ක්‍රිකට් පිටියේදීත් ඉන් පිටතදීත් සිය සන්සුන් සහ විනීත හැසිරීම හේතුවෙන් ලෝකයේම ගෞරවයට පාත්‍ර වූ හිටපු ශ්‍රී ලංකා ක්‍රිකට් නායක කුමාර් සංගක්කාරට අයර්ලන්තයේ ඩබ්ලින් ගුවන් තොටුපළේදී අනපේක්ෂිත මෙන්ම කම්පන සහගත අත්දැකීමකට මුහුණ දීමට සිදුව තිබේ. ඒ, සුප්‍රකට රයන්එයාර් (Ryanair) ගුවන් සේවයේ නිලධාරීන්ගෙන් එල්ල වූ බව කියන ජාතිවාදී සහ වෙනස් කොට සැලකීමේ සිදුවීමක් හේතුවෙනි.
සිය 49 වැනි උපන්දිනය සැමරීමෙන් පසුවනම, එනම් 2026 ඔක්තෝබර් 28 වැනිදා, සංගක්කාර සිය බිරිඳ යෙහාලි සහ 2009 වසරේ උපන් නිවුන් දරුවන් වන කවිත් සහ ස්වයිරී සමඟ ඩබ්ලින් සිට බ්‍රිස්ටල් බලා යාමට පැමිණ සිටියදී මෙම සිදුවීම වාර්තා විය. මේ වන විට එක්සත් රාජධානියේ ඩෝසෙට් හි පදිංචිව සිටින ඔහු, රාජස්ථාන් රෝයල්ස් කණ්ඩායමේ ක්‍රිකට් අධ්‍යක්ෂ මෙන්ම ප්‍රධාන පුහුණුකරු ලෙසද, ස්කයි ස්පෝර්ට්ස් විස්තර විචාරකයෙකු ලෙසද කටයුතු කරන අතර, 2019 සිට 2021 දක්වා සමයේ එම්.සී.සී. (MCC) සභාපතිවරයා ලෙසද කටයුතු කළේය.
සිදුවීම සම්බන්ධයෙන් සිය නිල X ගිණුමේ සටහනක් තබමින් ඔහු මුලින්ම ප්‍රකාශ කළේ, රයන්එයාර් ගුවන් තොටුපළ දොරටු නිලධාරීන්ගේ හැසිරීම කම්පනය දනවනසුලු වූ බවත්, ඔවුන්ගේ කතා විලාසය, ක්‍රියාපටිපාටි හැසිරවීම සහ තර්ජනාත්මක ස්වභාවය කිසිදු මගියෙකුට අනුමත කළ නොහැකි බවත්ය. එය ඩබ්ලින්හිදී තමන් මුහුණ දුන් පළමු නරක අත්දැකීම බවද ඔහු සඳහන් කළේය. ඉන් නොනැවතී, පසුගිය 29 වැනිදා ඊට තවත් පැහැදිලි කිරීමක් එක් කරමින් ඔහු කියා සිටියේ, "ඔබ වැනි පාස්පෝට් (විදේශ ගමන් බලපත්‍ර) ඇති පුද්ගලයින් මෙවැනි සැලකිලි බලාපොරොත්තු විය යුතුයි" යනුවෙන් ගුවන් තොටුපළ නිලධාරීන් ඔවුන්ට පැවසූ බවයි. එම පිළිකුල් සහගත ප්‍රකාශයට එරෙහිව තර්ක කළහොත්, සෙසු මගීන්ට තර්ජනයක් ලෙස සලකා ගුවන් යානයට ඇතුළු වීම වළක්වන බවටද ඔවුන් තර්ජනය කළ බව සංගක්කාර චෝදනා කරයි. මෙය සැමට සමානව සැලකීමක් නොවන බවත්, එය පැහැදිලිවම ජාතිවාදයක් බවත් ඔහු අවධාරණය කළේය.
කෙසේ වෙතත්, මෙම සිදුවීම සම්බන්ධයෙන් රයන්එයාර් ගුවන් සේවය නිකුත් කළ ප්‍රකාශයෙන් කියවෙන්නේ වෙනත් කතාවකි. ඔවුන් පවසන්නේ, අනිවාර්ය ආගමන විගමන පරීක්ෂාවන් සිදු කරන ගුවන් තොටුපළ නිලධාරියෙකු විසින් වීසා ලියකියවිලි ඉල්ලා සිටි අවස්ථාවේදී සංගක්කාර ඒවා ලබා දීම ප්‍රතික්ෂේප කළ බවයි. නමුත් අදාළ පරීක්ෂාවන් සම්පූර්ණ කර ඔහුගේ ගමන් කිරීමේ සුදුසුකම් තහවුරු කරගැනීමෙන් අනතුරුව, එදිනම නියමිත ඩබ්ලින්-බ්‍රිස්ටල් ගුවන් යානයට ගොඩවීමට ඔහුට අවස්ථාව හිමි වූ බව ගුවන් සේවය සඳහන් කරයි.
