නිව් යෝර්ක් නගරාධිපති සොරාන් මම්දානි, අඩු ආදායම්ලාභී සේවකයන්ගේ අයිතීන් වෙනුවෙන් පෙනී සිටිමින්, ඇමසන් (Amazon) සහ ෆෙඩෙක්ස් (FedEx) වැනි දැවැන්ත සමාගම්වලට එරෙහිව ගෙන යන නව නීතිමය පියවරකට සිය පූර්ණ සහයෝගය ලබා දී තිබේ. මෙම නව පනත් කෙටුම්පත හරහා, අදාළ සමාගම් විසින් භාණ්ඩ බෙදාහරින්නන් උපකොන්ත්රාත්කරුවන් ලෙස යොදාගැනීම වෙනුවට ඔවුන්ට ඍජු රැකියා ලබා දීම අනිවාර්ය කෙරෙනු ඇත.
මෙම වසර මුලදී නිව් යෝර්ක් නගර සභාවට ඉදිරිපත් කරන ලද මෙම පනතට අනුව, ගබඩා මෙහෙයුම්කරුවන් නගරයෙන් විශේෂ බලපත්ර ලබා ගත යුතු අතර, ඒ සඳහා නව ආරක්ෂණ, පුහුණු සහ රැකියා අවශ්යතා සපුරාලීම අනිවාර්ය වේ.සඳුදා දිනයේදී මෙම පනතට සිය සහය පළ කරමින් නගරාධිපතිවරයා ප්රකාශ කළේ, මෙයින් රථවාහන අනතුරු අවම කරගැනීමට ද හැකිවනු ඇති බවයි. ඔහු විසින් උපුටා දක්වන ලද 2025 නිව් යෝර්ක් නගරයේ පාලක වාර්තාවකට අනුව, භාණ්ඩ බෙදාහැරීමේ අවසන් අදියර සඳහා වන මධ්යස්ථාන (last-mile facilities) විවෘත කිරීමෙන් පසු ඒ අවට අසල්වැසි ප්රදේශවලින් 78% කම අනතුරු හේතුවෙන් සිදුවන තුවාල වීම් ඉහළ ගොස් ඇත. ඇමසන් වැනි දැවැන්ත ව්යාපාරික ආයතන, සූරාකෑමේ උපකොන්ත්රාත් ක්රමයක් හරහා වගකීම්වලින් නිදහස් වෙමින් බිලියන ගණනක ව්යාපාරික ආකෘති ගොඩනඟන බවට නගරාධිපතිවරයා එහිදී චෝදනා කළේය.
මෙයට ප්රතිචාර දක්වමින් ඇමසන් සමාගම ප්රකාශ කර ඇත්තේ 'බෙදාහැරීමේ ආරක්ෂණ පනත' (Delivery Protection Act) නීතිගත වුවහොත් තම ගබඩා සංකීර්ණ නිව් යෝර්ක් නගරයෙන් පිටතට ගෙන යාමට සලකා බලන බවයි. එමෙන්ම, මෙම පියවර හරහා තම උපකොන්ත්රාත්කරුවන් යටතේ සේවය කරන 5,000 කට අධික භාණ්ඩ බෙදාහරින්නන්ගේ රැකියා අවදානමට ලක්විය හැකි බවට ද ඔවුන් අනතුරු අඟවා ඇත. කෙසේ වෙතත්, 2019 වසරේ සිට ආරක්ෂණ වැඩසටහන් සඳහා බිලියන ගණනක් ආයෝජනය කර ඇති බවත්, ආරක්ෂිත සේවා පරිසරයක් තුළ කඩිනම් සහ දැරිය හැකි මිලකට සේවා සැපයීමට මෙන්ම දේශීය කුඩා ව්යාපාරවලට සහය වීමට තමන් කැපවී සිටින බවත් සමාගම වැඩිදුරටත් අවධාරණය කර තිබේ.
මෙම නීතිය සම්මත වුවහොත්, භාණ්ඩ බෙදාහරින්නන් ඍජු සේවකයන් බවට පත් කිරීම අනිවාර්ය කරන පළමු නගරය බවට නිව් යෝර්ක් නගරය පත්වනු ඇත. පාරිභෝගිකයාගේ නිවසටම භාණ්ඩ ගෙන යන මෙම අවසන් අදියර, ඊ-වාණිජ්ය සැපයුම් දාමයේ වඩාත්ම වියදම් අධික මෙන්ම ශ්රමය හා කාලය වැය වන කොටස ලෙස සැලකේ. මෙම පිරිවැය අඩු කර ගැනීම සඳහා ෆෙඩෙක්ස් සහ ඇමසන් වැනි සමාගම් දැනට ස්වාධීන කොන්ත්රාත්කරුවන් මත පදනම් වූ ආකෘතියක් බහුලව භාවිතා කරන අතර, එහිදී බෙදාහැරීම් සිදු කිරීම සඳහා රථවාහන සහ රියදුරන් සපයා ගනු ලබන්නේ එම කොන්ත්රාත්කරුවන් විසිනි.