පෞද්ගලික උත්සව ශාලාවක පැවැති ප්‍රිය සාදයක් අතරතුර ගීත ගායනා කිරීම සඳහා මයික්‍රෆෝනයක් ලබාගැනීමට යාමේදී ඇති වූ ආරවුලක් දුරදිග යාමෙන් පුද්ගලයෙකුට පහර දී රුපියල් ලක්ෂ අටක පමණ දේපළවලට හානි කළ කාන්තාවන් තිදෙනෙකු ඇතුළු සිව් දෙනෙකු රත්නපුර පොලිසිය විසින් අත්අඩංගුවට ගෙන තිබේ.
පොලිසිය පවසන ආකාරයට මෙම සිදුවීම වාර්තා වී ඇත්තේ රත්නපුර ප්‍රදේශයේ පෞද්ගලික උත්සව ශාලාවක පැවැති සාදයක් අතරතුරදීය. එහිදී ගීතයක් ගායනා කිරීම සඳහා මයික්‍රෆෝනය ඉල්ලා සිටීමේදී ඇති වූ බහින්බස්වීමක් එකවරම ගැටුමක් දක්වා වර්ධනය වී ඇත. එහිදී උත්සවයේ සිටි පුද්ගලයෙකුට අතින් පයින් පහර දී තුවාල සිදුකර ඇති අතර, ඊට අමතරව උත්සව ශාලාවේ තිබූ රුපියල් අට ලක්ෂයක පමණ වටිනාකමකින් යුත් දේපළවලට ද දැඩි අලාභහානි සිදුකර තිබේ.
මෙම සිද්ධියට අදාළව අත්අඩංගුවට ගත් සැකකාරියන් තිදෙනා රත්නපුර බණ්ඩාරනායක මාවතේ පවත්වාගෙන යන සම්බාහන මධ්‍යස්ථානයක සිටින විවාහක කාන්තාවන් බව පොලිසිය අනාවරණය කරගෙන ඇත. අවුරුදු 53, 32 සහ 29 යන වයස්වල පසුවන ඔවුන් මුදලන්කුලිය, අම්පාර සහ අරණායක යන ප්‍රදේශවල පදිංචිකාරියන්ය. ඊට අමතරව මෙම සිද්ධිය සම්බන්ධයෙන් අත්අඩංගුවට ගත් අනෙක් සැකකරු අරණායක ප්‍රදේශයේ පදිංචි 34 හැවිරිදි විවාහක පුද්ගලයෙකි.
සිද්ධිය සම්බන්ධයෙන් ලැබුණු පැමිණිල්ලකට අනුව වහාම ක්‍රියාත්මක වූ රත්නපුර පොලිසිය සැකකරුවන් අත්අඩංගුවට ගත් අතර ඔවුන් අධිකරණය වෙත ඉදිරිපත් කිරීමට නියමිතව ඇත. රත්නපුර මූලස්ථාන ප්‍රධාන පොලිස් පරීක්ෂක ප්‍රසන්න සුමනසිරි මහතාගේ උපදෙස් මත, අපරාධ අංශයේ පොලිස් පරීක්ෂක කොළඹගම, පොලිස් සැරයන්වරුන් වන වීරසේකර (38730), කොඩිතුවක්කු (40317), කුමාර (49744) සහ කාන්තා පොලිස් සැරයන් තරංගනී (3314) යන නිලධාරීන් විසින් මෙම අත්අඩංගුවට ගැනීම් සිදු කර තිබේ.
