කැමරා කාච සහ මාධ්‍ය අවධානයෙන් සැඟවී, නිහඬව ගොඩනඟා ගත් ආදරයක ප්‍රතිඵලයක් ලෙස පුංචි තිරයේ ජනප්‍රිය තරු යුවළක් වන දුශේනි මියුරංගි සහ චතුරංග කොඩිතුවක්කු ඊයේ (05) බොල්ගොඩදී පැවති සරල උත්සවයකින් විවාහ දිවියට පිවිසුණා. ඔවුන්ගේ මෙම හදිසි විවාහය බොහෝ දෙනෙකු පුදුමයට පත් කළේ, විවාහක යුවළක් ලෙස එළියට පැමිණෙන තුරුම සිය ආදර කතාව බාහිර ලෝකයෙන් සඟවාගෙන සිටීමට ඔවුන් කටයුතු කර තිබූ නිසාවෙනි.
දුෂේනි ඉමේකා මියුරංගි ද සිල්වාගේ උපන් දිනය 1995 ජුනි 20 මාතර උපන් ඇය කුරුණෑගල හැදී වැඩී ඇති අතර බාල සහෝදරයෙකු සිටින බව සඳහන් වෙනවා. ඇය මිස් වර්ල්ඩ් තරගාවලියට ලංකාව නියෝජනය කළ 2017 මිස් ශ්‍රී ලංකා වර්ල්ඩ් ජයග්‍රාහිකාවයි. සිංහල, ඉංග්‍රීසි, හින්දි භාෂා දන්නා ඇය. ගිණුම්කරණ / CIMA පාඨමාලාවක් කර තිබෙන බවද කියැවේ. නමුත් ප්‍රේමය ගැන අමුතු අත්දැකීම් රැසකි.මෙම සාමකාමී කඩඉමට පැමිණීමට පෙර දුශේනිගේ ජීවිතය තුළ මාධ්‍යයේ දැඩි අවධානයට ලක් වූ ප්‍රධාන පෙම් සබඳතා දෙකක් තිබුණා. අතීත සබඳතා බිඳවැටුණු පසු ඒවාට ලැබුණු ප්‍රසිද්ධිය සිය මානසිකත්වයට අහිතකර වූ බව ඇයම පවසා තිබුණා. චතුරංග සමඟ වන සම්බන්ධය රහසිගතව තබා ගැනීමට එය ප්‍රධාන හේතුවක් වුණා.
ඇගේ පළමු ප්‍රසිද්ධ සම්බන්ධතාවය ගෙතී තිබුණේ නළු සහ නිරූපණ ශිල්පී අනුජ් රණසිංහ සමඟයි. 2017 මැද භාගයේ හිරු කොපි චැට් සහ හිරු මෙගා ස්ටාර් වැඩසටහන්වලින් එකට දැකගත හැකි වූ මෙම නවක තරු යුවළ සැබෑ ජීවිතයේත් පෙම්වතුන් බවට එකල මාධ්‍ය වාර්තා කළා. 2017 සැප්තැම්බරයේ දුශේනි සියත මිස් වර්ල්ඩ් ශ්‍රී ලංකා කිරුළ දිනාගන්නා අවස්ථාවට අනුජ්ද සහභාගී වී සිටි අතර, එම වසරේ ඔක්තෝබර් 04 වැනිදා පැවති මාධ්‍ය හමුවකදී දුශේනි කියා සිටියේ අනුජ් සිය හොඳම මිතුරා බවත්, මිස්ටර් ශ්‍රී ලංකා තරගයෙන් සහ ජාත්‍යන්තරයෙන් ඔහු ලැබූ අත්දැකීම් තමන්ට බෙහෙවින් උපකාරී වූ බවත්ය. කෙසේ වෙතත්, 2020 මාර්තු පමණ වන විට දැනගන්නට ලැබුනේ මෙම සම්බන්ධය අවසන් වී ඇති බවත් අනුජ් ගුවන් සේවිකාවක් සමඟ නව සබඳතාවක් අරඹා ඇති බවත්ය.
