කොළඹ සහ තදාසන්න ප්රදේශවල මාර්ග තදබදය අවම කිරීමේ පියවරක් ලෙස බස් රථ සඳහා වෙන් කර ඇති මංතීරු නීතිය අද (29) සිට දැඩිව ක්රියාත්මක කිරීමට ශ්රී ලංකා පොලිසිය තීරණය කර තිබේ. මෙම රෙගුලාසි කඩ කරන රියැදුරන් සොයා අඛණ්ඩව පරීක්ෂා කිරීම් සිදු කරන බවත්, ඔවුන්ට එරෙහිව දැඩි නීතිමය පියවර ගන්නා බවත් පොලිසිය අවධාරණය කරයි.
මගී ජනතාවට ආරක්ෂිතව මෙන්ම ප්රමාදයකින් තොරව තම ගමනාන්ත කරා ළඟාවීමට පහසුකම් සැලසීම මෙම වැඩසටහනේ ප්රධාන අරමුණ වී ඇත. බස්නාහිර පළාත කේන්ද්ර කරගනිමින් මෙවැනි ප්රමුඛතා මංතීරු හතක් ක්රියාත්මක වන බව ‘මෙට්රෝ බස්’ ආයතනයේ සභාපති එස්.එම්.යූ.පී. තිලකරත්න මහතා පෙන්වා දෙයි. ඊට සමගාමීව, කොළඹට පැමිණෙන මගීන්ගේ ගමන් පහසුව උදෙසා ‘මෙට්රෝ’ සේවාවට අයත් සුඛෝපභෝගී බස් රථ 104ක් ද සැප්තැම්බර් 29 වැනිදා සිට ධාවනයට එක් කිරීමට නියමිතව තිබේ.
මෙම විශේෂ මංතීරු ක්රියාත්මක වන කාලසීමාවන් පිළිබඳව පැහැදිලි කරන පොලිස් රථවාහන පාලන හා මාර්ග ආරක්ෂණ අංශයේ සහකාර පොලිස් අධිකාරී මනෝජ් රණගල මහතා සඳහන් කළේ, උදෑසන 6.00 සිට 9.00 දක්වාත්, සවස 4.00 සිට 7.00 දක්වාත් මෙම නීතිය බලාත්මක වන බවයි. අදාළ කාලය තුළ වෙනත් කිසිදු වාහනයකට එම මංතීරුවල ගමන් කිරීමට හෝ වාහන නවතා තැබීමට අවසර හිමි නොවේ. කෙසේ වෙතත්, හදිසි අවස්ථාවකදී, අනතුරක් වළක්වා ගැනීමට, දැඩි මාර්ග තදබදයක් මඟහැර යෑමට හෝ වාහනයක් හැරවීමට අවශ්ය වන අවස්ථාවලදී පමණක් සෙසු වාහනවලට මෙම මංතීරුව භාවිත කිරීමට සුවිශේෂී අවසරයක් ලබා දී ඇත.
තවද, මෙම බස් ප්රමුඛතා මංතීරු වෙන් කර ඇත්තේ ‘මෙට්රෝ’ බස් රථ සඳහා පමණක් නොවන බව සහකාර පොලිස් අධිකාරීවරයා පෙන්වා දෙයි. ඒ අනුව, මගී ප්රවාහනයේ යෙදෙන ඕනෑම බස් රථයකට මෙම මංතීරු භාවිත කිරීමේ හැකියාව පවතී.
