එයාර් බස් සහ ක්‍රිෂ් ගනුදෙනුවලින් අල්ලස් ගත් බවට එල්ල වී ඇති බරපතළ චෝදනා මධ්‍යයේ රක්ෂිත බන්ධනාගාරගතව සිටින පාර්ලිමේන්තු මන්ත්‍රී නාමල් රාජපක්ෂ, සිය සිරගතවීමේ පනස් වැනි දිනය සනිටුහන් කරමින් විශේෂ නිවේදනයක් නිකුත් කර තිබේ. කෙසේ වෙතත්, නීතිමය ක්‍රියාදාමයක් ඔස්සේ විභාග වෙමින් පවතින එම මූල්‍ය වංචා චෝදනා ගැන කිසිදු සඳහනක් නොකරන ඔහු, තමන් සිරගත කර ඇත්තේ 'මහින්ද රාජපක්ෂගේ ලොකු පුතා' වීම නිසා යැයි පවසමින් නිකුත් කර ඇති මෙම සංවේදී ලිපිය මේ වන විට සමාජයේ දැඩි උපහාසයට ද ලක්ව ඇත.
සිය බන්ධනාගාර ජීවිතයට දින 50ක් සපිරෙන බව පවසන මන්ත්‍රීවරයා, එය තම ජීවිතයෙන් අහිමි වූ කාලයක් නොව යළිත් ජීවිතය කියවා ගත් කාලයක් ලෙස අර්ථකථනය කරයි. තමාව සිරගත කර තැබීම යම් පිරිසකගේ පීඩනය හඳුනාගැනීමට හැකි කදිම නිදසුනක් බවද ඔහු සිය ලිපියෙන් පෙන්වා දෙයි.
වත්මන් පාලනයට අභියෝගයක් එල්ල කරන නාමල් රාජපක්ෂ පවසන්නේ, තමා සිරගත කිරීම තුළින් රටේ ජනතාවට සහන සැලසෙන්නේ නම් තමන් දින 50ක් නොව දින 500ක් වුවද සතුටින් සිරගෙදර සිටීමට සූදානම් බවයි. විදුලි බිල තුනෙන් දෙකකින් අඩු කිරීම, නැවෙන් ගෙන්වන මිලටම ඉන්ධන දීම, මාස හයෙන් හයට වැටුප් වැඩි කිරීම, ඇප හා පොලී රහිත බැංකු ණය දීම, රුපියල් ලක්ෂ 12ක් වැනි මිලකට 'විට්ස්' (Vitz) වාහන ලබාදීම, එක පෑන් පහරින් සහල් මිල අඩු කිරීම මෙන්ම සෞඛ්‍ය, අධ්‍යාපනය හා අත්‍යවශ්‍ය භාණ්ඩවල බදු මුළුමනින්ම ඉවත් කළ හැකි නම්, තමන් වටා ඇති සිර මැදිරියේ බිත්ති සහ යකඩ දොරටු තමන්ට විවෘත අහසක් බඳු වනු ඇතැයි ඔහු සඳහන් කර තිබේ.
සිය පියා වන හිටපු ජනාධිපති මහින්ද රාජපක්ෂව වර්ණනා කරන ඔහු, මෑතකදී මියගිය කාවන්තිස්ස හස්තියාගේ ඛේදවාචකය ද සිය දේශපාලන ප්‍රකාශයට ඈඳා ගනී. රටක මුල් පුරවැසියා භූමියේ සිටින සියලු ජීවීන්ගේ භාරකරු බවත්, තමන්ගේ පියා යටතේ එවැන්නක් සිදු නොවූ බවත් පවසන ඔහු, වත්මන් පාලනය යටතේ රටේ බුදු දහමට සහ සංස්කෘතියට එල්ල වන ප්‍රහාරයන් දැඩිව විවේචනය කරයි.
භාණ්ඩාගාරය පිරී ඇතැයි පැවසුවද ජනතාවට කිසිදු සහනයක් නොලැබෙන, ආයෝජන අහිමි වූ රටක බරපතළ ප්‍රශ්න වසා ගැනීමට එක් පවුලක් පසුපස සැඟවීම පාලකයන්ගේ නොහැකියාව බව මන්ත්‍රීවරයාගේ චෝදනාවයි. එයාර් බස් හා ක්‍රිෂ් ගනුදෙනුවල ප්‍රධාන සැකකරුවෙකු ලෙස විමර්ශනවලට මුහුණ දෙමින් සිටියද, ඉදිරි දිනෙක අධිකරණයෙන් තමන් නිදොස් කොට නිදහස් වනු ඇතැයි ඔහු සිය නිවේදනය හරහා විශ්වාසය පළ කර තිබේ.
"ඔබට මා සිරගත කළ හැකි වුවත්, අප කඳවුරේ ජනතා අභිලාෂය සිරගත කළ නොහැකි" බව පවසමින් ඔහු සිය ලිපිය නිමා කරයි. කෙසේ නමුත්, තමන්ට එල්ල වී ඇති සෘජු අල්ලස් චෝදනා මඟහරිමින්, සිය නීතිමය ගැටලුව හුදෙක් දේශපාලනික පළිගැනීමක් ලෙස පමණක් හුවා දැක්වීමට නාමල් රාජපක්ෂ දරන මෙම උත්සාහය දේශපාලන කරළියේ උණුසුම් මාතෘකාවක් බවට පත්ව ඇත.