හිටපු ජනාධිපති මහින්ද රාජපක්ෂ මහතාගේ බිරිඳ වන ශිරන්ති රාජපක්ෂ මහත්මිය ලබන 24 වනදා මූල්‍ය අපරාධ විමර්ශන කොට්ඨාසය හමුවේ පෙනී සිටීමට නියමිතව තිබියදී අද (16) අලුයම සිංගප්පූරුව බලා පිටත්ව ගොස් තිබේ. ඇය අද අලුයම 01.10 ට සිංගප්පූරු ගුවන් සේවයට අයත් SQ-469 දරන ගුවන් යානයෙන් කටුනායක ජාත්‍යන්තර ගුවන් තොටුපොළ හරහා මෙලෙස දිවයිනෙන් පිටත්ව ගොස් ඇති අතර, රෝහිත රාජපක්ෂ මහතාගේ නැන්දණිය වන ඈන් ද ලිවේරා මහත්මිය ද ඇය සමඟ මෙම ගමනට එක්ව ඇත.
හදිසි සැත්කමක් සඳහා ඇය මෙලෙස විදේශගතව ඇති බව ආරංචි මාර්ග සඳහන් කරන අතර, ඊයේ (15) දිනයේදී ඇති වූ හදිසි අසනීප තත්ත්වයක් හේතුවෙන් ඇය කොළඹ පෞද්ගලික රෝහලකට ද ඇතුළත් කර තිබුණි. මීට පෙරද කොළඹ පෞද්ගලික රෝහලකදී හදිසි හෘද සැත්කමකට භාජනය වූ ඇයට සති කිහිපයක පූර්ණ ඇඳ විවේකය අවශ්‍ය බවට වෛද්‍යවරුන් නිර්දේශ කර තිබූ අතර, එම අසනීප තත්ත්වය හේතුවෙන් ඇගෙන් ප්‍රකාශ සටහන් කරගැනීමේ කටයුතු පසුවට කල් දැමීමට පොලීසිය පියවර ගෙන තිබුණි.
ශිරන්ති රාජපක්ෂ මහත්මියගේ ප්‍රධානත්වයෙන් ක්‍රියාත්මක වූ 'සිරිලිය සවිය' සංවිධානයේ අරමුදල් ගිණුමේ සිදුව ඇතැයි කියන මූල්‍ය අක්‍රමිකතාවන්ට අදාළව ඇගෙන් ප්‍රකාශයක් ලබාගන්නා ලෙස නීතිපතිවරයා විසින් පොලිස් මූල්‍ය අපරාධ විමර්ශන කොට්ඨාසයට උපදෙස් ලබා දී තිබේ. ඊට අමතරව ඇයව අල්ලස් හෝ දූෂණ චෝදනා විමර්ශන කොමිෂන් සභාව හමුවට ද කැඳවීමට නියමිතව තිබූ පසුබිමක මෙම විදේශගත වීම සිදුව ඇත.
මෙම විමර්ශනවලට අනුව, කොළඹ රිජ්වේ ආර්යා ළමා රෝහලට CT ස්කෑනර් යන්ත්‍රයක් මිලදී ගැනීම සඳහා ජාතික ඉතිරිකිරීමේ බැංකුවෙන් ලබාගත් රුපියල් කෝටියක මුදලක් සිරිලිය සවිය අරමුදල් ගිණුමට බැර කරමින් අවභාවිත කර ඇති බවට චෝදනා එල්ල වී තිබේ. අදාළ ස්කෑනර් යන්ත්‍රය චීන රජය විසින් නොමිලේ ලබා දී තිබියදී, බැංකුවෙන් ලබාගත් මුදල් සංවිධානයේ ලිඛිත ඉල්ලීමකට අනුව මරදාන සහ සුදුවැල්ල ශාඛාවල පවත්වාගෙන ගිය ගිණුම් වෙත හුවමාරු කර වෙනත් කටයුතු සඳහා යොදාගෙන ඇති බව බැංකු නිලධාරීන්ගෙන් කළ ප්‍රශ්න කිරීම්වලදී අනාවරණය වී ඇත.
හිටපු ජනාධිපති මහින්ද රාජපක්ෂ මහතාගේ ධුර කාලය තුළ පවත්වාගෙන ගිය මෙම ගිණුමේ අක්‍රමිකතා පිළිබඳ පරීක්ෂණ යහපාලන රජය සමයේ ආරම්භ කර තිබේ. මෙම රුපියල් මිලියන 10ක මුදලට සිදුවූයේ කුමක්ද යන්න පිළිබඳව ජ්‍යෙෂ්ඨ පොලිස් නිලධාරියෙකුගේ මෙහෙයවීමෙන් විමර්ශන ක්‍රියාත්මක වන අතර, මෙම සිද්ධියට අදාළව මීට පෙර ද පැය හතරකට අධික කාලයක් ශිරන්ති රාජපක්ෂ මහත්මියගෙන් ප්‍රශ්න කර ඇත.
