කෙටි කලකින් විශාල ධනයක් ඉපයීමේ සිහිනය පෙන්වමින් ටෙලිග්‍රෑම් යෙදුම හරහා ක්‍රියාත්මක වූ මහා පරිමාණ අන්තර්ජාල මූල්‍ය වංචාවකට සම්බන්ධ 26 හැවිරිදි තරුණයෙකු ඔක්තෝබර් 20 වැනිදා නීතියේ රැහැනට කොටු කර ගැනීමට ආරක්ෂක අංශ සමත් වී තිබේ.
සූරියවැව ප්‍රදේශයේ පදිංචිකරුවෙකු වන මෙම සැකකරු අත්අඩංගුවට ගෙන ඇත්තේ පරිගණක අපරාධ විමර්ශන අංශයේ වයඹ පළාත් ඒකකය මඟිනි. ටෙලිග්‍රෑම් වේදිකාව ඔස්සේ විවිධ පුද්ගලයින් වෙත සමීප වෙමින්, අන්තර්ජාල ව්‍යාපාර හරහා ඉතා කෙටි කාලයක් තුළ විශාල ලාභයක් ලබාගත හැකි බවට ව්‍යාජ විශ්වාසයක් ගොඩනඟා මෙම සංවිධානාත්මක ජාවාරම දියත් කර ඇති බව පොලිස් විමර්ශනවලින් අනාවරණය වී ඇත.
ලැබී ඇති පැමිණිල්ලකට අනුව සිදුකරන ලද මූලික විමර්ශනවලදී මෙම ජාවාරමේ මූල්‍ය වටිනාකම රුපියල් 1,357,220ක් ලෙස දැක්වෙන අතර මෙම මූල්‍ය වංචාවෙන් රුපියල් 151,000ක මුදලක් සැකකරු විසින් ඉතා සූක්ෂම ලෙස සිය පෞද්ගලික බැංකු ගිණුමට බැර කරවාගෙන ඇති බව මේ වන විට තහවුරු වී ඇත.
මෙම මූල්‍ය අක්‍රමිකතාවට සෘජුවම සම්බන්ධ වීම සහ ඊට ආධාර අනුබල දීම යන චෝදනා යටතේ සැකකරු මේ ආකාරයෙන් අත්අඩංගුවට ගෙන ඇත. මෙම සංවිධානාත්මක ජාවාරමට සම්බන්ධ සෙසු පාර්ශ්වයන් සහ ඔවුන්ගේ ජාලගත සබඳතා හෙළිදරව් කරගැනීම සඳහා පරිගණක අපරාධ විමර්ශන අංශයේ වයඹ පළාත් ඒකකය විසින් ඉදිරි නීතිමය සහ තාක්ෂණික පරීක්ෂණ මේ වන විටත් තීව්‍ර කර තිබේ.
ඩිජිටල් තාක්ෂණය අවභාවිත කරමින් සමාජ මාධ්‍ය ඔස්සේ සිදුකෙරෙන මෙවැනි සූක්ෂ්ම මූල්‍ය වංචාවන් වර්තමානයේ සීඝ්‍රයෙන් ඉහළ යමින් පවතින බව බලධාරීහු පෙන්වා දෙති. මේ හේතුවෙන්, අන්තර්ජාලය හරහා හඳුන්වා දෙන කිසිදු පදනමක් නොමැති අනාරක්ෂිත ආයෝජන අවස්ථා සහ සැක සහිත මූල්‍ය ගනුදෙනු පිළිබඳව දැඩි අවධානයෙන් හා විමසිලිමත්ව කටයුතු කරන ලෙස ආරක්ෂක අංශ මහජනතාවගෙන් වැඩිදුරටත් ඉල්ලා සිටියි.