මීගමුව බන්ධනාගාරය තුළ මෑතකදී සිරකරුවන් සහ නිලධාරීන් අතර හටගත් දරුණු මට්ටමේ ගැටුමට මුල් වූ බවට සැක කෙරෙන ‘කටුවැල්ලේගම සුරේෂ්’ නමැති ප්රකට අපරාධකරු වහාම ක්රියාත්මක වන පරිදි ගාල්ල බූස්ස අධි ආරක්ෂිත බන්ධනාගාරය වෙත මාරු කර යැවීමට බලධාරීන් පියවර ගෙන තිබේ. සංවිධානාත්මක අපරාධ කල්ලි සාමාජිකයකු වන ‘කෙහෙල්බද්දර පද්මේ’ගේ සමීපතම සගයකු ලෙස හඳුනාගෙන ඇති මොහු, තියුණු ආයුධවලින් පහරදීම, සන්නද්ධ මංකොල්ලකෑම් මෙන්ම මත්ද්රව්ය ජාවාරම් වැනි බරපතළ ගණයේ වැරදි රැසක් සම්බන්ධයෙන් චෝදනා ලබා සිටින පුද්ගලයෙකි.
මීට අමතරව, 2016 වසරේදී නාරම්මල ප්රදේශයේ විහාරස්ථානයක චෛත්යයකට හානි පැමිණවීම, එහි වැඩසිටි භික්ෂූන් වහන්සේ නමකට සහ සහායකයකුට සාහසික ලෙස පහර දී බැඳ තැබීම සම්බන්ධයෙන් ද මොහුට එරෙහිව බරපතළ චෝදනා එල්ල වී තිබේ.මෙම සැකකරුට එරෙහිව මීගමුව මහාධිකරණයේ සහ මහෙස්ත්රාත් අධිකරණයේ නඩු විභාග වෙමින් පවතින බැවින්, ඔහු මෙතෙක් රඳවා තබා සිටියේ මීගමුව බන්ධනාගාරය තුළය. කෙටිකාලීන සිරකරුවන් සහ සැකකරුවන් 2,400කට අධික සංඛ්යාවක් රඳවා සිටින මෙම බන්ධනාගාරය තුළ විවිධ පාතාල කල්ලිවලට සම්බන්ධ සාමාජිකයන් 26 දෙනෙකු පමණ රඳවා සිට ඇති අතර, මෙම තත්ත්වය මත ඉකුත් 05 සහ 06 යන දෙදින තුළ එහි දැඩි නොසන්සුන්කාරී වාතාවරණයක් නිර්මාණය විය.
එහිදී ඇති වූ බිහිසුණු ගැටුම්කාරී තත්ත්වය හේතුවෙන් බන්ධනාගාර නිලධාරීන් හත් දෙනෙකු ඇතුළුව පුද්ගලයන් 26 දෙනෙකුට සිය ජීවිත අහිමි වී තිබේ. මෙම ගැටුම් හේතුවෙන් තවත් සියයකට අධික පිරිසක් තුවාල ලබා රෝහල්ගත කර ඇති අතර, ඉන් දැඩි බරපතළ තත්ත්වයේ පසු වූ පුද්ගලයන් විසි දෙනෙකු හදිසි ප්රතිකාර සඳහා කොළඹ ජාතික රෝහල වෙත මාරු කර යැවීමට ද කටයුතු කර ඇත.
කෙසේ වෙතත්, අද (07) උදෑසන වන විට ශ්රී ලංකා යුද හමුදාව ඇතුළු ආරක්ෂක අංශ බන්ධනාගාර පරිශ්රය තුළට ඇතුළු වී තිබේ. එහි අභ්යන්තර මෙන්ම බාහිර ආරක්ෂාව ද දැඩි කරමින්, බන්ධනාගාරය තුළ හටගෙන තිබූ කලහකාරී තත්ත්වය සම්පූර්ණයෙන්ම පාලනය කිරීමට ආරක්ෂක අංශ මේ වන විට සමත්ව සිටී.