බෙංගාල ප්රාන්ත සහ ඩෙල්හි කැපිටල්ස් අයි.පී.එල් කණ්ඩායම් නියෝජනය කරන ප්රබල ක්රිකට් ක්රීඩක අභිෂේක් පොරෙල් (Abishek Porel) අත්අඩංගුවට ගෙන තිබේ. විවාහ වන බවට අසත්ය පොරොන්දු දී ලිංගික සබඳතා පැවැත්වීම, ස්ත්රී දූෂණය, පහරදීම, නිවසේ සිරකර තැබීම, තර්ජනය කිරීම සහ තොරතුරු තාක්ෂණ පනත උල්ලංඝනය කිරීම ඇතුළු බරපතල චෝදනා කිහිපයක් මුල් කරගනිමින් මෙම අත්අඩංගුවට ගැනීම සිදුකර ඇත.
මොග්රා පොලිසිය විසින් 2026 අගෝස්තු 10 වන දින රාත්රියේ හෝ 11 වන දින අලුයම කාලයේදී කොල්කටාහි දුම් දුම් පොලිස් බලප්රදේශයට අයත් එම අමි සිටි (Emami City) හි පිහිටි නිවසකදී ඔහුව අත්අඩංගුවට ගෙන තිබේ.අනතුරුව චින්සුරාහි ප්රධාන අධිකරණ මහේස්ත්රාත් අධිකරණය වෙත ඉදිරිපත් කිරීමෙන් පසුව, ඉදිරිපත් වූ ඇප ඉල්ලීම ප්රතික්ෂේප කළ අධිකරණය ඔහුව දින තුනක කාලයක් සඳහා පොලිස් භාරයේ තැබීමට නියෝග කළේය. මෙම නීතිමය ක්රියාමාර්ගයට පදනම් වී ඇත්තේ කර්නාටක ප්රාන්තයේ වෛද්ය ශිෂ්යාවක සහ ඇගේ මව විසින් 2026 ජූනි 23 වන දින මොග්රා පොලිස් ස්ථානය වෙත ඉදිරිපත් කරන ලද පැමිණිල්ලකි. අදාළ පැමිණිල්ලට අනුව 2023 ජනවාරි මාසයේ සිට වසර තුන හමාරක පමණ කාලයක් ඔවුන් අතර ප්රේම සබඳතාවක් පැවැතී ඇති අතර, දෙපාර්ශ්වයේ පවුල් අතර විවාහය පිළිබඳව ද සාකච්ඡා වී තිබේ. විවාහ වන බවට දුන් පොරොන්දුව මත ඔවුන් අතර ලිංගික සබඳතා පැවැති බවත්, පසුව වසරකට හෝ වසර එකහමාරකට පමණ පෙර හටගත් මතභේද හේතුවෙන් අභිෂේක් පොරෙල් ඇගෙන් වෙන්වී විවාහ වීම ප්රතික්ෂේප කළ බවත් පැමිණිල්ලේ සඳහන් වේ. මීට අමතරව 2026 අප්රේල් 2 වන දින ඩෙල්හිහිදී තමන්ව නිවස තුළ සිරකර තබමින්, ආහාර ලබා නොදී දැඩි ශාරීරික වධහිංසාවලට ලක්කළ බවට ද වින්දිත කාන්තාව චෝදනා කර ඇත.
ඇගේ කැමැත්තකින් තොරව පෞද්ගලික රූපරාමු පටිගත කර ඇති අතර, පසුව වෙනත් දුරකථන අංක සහ ඉන්ස්ටග්රෑම් (Instagram) ගිණුම් හරහා එම පෞද්ගලික ඡායාරූප සමාජ මාධ්ය වෙත මුදාහරින බවට තර්ජනය කර ඇති බව ද කියැවේ. මේ අනුව භාරතීය න්යාය සංහිතාවේ (BNS) 69, 311, 318 යන වගන්ති සහ තොරතුරු තාක්ෂණ පනතේ 66 හා 72 යන වගන්ති යටතේ පොලිසිය නඩුව ලියාපදිංචි කර තිබේ. පසුගිය ජූනි මස අග භාගයේදී මෙම චෝදනා කරළියට එන විට අභිෂේක් පොරෙල් බැංගලෝර්හි පසුවූ අතර, ඔහු එම චෝදනා සියල්ල පදනම් විරහිත බව පවසමින් ප්රතික්ෂේප කළේය. කෙසේ වෙතත්, නඩුව විභාගයට ගත් කල්කටා මහාධිකරණයේ විනිසුරු සෞගතා භට්ටාචාර්යා මහතා වින්දිත කාන්තාවගේ පෞද්ගලිකත්වය සහ ගෞරවය ආරක්ෂා කිරීම සඳහා සැකකරු අත්අඩංගුවට ගෙන ඔහුගේ විද්යුත් උපකරණ භාරයට ගන්නා ලෙස පොලිසියට නියෝග කළේය. ඒ අනුව හූග්ලි ග්රාමීය පොලිස් අධිකාරී කුන්වාර් භූෂන් සිංගේ මෙහෙයවීමෙන් සිදුකළ විශේෂ මෙහෙයුමකින් පසුව සැකකාර ක්රීඩකයා අත්අඩංගුවට ගැනීමට හැකි විය.
2002 ඔක්තෝබර් 17 වන දින බටහිර බෙංගාලයේ චන්දන්නගර් හි උපත ලැබූ අභිෂේක් පොරෙල්, වම් අතින් පිතිකරණයේ යෙදෙන විකට් රකින ක්රීඩකයෙකි. ප්රදේශීය මට්ටමින් බෙංගාල කණ්ඩායම ද ඉන්දියා ඒ (India A) කණ්ඩායම ද නියෝජනය කර ඇති ඔහු, 2023 අයි.පී.එල් තරගාවලියේදී ආබාධයට ලක්වූ රිෂාබ් පාන්ට් වෙනුවට ඩෙල්හි කැපිටල්ස් සංචිතයට එක්විය. පසුව ඉන්දීය රුපියල් කෝටි 4ක මුදලකට කණ්ඩායම තුළ ඔහුව රඳවා ගැනීමට කළමනාකාරීත්වය පියවර ගත්තේය.සිය අයි.පී.එල් තරග දිවිය තුළ තරග 35 කට සහභාගී වී ඇති ඔහු, ලකුණු 769 ක් රැස්කරගෙන ඇත්තේ 145 ක පමණ ප්රහාරාත්මක වේගයක් පවත්වා ගනිමිනි. 2024 සහ 2025 තරග වාරයන්හිදී සාර්ථක දක්ෂතා දැක්වූ පොරෙල්, 2026 අයි.පී.එල් තරගාවලියේදී තරග 4 කට පමණක් ක්රීඩා කරමින් ලකුණු 108 ක් ලබාගත්තේය. මෙම අත්අඩංගුවට ගැනීම සිදුවන වන විට ඔහු කිසිදු තරගකාරී ක්රිකට් තරගයකට එක්වී සිටියේ නැත.