තායිලන්තයේ මුක්දහන් ප්රාන්තයේ සිදු වූ අතිශය කණගාටුදායක රිය අනතුරකින් බෞද්ධ භික්ෂූන් වහන්සේලා නම නමක් අපවත් වී තවත් විසි දෙනෙකුට වැඩි පිරිසක් තුවාල ලබා තිබේ. බැංකොක් නුවර සිට කිලෝමීටර් 600ක් පමණ ඊසානදෙසින් පිහිටි ප්රදේශයක මාර්ගය අයිනේ පාගමනින් වැඩම කළ භික්ෂූන් වහන්සේලා සමූහයකගේ මෙම අනතුර සිදුව ඇත්තේ 11 හැවිරිදි පිරිමි ළමයෙකු විසින් තම දෙමාපියන්ගේ පිකප් රථය අවසරයකින් තොරව පදවාගෙන විත් පාලනය කරගත නොහැකිව ගැටීමෙනි.
2026 ජූලි 2 වන බ්රහස්පතින්දා දහවල් කාලයේදී සිදු වූ මෙම අනතුර මුළු තායිලන්තයම කම්පාවට පත් කළ බිහිසුණු ජාතික ඛේදවාචකයක් බවට පත්ව ඇත.උබොන් රට්චතානි ප්රාන්තය බලා කිලෝමීටර් 260ක දුරක් පාගමනින් වැඩම කිරීමේ සැලසුම් සහගත ධුතාංග චාරිකාවක නිරත වූ භික්ෂූන් වහන්සේලා 35 නමක් සහ ගිහි අනුගාමිකයන් පස් දෙනෙකුගෙන් යුත් පිරිසක් තනි පේළියට මාර්ගය අයිනේ ගමන් කරමින් සිට ඇත. මෙම චාරිකාව ආරම්භ කර මිනිත්තු 30ක් වැනි කෙටි කාලයක් ගත වෙද්දී මෙම අනතුරට මුහුණ දීමට සිදු වී ඇති අතර අනතුර සිදු වූ ස්ථානයේදීම භික්ෂූන් වහන්සේලා පස්නමක් අපවත් වී අනෙක් සිව්නම රෝහල්ගත කිරීමෙන් පසුව අපවත් වී තිබේ. තුවාල ලැබූවන් අතරින් භික්ෂූන් වහන්සේලා තුන් හතර නමකගේ තත්ත්වය බරපතල වන අතර තවත් පිරිසක් හිසට සිදු වූ තුවාල සහ අස්ථි බිඳීම් හේතුවෙන් මුක්දහන් රෝහලේ දැඩි සත්කාර ලබන බැවින් රෝහල් බලධාරීන් විසින් හදිසි ලේ දන්දීමේ කඳවුරක් ද කැඳවා ඇත.
අනතුර සිදු වූ ස්ථානය අසල ආරක්ෂක කැමරාවල සටහන්ව ඇති දර්ශනවලට අනුව, සාමාන්ය පරිදි වාහන ධාවනය වෙමින් පැවති මාර්ගයේ භික්ෂූන් වහන්සේලා ගමන් කරද්දී ක්ෂණිකවම මෙම රථය පැමිණ අධික වේගයෙන් ගැටෙන අයුරු දැක්වෙන අතර ඉන්පසු සිවුරු සහ භාණ්ඩ මාර්ගය පුරා විසිරී ගොස් දැඩි අවුල් සහගත තත්ත්වයක් නිර්මාණය වී තිබේ. අනතුරින් දිවි ගලවා ගත් ප්රා සොම්පොන් නමැති භික්ෂූන් වහන්සේ නමක් ප්රකාශ කළේ තමන් 'බුද්ධෝ, බුද්ධෝ' යනුවෙන් භාවනා මන්ත්රය මෙනෙහි කරමින් වඩින අතරතුර පිකප් රථය වේගයෙන් තමන් දෙසට ඇදී එනු දැක තවත් භික්ෂූන් වහන්සේ නමක සමඟ පසෙකට පැන දිවි බේරාගත් බවයි. පෙරහැරේ ඉදිරියෙන්ම වැඩම කළ භික්ෂූන් වහන්සේලා නව නම දිවි බේරා ගැනීමට සමත් වුවද, පිටුපසින් සිටි අනෙක් භික්ෂූන් වහන්සේලා වාහනයේ වැදී ඉහළට විසි වී ගිය බව උන්වහන්සේ සංවේගයෙන් යුතුව විස්තර කර සිටියහ.
අනතුර සිදු කරන අවස්ථාවේදී මෙම පිකප් රථය පදවා ඇත්තේ රෝගී තත්ත්වයක් හේතුවෙන් එදින පාසල් නොගොස් නිවසේ තනිවම සිටි 11 හැවිරිදි පිරිමි ළමයෙකි. මූලික තොරතුරුවලට අනුව විශේෂ අවශ්යතා සහිත දරුවෙකු වන මොහු අනතුරින් පසු දැඩි කම්පනයට පත්ව සිටි බැවින් මුලින් ප්රකාශයක් ලබා දීමට පවා අපොහොසත් වී ඇති අතර දැනට ඔහු ළමා ආරක්ෂක නිලධාරීන්, භාරකරුවන් සහ වෛද්යවරයෙකුගේ රැකවරණය යටතේ පසුවේ. තායිලන්ත නීතියට අනුව වයස අවුරුදු 12ට අඩු දරුවන් අපරාධ වගකීම්වලින් නිදහස් වන බැවින්, පොලිසිය දැනට අවධානය යොමු කර ඇත්තේ දෙමාපියන්ගේ වගකීම සහ රැකවරණය පිළිබඳ නීතිමය පියවර ගැනීම කෙරෙහි වන අතර රථයේ වේගය හෝ යාන්ත්රික දෝෂ පරීක්ෂා කිරීම සඳහා වාහනය අධිකරණ වෛද්ය පරීක්ෂණ වෙත යොමු කර ඇත.
මුක්දහන් ප්රාන්ත පොලිස් අණදෙන නිලධාරී මේජර් ජෙනරාල් පයිරොජ් තායිපුත්සා ප්රකාශ කළේ සැකකරු දරුවෙකු බැවින් ඔහුගේ දෙමාපියන් කැඳවා රැකවරණය පිළිබඳ වගකීම විමර්ශනය කර ඉදිරි නීතිමය කටයුතු සිදු කරන බවයි. ප්රාන්ත ආණ්ඩුකාර වොරයාන් බුන්නරත් ද සඳහන් කළේ මෑත වසරවලදී මාර්ග ආරක්ෂාව පිළිබඳ දැඩි නීති ක්රියාත්මක කළද, මෙම සිදුවීම දෙමාපියන්ට සහ සමස්ත මහජනතාවටම මාර්ග අනතුරු වැළැක්වීම පිළිබඳව ලැබුණු දැඩි පාඩමක් බවයි. බෞද්ධ භික්ෂූන් වහන්සේලා කෙරෙහි ඉහළ ගෞරවයක් දක්වන තායිලන්ත සමාජය තුළ මෙම සිදුවීම මහත් සෝකයක් සහ කම්පනයක් උපදවා ඇති අතර, ඉහළ මාර්ග අනතුරු අනුපාතයක් සහිත එරට තුළ දරුවන් අධීක්ෂණය කිරීමේ සහ මාර්ග ආරක්ෂාවේ වැදගත්කම පිළිබඳව නැවත වරක් දැඩි සංවාදයක් මතු කර තිබේ.
CCTV වීඩියෝව පහළ ඇත.
