හපුතලේ බ්ලැක්වුඩ් රාමක්‍රීෂ්ණ වත්තේ නිවසක් තුළදී 78 හැවිරිදි වියපත් කාන්තාවකගේ ගෙල සිරකර ඝාතනය කර, ඇය නාසයේ පැලඳ සිටි රන් කරාබු දෙකක් පැහැර ගැනීමේ කම්පනීය පුවතක් වාර්තා වෙයි. මෙම අපරාධය සම්බන්ධයෙන් ඇයගේ 38 හැවිරිදි ඥාති බෑණා සැකපිට අත්අඩංගුවට ගැනීම සඳහා හපුතලේ පොලිසිය මේ වන විට පුළුල් විමර්ශනයක් ආරම්භ කර තිබේ.
ඝාතනයට ලක්වූ කාන්තාව ජීවත් වී ඇත්තේ සැකකාර බෑණා සහ ඔහුගේ බිරිඳ ද සමග අදාළ නිවසේමය. පොලිස් විමර්ශනවලදී අනාවරණය වී ඇති තොරතුරු අනුව, සිද්ධිය වූ දින සැකකරු දැඩි ලෙස බීමත්ව නිවසට පැමිණ තම බිරිඳ සමග ආරවුලක් ඇති කරගෙන තිබේ. මෙම ගැටුම හමුවේ ඔහුගේ බිරිඳ සිය දරු දෙදෙනා ද කැටුව නිවසින් පිටව ගොස් විහාරගල ප්‍රදේශයේ පිහිටි ඇගේ පියාගේ නිවසට ගොස් ඇත.
පසුදින උදෑසන දරුවන් පාසල් යැවීමේ අරමුණින් බිරිඳ නැවතත් සිය නිවසට පැමිණ තිබේ. එහිදී ඇය නිදා සිටි සිය නැන්දාට කතා කර ඇති අතර, ඇගෙන් කිසිදු ප්‍රතිචාරයක් නොලැබුණු තැන පොරවනය ඉවත් කර බලා ඇත. ඒ මොහොතේදී නැන්දාගේ නාසයෙන් ලේ ගලමින් තිබෙනු ඇය දැක ඇති අතර, ඇය නාසයේ පැලඳ සිටි රන් කරාබු දෙක ද අතුරුදන්ව ඇති බව නිරීක්ෂණය කර තිබේ.
මේ සම්බන්ධයෙන් සැකකරුගේ බිරිඳ විසින් හපුතලේ පොලිසියට පැමිණිල්ලක් ඉදිරිපත් කර ඇත. සිය ඥාති නැන්දාගේ ඝාතනය තම සැමියා විසින්ම සිදු කරන්නට ඇති බවට තමා සැක කරන බවත්, මෙම සිද්ධියෙන් පසුව ඔහු නිවසින් අතුරුදන්ව ඇති බවත් ඇය පොලිසියට කළ පැමිණිල්ලේ වැඩිදුරටත් සඳහන් වේ.
මෙම මරණය සම්බන්ධයෙන් බණ්ඩාරවෙල මහේස්ත්‍රාත් අධිකරණයට කරුණු වාර්තා කිරීමෙන් අනතුරුව, මහේස්ත්‍රාත් නියෝගය මත මෘත දේහය පශ්චාත් මරණ පරීක්ෂණය සඳහා යොමු කෙරිණි. එම පශ්චාත් මරණ පරීක්ෂණ වාර්තාව මගින් තහවුරු වී ඇත්තේ කාන්තාවගේ ගෙල සිරකිරීමෙන් මෙම මරණය සිදු කර ඇති බවයි.
අතුරුදන්ව සිටින සැකකරු අත්අඩංගුවට ගැනීම සඳහා මේ වන විට විශේෂ පොලිස් කණ්ඩායමක් මෙහෙයුම් දියත් කර ඇත. බදුල්ල දිසාව භාර නියෝජ්‍ය පොලිස්පති ලක්සිරි විජේසේන සහ බණ්ඩාරවෙල දිස්ත්‍රික් පොලිස් අධිකාරි අයි.එම්.ඒ. උදයකුමාර යන මහත්වරුන්ගේ උපදෙස් මත, හපුතලේ පොලිස් ස්ථානාධිපති ප්‍රධාන පොලිස් පරීක්ෂක එම්.කේ. දිසානායකගේ මෙහෙයවීමෙන් ප්‍රධාන පොලිස් පරීක්ෂක ජයකොඩි, උප පොලිස් පරීක්ෂක ඉන්දික ඇතුළු පොලිස් සැරයන්වරුන් කිහිප දෙනෙකු සහ කොස්තාපල්වරයෙකුගෙන් සමන්විත නිලධාරීහු කණ්ඩායමක් වැඩිදුර විමර්ශන කටයුතු සිදු කරති.