අයර්ලන්තය සහ එක්සත් රාජධානිය අතර පොදු සංචාරක කලාපයක් (CTA) පැවතුණද, ශ්‍රී ලාංකික විදේශ ගමන් බලපත්‍ර හිමියන් වැනි බ්‍රිතාන්‍ය හෝ අයර්ලන්ත නොවන පුරවැසියන් අනිවාර්යයෙන්ම ගුවන් තොටුපළේදී ලියකියවිලි පරීක්ෂාවන්ට ලක් කෙරේ. විශේෂයෙන්ම අඩු වියදම් ගුවන් සේවාවල දොරටු අසලදීම මෙම පරීක්ෂාවන් සිදු කිරීම සාමාන්‍ය ක්‍රියාපටිපාටියකි. කෙසේ වෙතත්, සංගක්කාරගේ වීසා හෝ නේවාසික තත්ත්වය පිළිබඳව ඔහු ප්‍රසිද්ධියේ කරුණු දක්වා නොමැති අතර, මෙම සිදුවීමට අදාළ කිසිදු සීසීටීවී හෝ වෙනත් සාක්ෂියක් මෙතෙක් ප්‍රසිද්ධියට පත්වී නොමැත.
සංගක්කාරගේ මෙම X සටහනට මේ වන විට මිලියන 3.95කට ආසන්න නැරඹුම් වාර ප්‍රමාණයක් ද, 27,000කට අධික ලයික් ප්‍රමාණයක් ද, ප්‍රතිචාර 1,100කට ආසන්න ප්‍රමාණයක් ද ලැබී ඇත. ප්‍රකට බ්‍රිතාන්‍ය මාධ්‍යවේදී පියර්ස් මෝගන් මෙම සටහන උපුටා දක්වමින් ප්‍රකාශ කළේ, "කුමාර් වැනි අතිශය විනීත, ගෞරවනීය මිනිසෙකු මා දැක ඇත්තේ කලාතුරකින්. ඔහු මෙවැනි ප්‍රකාශයක් කරන්නේ නම්, එහි සැබැවින්ම ලැජ්ජා සහගත හැසිරීමක් සිදුව තිබිය යුතුයි. රයන්එයාර් ගුවන් සේවය මේ පිළිබඳව වහාම සහ නිසි පරිදි කටයුතු කරනු ඇතැයි මා විශ්වාස කරනවා" යනුවෙනි. එසේම, දශක ගණනාවක් බටහිර රටවල ජීවත් වෙමින් තමන් මුහුණ දුන් වෙනස් කොට සැලකීමේ අත්දැකීම් බෙදාගනිමින්, අත්‍යවශ්‍ය නම් පමණක් මින් ඉදිරියට තමන් බටහිර රටවලට යන බවට ශ්‍රී ලාංකික සංජීව වීරවර්ණ කළ ප්‍රකාශයකට ප්‍රතිචාර දක්වමින් සංගක්කාර පැවසුවේ, "එය අත්විඳීමට සිදුවීම ඉතා කම්පන සහගතයි" යනුවෙනි.
ලොව පුරා විසිරී සිටින ක්‍රිකට් ලෝලීන් සහ ශ්‍රී ලාංකිකයින්, සාමාන්‍යයෙන් ඉතා සන්සුන් චරිතයක් වන සංගක්කාරගේ මෙම චෝදනාව දැඩිව විශ්වාස කරමින් ඔහුට සිය සහාය පළ කර ඇත. එහෙත්, ඇතැම් යුරෝපීය සහ අයර්ලන්ත අදහස් දක්වන්නන් පෙන්වා දෙන්නේ, අඩු වියදම් ගුවන් සේවාවල නිලධාරීන් සියලුම විදේශිකයින්ට එක හා සමාන නීතිරීති ක්‍රියාත්මක කරන බවත්, පුද්ගලයෙකුගේ සමාජ තත්ත්වය මත ඊට විශේෂ වරප්‍රසාද හිමි නොවන බවත්ය. නීතිය සැමට සමානව ක්‍රියාත්මක කිරීම වෙනස් කොට සැලකීමක් නොවන බව ඔවුන් තර්ක කරද්දී, සම්භාවනීය ක්‍රීඩාවක නිරත වූ ලෝකපූජිත චරිතයක් පවා සාමාන්‍ය ගුවන් තොටුපළකදී මුහුණ දුන් මෙම සිදුවීම සමාජ මාධ්‍ය තුළ තවදුරටත් උණුසුම් සංවාදයක් නිර්මාණය කර තිබේ.
