විනෝදාස්වාද ක්ෂේත්‍රයේ විවිධ පාර්ශ්වකරුවන්ගෙන් පසුගිය සති කිහිපය පුරා එල්ල වූ චෝදනා, විවේචන සහ ඉදිරිපත් වූ කරුණු දැක්වීම් හමුවේ සියලුම බලපත්‍ර නිකුත් කිරීමේ කටයුතු තාවකාලිකව අත්හිටුවීමට ශ්‍රී ලංකා නිර්මාණකරුවන්ගේ සහ ප්‍රකාශකයන්ගේ සංගමය (ACPOSL) තීරණය කර තිබේ. 2026 ඔක්තෝබර් 12 වැනි දින විශේෂ මාධ්‍ය නිවේදනයක් නිකුත් කරමින් එම සංගමය (නිවේදනයේ ශ්‍රී ලංකා සංගීත නිර්මාණකරුවන්ගේ සහ සංගීත ප්‍රකාශකයන්ගේ සංගමය ලෙස ද හඳුන්වා ඇති) සිය කර්තෘභාග ගාස්තු ක්‍රමවේදය යළි සමාලෝචනය කරන බව නිවේදනය කළේය.
2003 අංක 36 දරන බුද්ධිමය දේපළ පනත යටතේ සාමූහික කළමනාකරණ ආයතනයක් ලෙස ලියාපදිංචි වී ඇති කොළඹ 02, ශ්‍රී ජේම්ස් පීරිස් මාවතේ අංක 115 දරන ස්ථානයේ පිහිටි මෙම සංගමයේ අධ්‍යක්ෂ මණ්ඩලය මෙම තීරණයට එළඹ ඇත්තේ ක්ෂේත්‍රයේ පාර්ශ්වකරුවන්ගෙන් ලැබුණු ප්‍රතිචාර සුපරීක්ෂාකාරීව සලකා බැලීමෙන් අනතුරුවය. ඒ අනුව, 2026 නොවැම්බර් මාසයේ පැවැත්වීමට නියමිත සංගමයේ වාර්ෂික මහා සභා රැස්වීම (AGM) දක්වා සියලුම බලපත්‍රකරණ කටයුතු මෙලෙස තාවකාලිකව නතර කෙරෙනු ඇත.
මෙම තත්ත්වය හේතුවෙන් ජනතාවට හෝ ක්ෂේත්‍රයේ පාර්ශ්වකරුවන්ට යම් අපහසුතාවක් සිදු වූයේ නම් ඒ පිළිබඳව සිය කනගාටුව පළ කරන ACPOSL සංගමය, පැවති මාධ්‍ය හමු අතරතුර සිදු වූ යම්කිසි ප්‍රකාශයක් මගින් කිසියම් හෝ පාර්ශ්වකරුවකු වෙත නොදැනුවත්ව සිත් රිදවීමක් හෝ අපහසුතාවක් සිදු වී නම් ඒ පිළිබඳව ද සිය කණස්සල්ල පළ කර සිටී.
කෙසේ වෙතත්, මෙම තාවකාලික අත්හිටුවීම මගින් ACPOSL සතු දැනට පවතින අයිතිවාසිකම්, නෛතික ප්‍රතිකර්ම හෝ නෛතික ස්ථාවරත්වයට කිසිදු බලපෑමක් හෝ අගතියක් සිදු නොවන බව සංගමය අවධාරණය කරයි. තම මුලපිරීමේ මූලික අභිප්‍රාය වූයේ සමස්ත විනෝදාස්වාද ක්ෂේත්‍රයේ අඛණ්ඩ වර්ධනයට සහාය වී එයට ශක්තියක් වන අතරම, නිර්මාණකරුවන්, කතුවරුන් සහ ප්‍රකාශකයන් වෙනුවෙන් වඩාත් සාධාරණ, විනිවිදභාවයෙන් යුතු සහ තිරසර පද්ධතියක් ගොඩනැගීමට දායක වීම බවත්, එම කැපවීම නොවෙනස්ව පවතින බවත් සංගමය පෙන්වා දෙයි.
මතු වී ඇති ගැටලු කෙරෙහි මනා අවධානයක් යොමු කරමින්, යෝජිත බලපත්‍ර රාමුව සහ ඊට අදාළ බලපත්‍ර ගාස්තු සමාලෝචනය කර යළි සකස් කිරීම සඳහා ක්ෂේත්‍රයේ නියෝජිතයන් හා පාර්ශ්වකරුවන් සමඟ විධිමත් සාකච්ඡා මාලාවක් ආරම්භ කිරීමට ද ACPOSL පියවර ගෙන ඇත. පූර්ණ විවෘතභාවයකින් යුතුව මෙම ක්‍රියාවලියට එළඹීමටත්, අදාළ සියලු පාර්ශ්වකරුවන්ගේ අභිලාෂයන් හා යහපත සැලකිල්ලට ගන්නා නව නීතිමය රාමුවක් සහයෝගීත්වයෙන් යුතුව සම්පාදනය කිරීමටත් සංගමය බැඳී සිටින බව එම නිවේදනයේ දැක්වේ.
එම සාකච්ඡාවලින් අනතුරුව සකස් කෙරෙන සංශෝධිත රාමුව, එළඹෙන නොවැම්බර් මස පැවැත්වෙන වාර්ෂික මහා සභා රැස්වීමේදී සලකා බැලීම සහ අනුමැතිය ලබා ගැනීම සඳහා ACPOSL සාමාජිකත්වය වෙත ඉදිරිපත් කිරීමට නියමිතය. අවශ්‍ය අනුමැතීන් සහ අදාළ නීතිමය ක්‍රියා පටිපාටීන්ට යටත්ව, එම සංශෝධිත රාමුව රජයේ ගැසට් පත්‍රයේ පළ කිරීමේ කටයුතු ඉදිරියට ගෙන යාමට සංගමය අපේක්ෂා කරයි.
විශ්වාසය ගොඩනැගෙන්නේ අන්‍යෝන්‍ය සංවාදය, විනිවිදභාවය සහ සවන්දීමට ඇති කැමැත්ත තුළින් බව තමන් විශ්වාස කරන බව ACPOSL පවසයි. ඒ අනුව, මතු වී ඇති ගැටලු නිරාකරණය කර මෙම මුලපිරීම පිළිබඳ විශ්වාසය යළි තහවුරු කිරීමට කටයුතු කරන අතරතුර, ශ්‍රී ලංකාවේ සමස්ත විනෝදාස්වාද ක්ෂේත්‍රයටම සාධාරණ, ප්‍රායෝගික මෙන්ම වාසිදායක වන අයුරින් මෙම වැඩපිළිවෙළ සාර්ථක කර ගැනීම සඳහා නිර්මාණකරුවන්, කතුවරුන්, ප්‍රකාශකයන්, සංගීතඥයන්, සංගීත පරිශීලකයන්, උත්සව සංවිධායකයන්, පරිශ්‍ර හා ස්ථාන හිමිකරුවන් ඇතුළු අනෙකුත් සියලුම පාර්ශ්වකරුවන්ගේ අඛණ්ඩ දායකත්වය සහ සහයෝගය ලබා දෙන ලෙස සංගමය ඉල්ලා සිටී. සිය අදහස් හා යෝජනා ඉදිරිපත් කළ සැමට ස්තුතිය පුද කරන ACPOSL සංගමය, ඉදිරියේදී ද සාමූහිකව කටයුතු කිරීමට බලාපොරොත්තු වන බව වැඩිදුරටත් ප්‍රකාශ කරයි.
