විවාහ වීමට සූදානමින් සිටින ඉන්දීය ජාතිකයින් සිය මංගල උත්සව විදේශ රටවල පැවැත්වීම සඳහා තෝරාගන්නා ජනප්රියම ගමනාන්තයන් අතර ශ්රී ලංකාව ඉතා වේගයෙන් පෙරමුණට පැමිණෙමින් තිබේ. ඉන්දීය විවාහ සැලසුම්කරණ ආයතනයක් වන WedMeGood ආයතනය මගින් නිකුත් කරන ලද "Destination Wedding Report 2026" නවතම වාර්තාව මගින් මේ බව අනාවරණය කර ඇත.
මෙම වාර්තාවට අනුව වර්තමාන ඉන්දීය තරුණ යුවළයන් සාම්ප්රදායික මහා පරිමාණ විවාහ මංගල්යයන් වෙනුවට, සමීපතම හිතවතුන් පමණක් සහභාගී කරවා ගනිමින් අලුත් අත්දැකීම් විඳිය හැකි සුවිශේෂී විවාහ උත්සව පැවැත්වීමට වැඩි කැමැත්තක් දක්වති.මේ වන විට ඉන්දියාවේ සිදුවන සමස්ත විවාහ මංගල්යයන්ගෙන් 25%ක්ම විවිධ සංචාරක කලාප කේන්ද්ර කරගනිමින් සංවිධානය වන අතර, 2028 වසර වන විට එය 30% සිට 32% දක්වා තවදුරටත් වර්ධනය වනු ඇතැයි පුරෝකථනය කර තිබේ. ඉන්දියාවෙන් බැහැරව වෙනත් විදේශීය රටවල පැවැත්වෙන මෙවැනි මංගල උත්සව සඳහා ශ්රී ලංකාව තෝරාගැනීමේ ප්රවණතාව වාර්ෂිකව 20% සිට 25% දක්වා ඉහළ ප්රතිශතයකින් වර්ධනය වනු ඇතැයි අපේක්ෂා කෙරේ.
මෙලෙස ශ්රී ලංකාව කෙරෙහි වැඩි ආකර්ෂණයක් ඇති වීමට ප්රධාන හේතු කිහිපයක් බලපා තිබේ. ඉන්දීය යුවළයන්ගෙන් 44%ක්ම කැමැත්ත දක්වන්නේ පැය 2 සිට 4 දක්වා කෙටි ගුවන් ගමන් කාලයකින් ළඟාවිය හැකි ස්ථාන සඳහාය. ශ්රී ලංකාව විසින් ඉන්දීය සංචාරකයින් උදෙසා ලබාදී ඇති වීසා රහිත ප්රවේශ පහසුකම ද මීට තවත් ප්රධාන හේතුවකි. එමෙන්ම ඉහළ පෙළේ සුඛෝපභෝගී ආගන්තුක සත්කාර, දර්ශනීය වෙරළ තීරයන්, වනජීවී, සංස්කෘතික මෙන්ම ආධ්යාත්මික සුවතාව වැනි විවිධ අත්දැකීම් රැසක් එකම රටක් තුළදී විඳගැනීමට ලැබීම ද ශ්රී ලංකාව තෝරාගැනීමට තදින්ම හේතු වී ඇත.
මීට අමතරව, මෙවැනි සංචාරක මංගල උත්සව සඳහා කෙරෙන වියදම් ප්රමාණය ද වසරකට 8%කින් පමණ ඉහළ යමින් පවතී. ඉන්දියාව ඇතුළත පැවැත්වෙන ගමනාන්ත මංගල්යයක් සඳහා සාමාන්යයෙන් ඉන්දීය රුපියල් මිලියන 5.8ක් වැය වන අතර, විදේශීය රටක සැලසුම් කරන උත්සවයක් සඳහා වැය වන සාමාන්ය පිරිවැය ඉන්දීය රුපියල් මිලියන 15 ඉක්මවන බව එම වාර්තාවේ සඳහන් වේ. 2020 වසරට පෙර සාමාන්යයෙන් දින දෙකක් වැනි කාලයකට සීමා වූ මංගල උත්සව පවත්වන කාලසීමාව, වර්තමානය වන විට සාමාන්යයෙන් දින 4ක් දක්වා දීර්ඝ වී තිබීම ද විශේෂත්වයකි. මෙහිදී පැමිණෙන අමුත්තන්ට ලැබෙන සමස්ත අත්දැකීම කෙරෙහි දැඩි අවධානයක් යොමු කෙරෙන අතර, රසවත් ආහාර පාන සඳහා ඉහළම ප්රමුඛතාවක් ලබා දෙයි.
මෙම නව ප්රවණතාව සම්බන්ධයෙන් අදහස් දක්වන WedMeGood හි සම-නිර්මාතෘ මෙහක් ෂහානි මහත්මිය ප්රකාශ කරන්නේ, වර්තමාන ඉන්දීය විවාහ මංගල්යයන් විශාල පරිවර්තනයකට ලක්වෙමින් පවතින බවයි. තම පවුලේ අයට සහ හිතමිතුරන්ට අමතක නොවන අර්ථවත් අත්දැකීමක් තෑගි කිරීමට නවක යුවළයන් දක්වන දැඩි උනන්දුව, ඔවුන්ගේ මංගල අයවැය කෙරෙහි ද සෘජුවම බලපා ඇති බව ඇය වැඩිදුරටත් පෙන්වා දෙයි.