වේල්ස් ජාතික පොප් ගායිකා බොනී ටයිලර් සමුගනී

ලොව පුරා අතිශය ජනප්‍රියත්වයට පත් වූ "Total Eclipse of the Heart" ගීතය ගායනා කළ සුප්‍රකට වේල්ස් ජාතික ගායිකා බොනී ටයිලර් (Bonnie Tyler) පෘතුගාලයේ රෝහලකදී අභාවප්‍රාප්ත වී තිබේ. මියයන විට ඇය 75 වැනි වියේ පසු වූවාය.

පසුගිය මැයි මාසයේදී ඇය මුහුණ දුන් බඩවැල් ආශ්‍රිත හදිසි සැත්කමකින් අනතුරුව ප්‍රතිකාර ලබමින් සිටියදී ඇති වූ සංකූලතා හේතුවෙන් ඇය මෙලෙස අභාවප්‍රාප්ත වූ බව පවුලේ සාමාජිකයින් ෆේස්බුක් ඔස්සේ නිවේදනය කර ඇත.

සිය රෝගී තත්ත්වය හේතුවෙන් 1976 වසරේ නිකුත් වූ ඇයගේ "Lost in France" ගීතයේ 50 වැනි සංවත්සරය වෙනුවෙන් සැලසුම් කර තිබූ යුරෝපීය සංචාරය ද මෑතකදී අවලංගු කිරීමට ඇයට සිදු විය. අසූව දශකයේ අග්‍රගණ්‍ය ගායිකාවක ලෙස සැලකෙන ටයිලර්, ඇයගේ සුවිශේෂී වූ ගොරෝසු කටහඬ, කළු පැහැති අයිලයිනර් භාවිතය සහ රන්වන් පැහැති හිසකෙස් හේතුවෙන් ලොව පුරා රසිකයින් අතර ඉතා ඉක්මනින් හඳුනාගත හැකි සලකුණක් බවට පත්ව සිටියාය. අතීතයේදී ස්වර තන්ත්‍රවල ඇති වූ ගැටලුවක් හේතුවෙන් සිදු කළ සැත්කමකින් පසු නිසි පරිදි කටහඬට විවේකයක් ලබා නොදීම නිසා ඇයට මෙම සුවිශේෂී කටහඬ හිමි වූ බව පැවසේ.

1951 වසරේ වේල්සයේ නීත් (Neath) නගරයේදී ගේනර් හොප්කින්ස් (Gaynor Hopkins) ලෙස උපත ලැබූ ඇය සහෝදර සහෝදරියන් පස් දෙනෙකු සමඟ හැදී වැඩුණාය. පතල් කම්කරුවෙකු වූ පියෙකුට සහ ගෘහණියක වූ මවකට දාව උපන් ඇය වයස අවුරුදු 16 දී පාසල් අධ්‍යාපනයට සමුදෙමින් සිල්ලර වෙළඳසැලක සේවයට එක්වූවාය. විවේක කාලයේදී ගායනයට යොමු වූ ඇය 1975 වසරේදී රාත්‍රී සමාජ ශාලාවක ගායනා කරමින් සිටියදී රොජර් බෙල් නම් කුසලතා ගවේෂකයාගේ නෙත ගැටීමෙන් පසු ආර්.සී.ඒ (RCA) ආයතනය සමඟ ගිවිසුම්ගත වී, බොනී ටයිලර් යන නව නාමයෙන් සිය වෘත්තීය සංගීත දිවිය ආරම්භ කළාය.

1978 වසරේදී "It's a Heartache" ගීතය හරහා ජාත්‍යන්තර කීර්තියක් අත්කර ගත් ඇයගේ සංගීත දිවියේ විශාලතම පෙරළිය වූයේ ඇමරිකානු ජාතික ජිම් ස්ටේන්මන් විසින් රචනා කරන ලද "Total Eclipse of the Heart" ගීතයයි. පිටපත් මිලියන හයකට වඩා අලෙවි වී ඇති එම ගීතය 2026 වසර වන විට ස්පොටිෆයි (Spotify) ඔස්සේ බිලියනයකට වඩා වැඩි වාර ගණනක් ශ්‍රවණය කර තිබූ අතර, යූටියුබ් හරහා එහි වීඩියෝව බිලියනයකට අධික නැරඹුම් වාර සංඛ්‍යාවක් වාර්තා කර ඇත. මීට අමතරව 1984 වසරේ 'Footloose' චිත්‍රපටය වෙනුවෙන් ඇය ගායනා කළ "Holding Out for a Hero" ගීතය ද ඇයගේ ජනප්‍රියත්වය තවත් ඉහළ නැංවීය.

ඇයගේ අභාවය වෙනුවෙන් ලොව පුරා ප්‍රකට පුද්ගලයින් රැසක් සිය ශෝකය ප්‍රකාශ කර තිබේ. බ්‍රිතාන්‍ය අග්‍රාමාත්‍ය කීර් ස්ටාමර් පවසා සිටියේ ටයිලර් බ්‍රිතාන්‍යයේ බිහිවූ ශ්‍රේෂ්ඨතම ගායිකාවක බවත් ඇයගේ සංගීතය තවදුරටත් ජනතා සිත් සතන් තුළ ජීවමානව පවතිනු ඇති බවත්ය. කැනේඩියානු ගායක බ්‍රයන් ඇඩම්ස් සහ සම්භාව්‍ය ගායිකා කැතරින් ජෙන්කින්ස් ද X (ට්විටර්) සමාජ මාධ්‍ය ඔස්සේ සිය ශෝකය පළ කරමින් ටයිලර්ගේ සුවිශේෂී කටහඬ සහ ඇය ලෝක සංගීතයට කළ අමිල මෙහෙවර අගය කර ඇත.