බටහිර ආසියානු කලාපයේ පවතින දේශපාලන අර්බුදය නවමු සහ සංකීර්ණ මුහුණුවරක් ගෙන ඇති පසුබිමක, ඉරානයේ හිටපු උත්තරීතර නායක අයතුල්ලා අලි කමේනිගේ අවමංගල්ය උත්සවය ඉලක්ක කරගනිමින් ඇමරිකා එක්සත් ජනපදය දැඩි රාජ්යතාන්ත්රික බලපෑමක් එල්ල කරමින් සිටින බව වාර්තා වේ. ඉරාන මාධ්ය උපුටා දක්වමින් ප්රකාශ වන්නේ මෙම අවමංගල්ය උත්සවයට සහභාගී වීම වැළැක්වීම සඳහා ඇමරිකාව විවිධ රටවල් වෙත රහසිගත රාජ්යතාන්ත්රික මට්ටමින් දැඩි පීඩනයක් එල්ල කර ඇති බවයි.
මෙම ඇමරිකානු මැදිහත්වීම හේතුවෙන් අවම වශයෙන් ලෝකයේ රටවල් 13ක් පමණ තම තීරණ වෙනස් කරමින් අවමංගල්ය උත්සවයට සහභාගී වීමෙන් වැළකී සිටීමට හෝ ඔවුන්ගේ නියෝජනය අවම කිරීමට පියවර ගෙන තිබේ.විදේශීය වාර්තාවලට අනුව, ඇමරිකානු රාජ්ය ලේකම් මාර්කෝ රුබියෝ විසින් පසුගිය ජුනි 26 වැනිදා එරට තානාපති කාර්යාල වෙත රහසිගත උපදෙස් මාලාවක් නිකුත් කර ඇත. එමඟින් රාජ්යතාන්ත්රිකයන්ට උපදෙස් දී ඇත්තේ අදාළ රටවල් මෙම අවමංගල්ය උත්සවයට සහභාගී වීම වැළැක්වීම සඳහා හැකි සෑම උත්සාහයක්ම ගන්නා ලෙසයි. ඉරාන නායකයාගේ අවමංගල්යයට සහභාගී වීම ඇමරිකාවට එරෙහි මිත්රශීලී නොවන ක්රියාවක් ලෙස සලකන බවත්, එය ඇමරිකාව සමඟ පවතින සබඳතාවලට සෘජුවම බලපෑ හැකි බවත් එහිදී අනතුරු අඟවා තිබේ.
ඇමරිකාවේ මෙම බලපෑම හුදෙක් රාජ්යතාන්ත්රික සබඳතාවලට පමණක් සීමා නොවූ අතර, අප්රිකානු කලාපයේ රටවල් කිහිපයකට ඇමරිකානු තානාපතිවරුන් හරහා මූල්ය ආධාර කප්පාදු කරන බවට ද තර්ජන එල්ල වී ඇති බව අරාබි රාජ්යතාන්ත්රික ආරංචි මාර්ග සඳහන් කරයි. මෙම තර්ජන හමුවේ නැගෙනහිර යුරෝපයේ රටවල් 3ක්, අප්රිකාවේ රටවල් 5ක්, පර්සියානු ගල්ෆ් කලාපයේ අරාබි රටවල් 2ක් සහ නැගෙනහිර ආසියාවේ ප්රමුඛ පෙළේ රටවල් 2ක් ඇතුළු රටවල් 13ක් ඉරාන සංචාරයෙන් පසුබා ඇත. ඇතැම් රටවල් ඉතා පහළ මට්ටමේ නියෝජිත කණ්ඩායම් එවීමට උත්සාහ කළද, ඉරාන බලධාරීන් ඒවා පිළිගැනීම ප්රතික්ෂේප කර තිබේ.
ඉරානයේ 'තස්නිම්' පුවත් ඒජන්සියට අනුව, ටෙහෙරාන් නුවර ඉමාම් කමේනි ග්රෑන්ඩ් මුසල්ලාහිදී පසුගිය සෙනසුරාදා ආරම්භ වූ මෙම දීර්ඝ අවමංගල්ය වැඩසටහන එළඹෙන ජූලි 9 වැනිදා කමේනිගේ උපන්ගම වන මෂාද් නුවරදී භූමදාන කටයුතු සිදුකිරීමෙන් අනතුරුව අවසන් වීමට නියමිතය. පසුගිය පෙබරවාරි 28 වැනිදා ඇමරිකාව සහ ඊශ්රායලය එල්ල කළ ප්රහාරයකින් අයතුල්ලා අලි කමේනි ඝාතනයට ලක්වීමත් සමඟ බටහිර ආසියාවේ යුදමය උණුසුම දැඩි ලෙස ඉහළ ගියේය. පසුව දෙපාර්ශවය අතර පවතින සතුරුකම් අවසන් කිරීම සඳහා පසුගිය මාසයේදී කරුණු 14කින් යුත් අවබෝධතා ගිවිසුමකට එළඹ තිබූ අතර, ඒ යටතේ න්යෂ්ටික වැඩසටහන සහ හෝමුස් සමුද්ර සන්ධිය පිළිබඳව දින 60ක තාක්ෂණික සාකච්ඡා පැවැත්වීමට නියමිතව තිබුණි.
කමේනිගේ අභාවයෙන් පසුව ඔහුගේ පුත් මොජ්තබා කමේනි ඉරානයේ නව උත්තරීතර නායකයා ලෙස පත් කරනු ලැබුවද, ඔහු තම පියාගේ දින හයක අවමංගල්ය උත්සව මාලාවේ කිසිදු අවස්ථාවකට සහභාගී නොවන බව වාර්තා වේ. ඊශ්රායලය විසින් එල්ල වෙමින් පවතින අඛණ්ඩ ඝාතන තර්ජන සහ පවතින දැඩි ආරක්ෂක හේතුන් මත ඔහු ප්රසිද්ධියේ පෙනී සිටීමෙන් වැළකී සිටීමට තීරණය කර ඇත. ඉරාන ජනතාව වෙනුවෙන් අලි කමේනි සහ ඔහුගේ පවුලේ සාමාජිකයන් සිව්දෙනෙකු උදෙසා පවත්වන ලද පොදු දේහ ආගමික වතාවත් ඉකුත් ඉරිදා ටෙහෙරාන් නුවරදී නිමාවට පත්විය.