මේ අතරතුර දුශේනි කලා ක්ෂේත්‍රයෙන් තරමක් දුරස් වුණා. අනුජ්ගෙන් වෙන්වීමේ මානසික කම්පනය මීට හේතු වූ බවට ගොසිප් පැතිර ගියත්, 2025 අප්‍රේල් මස පළවූ වාර්තාවලට අනුව දුශේනිම තහවුරු කර තිබුණේ තමන් නිහඬ වූයේ අයහපත් සෞඛ්‍ය තත්ත්වයක් නිසා බවයි. පසුව ඉන්දියාවට ගොස් නිරූපිකාවක් ලෙස කටයුතු කළ ඇය, කොරෝනා වසංගතයත් සමඟ යළි ලංකාවට පැමිණියා. 2021 වසරේ "පාර දිගේ" ටෙලිනාට්‍යය ඇගේ ජනප්‍රියත්වයේ සුවිශේෂී හැරවුම් ලක්ෂ්‍යයක් වුණා. මේ වන විට නවසීලන්තයේ ඔක්ලන්ඩ් නුවර ජීවත් වන අනුජ් තවම ක්ෂෙත්‍රයට සම්බන්ධයක් තබා සිටින කෙනෙක්. 2025 ජනවාරියේ තිරගත වූ "රෝස ආදරේ" චිත්‍රපටයේ කතා සංකල්පයද ඔහුගේයි.
ඉන්පසු දුශේනිගේ ජීවිතයේ වඩාත්ම ප්‍රසිද්ධ සම්බන්ධතාවය නිර්මාණය වූයේ නළු සචින් ලියනගේ සමඟයි. 2023 වසරේ "සංසාරිණී" ටෙලිනාට්‍යයේ රඟපාද්දී ඔවුන් දෙදෙනා සමීප වී තිබුණා. 2024 මාර්තු 30 වැනිදා රයිගම් ටෙලීස් සම්මාන උළෙලේදී වසරේ ජනප්‍රියම නිළිය සම්මානය ලබමින් දුශේනි, සිය මවට සහ පියාට පසුව තමන්ව පෙළඹවූ සමීපතමයා ලෙස සචින්ව ප්‍රසිද්ධියේ නම් කළා. පසුව තරිඳු වෙල්හේන සමඟ කළ සාකච්ඡාවකදීද ඇය සචින් සිය ජීවිතයේ වටිනාම පුද්ගලයා බව යළිත් කියා සිටියා.
එහෙත් මේ ආදර කතාවටද බාධා මතු වුණා. 2025 මාර්තු මාසයේදී "මායාවී" ටෙලිනාට්‍යයේ අධ්‍යක්ෂ සඳුන් රාජකරුණා සිය කාර්ය මණ්ඩලයට දිගු නිවේදනයක් නිකුත් කරමින් කියා සිටියේ, රූගත කිරීම් අතරතුර නිළියක් සිය පෙම්වතා සමඟ දිගු වීඩියෝ ඇමතුම්වල රැඳී සිටීම නිසා ගැටුම් ඇති වූ බවත්, ඇය හදිසියේ දර්ශන තලයෙන් පිටව ගිය බැවින් ඇයව නිර්මාණයෙන් ඉවත් කිරීමට සිදු වූ බවත්ය. මෙහි සචින්ගේ නම සෘජුව සඳහන් නොවුණත්, මාධ්‍ය එය සචින් ලෙස හඳුනා ගත්තා. මේ සම්බන්ධයෙන් දුශේනිගේ පාර්ශවයෙන් කිසිදු ප්‍රතිචාරයක් පළ වී තිබුණේ නැහැ.
2025 දෙසැම්බර් අග භාගය වන විට ඔවුන්ගේ වෙන්වීම පිළිබඳව සමාජ මාධ්‍ය ඔස්සේ තහවුරු වුණා. වෙන්වීම සම්බන්ධයෙන් දුශේනි මාධ්‍යයට පවසා තිබුණේ, තමා ඔහු වෙනුවෙන් නොකළ දෙයක් නැති වුවත්, සැක කිරීම් සහ අසත්‍ය චෝදනා සීමාව ඉක්මවා ගිය බවයි. "ටොක්සික් ආදරයක් නොතේරෙන ආදරයක් ඉදිරියට යන්නේ නැහැ. මම දැන් තනියමයි. අපි කේන්ති වෙලා නැහැ. කතා කරලා වෙන් වුණා. ඒ නිසා මම දුකින් නැහැ," යනුවෙන් ඇය එහිදී පැවසුවා.
මේ අතර, 2026 ජනවාරි 25 පමණ සචින් කියා සිටියේ තමා දැන් තනිකඩව ජීවත් වන බවයි. "ආදරය සුන්දර වෙන්නෙ රවට්ටන්නෙ නැතුව අවංකව ආදරය කරනකොට. ගැළපෙනවා කියලා තේරුණාම එකතුවෙන එකත්, කාලයක් යද්දී නොගැළපෙනවා කියලා තේරුණාම වෙන්වෙන එකත් සාමාන්‍ය සංසිද්ධියක්. නොගැළපීම් තියාගෙන එකට ඉඳගෙන වේදනා විඳිනවට වඩා දෙපැත්තකට වෙන එක නිදහස්," යැයි දුශේනිගේ නම සෘජුව සඳහන් නොකරමින් ඔහු පවසා තිබුණා.
