ඇමෙරිකානු නිදහස් දිනයේ 250 වන සංවත්සරය සනිටුහන් කරමින් රුසියානු ජනාධිපති ව්ලැඩිමීර් පුටින් සහ ඇමෙරිකානු ජනාධිපති ඩොනල්ඩ් ට්රම්ප් අතර විශේෂ දුරකථන සංවාදයක් පවත්වා තිබේ. ආසන්න වශයෙන් විනාඩි 90ක පමණ කාලයක්, එනම් හරියටම පැයයි විනාඩි 25ක් පුරා පැවති මෙම සාකච්ඡාවේදී යුක්රේන යුද්ධය මෙන්ම දෙරට අතර පවතින ද්විපාර්ශ්වික සබඳතා පිළිබඳව නායකයන් දෙපළ දීර්ඝ වශයෙන් අදහස් හුවමාරු කරගෙන ඇත.
ක්රෙම්ලිනයේ රාජ්ය තාන්ත්රික ප්රතිපත්ති උපදේශක යූරි උෂාකොව් උපුටා දක්වමින් ටාස් (TASS) සහ රොයිටර්ස් පුවත් සේවා වාර්තා කරන්නේ, මෙම සංවාදය අතිශය ප්රායෝගික මෙන්ම ඉහළ ඵලදායීතාවයකින් යුත් වාතාවරණයක් යටතේ සිදු වූවක් බවයි.ලබන සතියේ තුර්කියේ පැවැත්වීමට නියමිත උතුරු අත්ලාන්තික් ගිවිසුම් සංවිධානයේ (NATO) රාජ්ය නායක සමුළුවට පෙර, යුක්රේන යුද්ධය විසඳීම සඳහා වන මැදිහත්වීම් අඛණ්ඩව ඉදිරියට ගෙන යාමට තමන් බලාපොරොත්තු වන බව ජනාධිපති ට්රම්ප් මෙහිදී ප්රකාශ කර තිබේ. මේ අතර, මෙම සාම සාකච්ඡා මාර්ගයන් තවදුරටත් ඉදිරියට ගෙන යාම සඳහා ඇමෙරිකානු විශේෂ නියෝජිත ස්ටීව් විට්කොෆ් සහ ට්රම්ප්ගේ බෑණනුවන් වන ජැරඩ් කුෂ්නර් නැවත වරක් මොස්කව් නුවර බලා යාමට සූදානමින් සිටින බවද ඇමෙරිකානු පාර්ශ්වය සඳහන් කර ඇත. මෙම සාකච්ඡාවේදී වත්මන් යුක්රේන යුද පිටියේ තත්ත්වය පිළිබඳව පුටින් විසින් ට්රම්ප් වෙත සිය ඇගයීම් ඉදිරිපත් කර ඇති අතර, දෙවන ලෝක යුද සමයේදී ඇමෙරිකාව සහ සෝවියට් දේශය අතර පැවති ඓතිහාසික සන්ධානය පිළිබඳව ද ඔවුන් සිහිපත් කර තිබේ.
ලෝකයේ විශාලතම න්යෂ්ටික බලවතුන් ලෙස ජාත්යන්තර ආරක්ෂාව සහ ස්ථාවරත්වය වෙනුවෙන් රුසියාවට සහ ඇමෙරිකාවට සුවිශේෂී වගකීමක් පවතින බව ඩොනල්ඩ් ට්රම්ප් වෙත වෙනමම සුභ පැතුම් පණිවිඩයක් යොමු කරමින් ව්ලැඩිමීර් පුටින් පවසා ඇත. දෙරට අතර ගොඩනැගෙන සමාන සහ අන්යෝන්ය වශයෙන් වාසිදායක සබඳතාවක් සමස්ත ජාත්යන්තර ප්රජාවගේම යහපතට හේතු වන බවද ඔහු එහිදී පෙන්වා දී තිබේ. මේ අතර, රුසියානු ජනාධිපතිවරයා සමඟ සාකච්ඡා කිරීමට පෙර දිනයේදී ජනාධිපති ට්රම්ප් යුක්රේන ජනාධිපති වොලොඩිමියර් සෙලෙන්ස්කි සමඟද දුරකථනයෙන් සම්බන්ධ වී ඇති අතර, යුද්ධය සම්බන්ධයෙන් පැවති එම සාකච්ඡාව ඉතා සාර්ථක වූ බව සෙලෙන්ස්කි සිය එක්ස් (X) ගිණුම හරහා තහවුරු කර ඇත.
මේ අතර, මාස හයකට පමණ පසු සිය පළමු පෙරමුණු නිරීක්ෂණ චාරිකාව සනිටුහන් කරමින් රුසියානු ජනාධිපති පුටින් පසුගිය ජූලි 3 වනදා හමුදා නිල ඇඳුමෙන් සැරසී යුද පෙරමුණේ ආධාරක විධාන මධ්යස්ථානයක් වෙත ගොස් තිබේ. නැගෙනහිර යුක්රේනයේ උපායමාර්ගිකව වැදගත් බලකොටුවක් වන කොස්ටියන්තිනිව්කා නගරය රුසියානු හමුදා විසින් අත්පත් කරගත් බවට ලැබුණු වාර්තාවලින් පසුව ඔහු කියා සිටියේ, රුසියානු සිවිල් යටිතල පහසුකම්වලට එල්ල වන යුක්රේන ප්රහාරවලට ප්රතිචාර වශයෙන් කාර්කිව් සහ සුමි කලාපවල ආරක්ෂිත බෆර් කලාපය තවදුරටත් පුළුල් කරන බවයි. යුක්රේනයේ මෑතකාලීන හමුදා ජයග්රහණ "මනඃකල්පිත ජයග්රහණ" ලෙස හෑල්ලුවට ලක් කළ පුටින්, සෙලෙන්ස්කි ඇතුළු යුක්රේන නායකයන් "නළුවන්" පිරිසක් ලෙස විවේචනය කිරීමට ද කටයුතු කළේය. කෙසේ වුවද, කොස්ටියන්තිනිව්කා නගරය රුසියාවට නතු වූ බවට කෙරෙන ප්රකාශ යුක්රේනය වහාම ප්රතික්ෂේප කර ඇති අතර, ජනාධිපති සෙලෙන්ස්කි අවධාරණය කර ඇත්තේ එය පුටින්ගේ තවත් එක් අසත්ය ප්රකාශයක් පමණක් බවයි.