වනාතවිල්ලුව පොලිස් වසමට අයත් බණ්ඩාරනායකපුර ප්රදේශයේ මංගලපුර විල්ලුවේදී තෙප්පමක් පෙරළී යාමෙන් පාසල් සිසුන් සිව්දෙනෙකු දියේ ගිලී ජීවිතක්ෂයට පත්වීමේ ඛේදනීය පුවතක් වාර්තා වේ. ප්රදේශයේ විලක මල් නෙලීම සඳහා සිසුන් පස්දෙනෙකු කුඩා ඔරුවක ආධාරයෙන් ගමන් කරමින් සිටියදී මෙම අනතුර සිදුව ඇත.
අනතුර සිදුවූ අවස්ථාවේදී එක් සිසුවෙකු වහාම පිහිනා ගොඩට පැමිණ සිය ජීවිතය බේරාගෙන තිබේ. අනෙක් සිසුන් සිව්දෙනා දියේ ගිලී ඇති අතර ඉන් තිදෙනෙකු වනාතවිල්ලුව රෝහලෙන් වැඩිදුර ප්රතිකාර සඳහා පුත්තලම මූලික රෝහල වෙත මාරු කර යැවීමෙන් අනතුරුව මියගොස් ඇති අතර, සමස්තයක් ලෙස මෙම අනතුරෙන් ජීවිතක්ෂයට පත් වූ සිසුන් සංඛ්යාව හතරක් දක්වා ඉහළ ගොස් ඇත.
මෙලෙස අවාසනාවන්ත ලෙස මියගොස් ඇත්තේ බණ්ඩාරනායකපුර සහ මංගලපුර යන ප්රදේශවල පදිංචිව සිටි, ප්රදේශයේ පාසලක 11 වැනි ශ්රේණියේ ඉගෙනුම ලැබූ 16 හැවිරිදි සිසුන් පිරිසකි. මියගිය සිසුන්ගේ මෘත ශරීර මේ වන විට පුත්තලම රෝහලේ මෘත ශරීරාගාරයේ තැන්පත් කර ඇති අතර, වනාතවිල්ලුව පොලිසිය සිද්ධිය සම්බන්ධයෙන් වැඩිදුර විමර්ශන සිදු කරයි.