දුශේනිගේ ප්‍රකාශය තුළ සැකය සහ චෝදනා මතු වෙද්දී, සචින්ගේ පාර්ශවයෙන් අවංකභාවය සහ නොගැළපීම ගැන කියවුණා. අධික පාලනය, ඊර්ෂ්‍යාව, අපහාස කිරීම හෝ මානසිකව හානි කිරීම සාමාන්‍යයෙන් "ටොක්සික්" සම්බන්ධතාවයක ලක්ෂණ වුවත්, මෙම පාර්ශව දෙකේම ප්‍රකාශ ප්‍රසිද්ධියේ තිබුණද ඒ තුළ සැබැවින්ම සිදු වූ දේ ගැන ස්වාධීන සාක්ෂි නොමැත. එබැවින් කිසිදු පාර්ශවයකට "ටොක්සික්" ලේබලය ඇලවීමට කිසිවෙකුට අයිතියක් නැත. සැබැවින්ම, සම්බන්ධතා කිහිපයක් හරහා ගොස් තමන්ට වඩාත්ම ගැළපෙන සහකරුවා තෝරා ගැනීම "ටොක්සික්" හැසිරීමක් නොව, එය බොහෝ දෙනෙකුගේ ජීවිතවල සිදුවන සාමාන්‍ය ගමනකි.
දුශේනි සහ චතුරංග හමුවූයේ "ජහුටා" ටෙලිනාට්‍යයේ රූගත කිරීම් අතරතුරයි. විවාහයට පෙර ඇය චතුරංග ගැන සඳහන් කළේ ඔහු කලබල නොවන, ඉවසීමෙන් යුත් සාමකාමී පුද්ගලයෙකු ලෙසයි. "අපි දෙන්නා මුණගැහිලා ලොකු කාලයක් නෑ. එයාට මාව තේරෙනවා, මට එයාව තේරෙනවා කියන එක තේරුම් ගත්තා. ජීවිත කාලෙ ගත කරන්න ඒ සාමකාමී බව වැදගත්. මට දැනෙනවා මමත් හරි සාමකාමී වෙලා කියලා. ඒ කාලේ හිතපු විදියට නෙවෙයි මම දැන් හිතන්නෙ. අපි වයසත් එක්ක හැමදේම තේරුම් ගන්නවා," යනුවෙන් ඇය පැවසුවා. රංගන ද සිල්වා සමඟ කළ සාකච්ඡාවකදී ඇය වැඩිදුරටත් කියා සිටියේ, අවුරුදු ගණනක් මහන්සි වී වෘත්තීය ජීවිතයක් ගොඩනඟා ගත් කාන්තාවකට සහයෝගය නොදෙන සැමියෙකු ලැබුණහොත් ඒ සියල්ල අහිමි විය හැකි බවත්, චතුරංග ඇයව තේරුම් ගන්නා සහයෝගය දෙන සහකරුවෙකු බවත්ය.
එම සාමාන්‍ය ගමනේ අවසානය දුශේනි දැන් සනිටුහන් කර තිබෙනවා. දෙදෙනාටම වෙන වෙනම නිවාස තිබුණත්, විවාහයෙන් පසු එකම නිවසක ජීවත් වීමට ඔවුන් සැලසුම් කර තිබෙනවා. මවගේ ඉල්ලීම පරිදි කිරි උතුරවා, සම්ප්‍රදායානුකූලව චතුරංග ගෘහමූලිකයා ලෙසත් දුශේනි භාර්යාව ලෙසත් ඒ නිවසට පිවිසීමට නියමිතයි. ඊයේ පැවති උත්සවයෙන් පසු ඔවුන්ගේ දෙවන උත්සවය එළඹෙන ඔක්තෝබර් 12 වැනිදාට සැලසුම් කර තිබෙනවා.
සැක, චෝදනා සහ මාධ්‍ය කෝලාහල මැදින් ගෙවුණු අතීතයකට සමුදෙමින්, දුශේනි අවසානයේ ඝෝෂාකාරී ආදරයක් වෙනුවට නිහඬ, සාමකාමී ආදරයක් තෝරාගෙන තිබෙනවා. අලුත් බලාපොරොත්තු සමඟින් දිවියට පිවිසි මේ තරු යුවළගේ නව ගමන ආරම්භ වී අවසන්.
