රමාණවත් නොවන බව ලෝක සෞඛ්‍ය සංවිධානයේම ලේඛනයක් මඟින් ද පිළිගෙන ඇති බව මෙම වාර්තාව මඟින් සිහිපත් කර දෙයි.
දුම්කොළ පාලනය සඳහා බදුකරණය යනු අතිශය වැදගත් මෙවලමක් බව පර්යේෂකයෝ පිළිගනිති. එහෙත්, දුම්කොළ බදුකරණ උපායමාර්ග ඇගයීමට ලක් කළ යුත්තේ ජාතික ආර්ථික තත්ත්වයන්, පාරිභෝගිකයන්ගේ ක්‍රය ශක්තිය සහ දුම්පානය ව්‍යාප්ත වී ඇති ආකාරය යන සාධක ද සැලකිල්ලට ගනිමිනි. යම් රටක් දුම්කොළ පාලනය සම්බන්ධයෙන් ලබා ඇති ප්‍රගතිය, සිගරට්ටුවේ සිල්ලර මිලෙන් බදු සඳහා වෙන්වන ප්‍රතිශතය මත පමණක් කිසිසේත්ම මැන නොබැලිය යුතු බව මෙම නවතම තක්සේරුව අවධාරණය කරයි.