නුවරඑළිය දිස්ත්‍රික්කයට ඇදහැලුණු අධික වර්ෂාව සහ ඒ හා බැඳුණු ආපදා තත්ත්වයන් හේතුවෙන් පුද්ගලයින් හයදෙනෙකු අතුරුදහන් වී ඇති අතර, දිස්ත්‍රික්කය පුරා පුද්ගලයින් 2,331 කට වැඩි පිරිසක් පීඩාවට පත්ව සිටිති.
පවත්නා අයහපත් කාලගුණය හේතුවෙන් පවුල් 581 කට අයත් පුද්ගලයින් 2,331 දෙනෙකු පීඩාවට පත්ව ඇති බව නුගරඑළිය දිස්ත්‍රික් ලේකම් තුෂාරි තෙන්නකෝන් මහත්මිය තහවුරු කරයි. පීඩාවට පත් පිරිස් අතරින් පුද්ගලයින් 1,734 දෙනෙකු මේ වන විට ස්ථාපිත කර ඇති සුභසාධන මධ්‍යස්ථාන හතක සුරක්ෂිතව රඳවා තැබීමට පියවර ගෙන ඇත.
අතුරුදහන් වූ පිරිස අතරින් දෙදෙනෙකු ගංවතුරට හසුව ගසාගෙන ගොස් ඇති බවට විශ්වාස කෙරෙන අතර, අනෙක් සිව්දෙනා අතුරුදහන්ව ඇත්තේ සිදු වූ නායයාම් සිදුවීමක් හේතුවෙන් බව දිස්ත්‍රික් ලේකම්වරිය වැඩිදුරටත් පැවසුවාය. තවද, මෙම කාලගුණික ආපදා හේතුවෙන් තවත් පුද්ගලයින් තිදෙනෙකු තුවාල ලබා තිබේ.