දිවයිනේ ප්‍රදේශ දෙකකදී විනාඩි පහළොවක පමණ කාල පරතරයක් තුළ සිදුවූ දරුණු රිය අනතුරු දෙකකින් කාන්තාවන් දෙදෙනෙකු ද ඇතුළුව පුද්ගලයින් සිවු දෙනෙකුට සිය ජීවිත අහිමි වී තිබේ. පසුගිය 22 වැනිදා සවස් යාමයේ පුත්තලම, සාලියවැව සහ කොත්මලේ, කඩදොර ප්‍රදේශවලදී මෙම ඛේදවාචකයන් වාර්තා වූ අතර, ඉන් තවත් දහහතර දෙනෙකු තුවාල ලබා රෝහල්ගත කර ඇත.
පළමු මාරක අනතුර වාර්තා වන්නේ පුත්තලම - අනුරාධපුර ප්‍රධාන මාර්ගයේ සාලියවැව, පළුගස්සෙගම 19 කණුව ප්‍රදේශයෙනි. එදින සවස 5.45 ට පමණ කොළඹ සිට මන්නාරම දක්වා ධාවනය වෙමින් තිබූ සුඛෝපභෝගී මගී බස් රථයක් හදිසි අනතුරකට ලක්වීමෙන් මෙම විපත සිදුවිය. පාර හරහා ගිය සුනඛයෙකු බේරාගැනීමට රියදුරු උත්සාහ කිරීමේදී බස් රථය පාලනය කරගත නොහැකිව මාර්ගයේ දකුණු පස පිහිටි පාලමක ගැටී ඇත. ඉන් අනතුරුව මීටර් 75ක පමණ දුරක් ඉදිරියට ඇදී ගොස් ඇති බස් රථය, මාර්ගයේ ගමන් ගත් යතුරුපැදියක් ද යටකරගෙන වම්පසට පැන විදුලි කණුවක ගැටී පෙරළී ගොස් තිබේ. ගැටීමේ ප්‍රබලතාව කොතරම්ද යත්, කැඩී ගිය විදුලි කණුවේ කොටසක් ද පෙරළුණු බස් රථය මතට කඩා වැටී ඇත.
මෙම බිහිසුණු අනතුරින් බස් රථයේ ගමන් කළ මිහින්තලේ, රාජාවැව ප්‍රදේශයේ පදිංචිව සිටි 30 හැවිරිදි නිලම් සමුද්පති සේනාරත්න සහ යතුරුපැදිකරුවූ රාජාපුර යාය 7 ප්‍රදේශයේ පදිංචි 37 හැවිරිදි ආර්.ඩී. නාලක නිශාන්ත රන්දෙණිය යන අය එම ස්ථානයේදීම ජීවිතක්ෂයට පත්වූහ. බස් රථයේ රියදුරු සහ කොන්දොස්තරවරයා ද ඇතුළුව එහි ගමන් ගත් තවත් මගීන් 14 දෙනෙකු අනතුරින් තුවාල ලබා ඇත. අනතුර සිදුවූ වහාම ක්‍රියාත්මක වූ ප්‍රදේශවාසීන් සහ පොලිසිය එක්ව තුවාලකරුවන් සාලියවැව ප්‍රාදේශීය රෝහලටත්, ඉන් අනතුරුව වැඩිදුර ප්‍රතිකාර සඳහා පුත්තලම මූලික රෝහලටත් ඇතුළත් කිරීමට පියවර ගෙන තිබිණි.
සාලියවැව අනතුර සිදුවී සුළු වේලාවකට පසු, එනම් එදිනම සවස 6.00 ට පමණ කොත්මලේ, කඩදොර ප්‍රදේශයෙන් ද කම්පනය දනවන තවත් අනතුරක් වාර්තා විය. කොත්මලේ කොතදෙණියාව සිට කඩදොර දක්වා ධාවනය වූ කැබ් රථයක් මාර්ගයෙන් ඉවතට පැන අඩි 500ක පමණ දැවැන්ත ප්‍රපාතයකට පෙරළී යාමෙන් මෙම අනතුර සිදුවී තිබේ.
ප්‍රපාතයට පෙරළීමෙන් සිදුවූ එම අනතුරින් කැබ් රථයේ රියදුරුවූ කොතදෙණියාව උතුර ප්‍රදේශයේ පදිංචි 53 හැවිරිදි තුෂිත හේරත් සහ එහි ගමන් කළ සමෘද්ධි නියාමකවරියක වූ 50 හැවිරිදි චාන්දනී නවරත්න යන දෙදෙනා ජීවිතක්ෂයට පත්වූහ. වාර්තා වන ආකාරයට මෙම ගමන සිදුව ඇත්තේ අදාළ සමෘද්ධි නියාමකවරිය ඇයගේ නිවසට ඇරලවීම සඳහාය. මෙම අනතුරින් බරපතළ තුවාල ලැබූ තවත් කාන්තාවක ගම්පොල මූලික රෝහල වෙත ඇතුළත් කිරීමට කටයුතු කර තිබේ.
මහමග ගමන් ගත් ජීවිත කිහිපයක් එකම සැන්දෑවක අහිමි කළ මෙම මාරක රිය අනතුරු ද්විත්වය සම්බන්ධයෙන් පොලිස් පරීක්ෂණ මේ වනවිටත් ක්‍රියාත්මකය. සාලියවැව පොලිසියේ වැඩබලන ස්ථානාධිපති පොලිස් පරීක්ෂක ඩබ්ලිව්.එල්.ඩබ්ලිව්. ජයසිංහ මහතා ඇතුළු රථවාහන අංශයේ නිලධාරීන් කණ්ඩායමක් බස් රථ අනතුර පිළිබඳව විමර්ශන සිදුකරන අතර, කැබ් රථය ප්‍රපාතයට පෙරළීමේ සිද්ධිය සම්බන්ධයෙන් පුස්සැල්ලාව පොලිසිය විසින් වැඩිදුර පරීක්ෂණ පවත්වනු ලබයි. මියගිය අයගේ පශ්චාත් මරණ පරීක්ෂණ පුත්තලම මූලික රෝහල ඇතුළු අදාළ රෝහල්වලදී සිදුකිරීමට නියමිතව තිබිණි.