එක්සත් ජනපදය තුළ උපත ලබන සෑම අයෙකුටම හිමිවන ජන්ම අයිතිය පිළිබඳ පුරවැසිභාවය අහෝසි කිරීමට ජනාධිපති ඩොනල්ඩ් ට්රම්ප් ගත් තීරණයට එරෙහිව එරට ශ්රේෂ්ඨාධිකරණය විසින් මතභේදාත්මක තීන්දුවක් ලබා දී තිබේ. මෙම අධිකරණ තීන්දුව සංක්රමණ ප්රතිපත්තිය පරිවර්තනය කිරීමට ඇමෙරිකානු ජනාධිපතිවරයා දරන උත්සාහයට එල්ල වූ විශාල බාධාවකි.
2025 ජනවාරි 20 වන දින බලයට පත්වීමෙන් පසු, තාවකාලික නීතිමය තත්ත්වයන් මත පසුවන හෝ නිසි ලේඛන නොමැති දෙමාපියන්ට දාව එක්සත් ජනපදයේ උපත ලබන දරුවන්ට ස්වයංක්රීයව පුරවැසිභාවය ලැබීම තහනම් කෙරෙන විධායක නියෝගයකට ඩොනල්ඩ් ට්රම්ප් අත්සන් තබා තිබුණි.රජයේ එම තීරණය අභියෝගයට ලක් කරමින් ශ්රේෂ්ඨාධිකරණය හමුවේ පැවති මෙම නඩුවේදී විනිසුරුවරුන් 6-3ක් ලෙස බහුතර එකඟතාවයෙන් නව තීන්දුව ප්රකාශයට පත් කළහ. එහිදී ට්රම්ප් පරිපාලනය නියෝජනය කළ නීතිඥයන් තර්ක කර තිබුණේ, එක්සත් ජනපදයේ උපත ලබන සහ එහි අධිකරණ බලයට යටත් වන පුද්ගලයන්ට පුරවැසිභාවය හිමිකර දෙන ආණ්ඩුක්රම ව්යවස්ථාවේ 14 වන සංශෝධනය අදාළ වන්නේ එක්සත් ජනපද පුරවැසියන් හෝ ස්ථිර පදිංචිකරුවන් වන දෙමාපියන්ගේ ළදරුවන්ට පමණක් බවයි.
මෙම නඩු තීන්දුව ප්රකාශයට පත් කරමින් ශ්රේෂ්ඨාධිකරණ විනිසුරුවන් පෙන්වා දී ඇත්තේ වසරකට ළදරුවන් 255,000 ක් පමණ එක්සත් ජනපදයේ පුරවැසිභාවය නොමැතිව උපත ලබන බවයි. එමෙන්ම පවතින තත්ත්වය අනුව ඉදිරි 2045 වසර වන විට එරට ලේඛනගත නොකළ ජනගහනය තවත් මිලියන 2.7 කින් ඉහළ යනු ඇති බව ද විනිසුරුවන් විසින් එහිදී අනාවරණය කර තිබේ.