ප්රබල ගණයේ සංවිධානාත්මක අපරාධකරුවකු වන හරක් කටා හෙවත් නඳුන් චින්තක නමැති සැකකරුගේ බිරිඳගෙන් රුපියල් කෝටි දොළහක දැවැන්ත අල්ලස් මුදලක් ලබාගත්තේ යැයි කියන සිද්ධිය සම්බන්ධයෙන් අත්අඩංගුවට ගෙන සිටින නීතිඥ රඛිත රාජපක්ෂ, චරිත් අබේසිංහ සහ අරුණ ශ්රී චතුරංග යන සැකකරුවන් තිදෙනාගේ ඇප ඉල්ලීම් කොළඹ මහේස්ත්රාත් අධිකරණය විසින් ප්රතික්ෂේප කරනු ලැබ ඇත. කොළඹ ප්රධාන මහේස්ත්රාත් අසංග එස්.
බෝදරගම මහතා නියෝග කළේ මෙම සැකකරුවන් තිදෙනා එළඹෙන 17 වන දා දක්වා තවදුරටත් රක්ෂිත බන්ධනාගාරගත කර තැබිය යුතු බවයි. අල්ලස් හෝ දූෂණ චෝදනා විමර්ශන කොමිෂන් සභාව වෙනුවෙන් පෙනී සිටි එහි නියෝජ්ය අධ්යක්ෂ ජනරාල්වරිය සහ සැකකරුවන් වෙනුවෙන් පෙනී සිටි නීතිඥවරුන් ඉදිරිපත් කළ දීර්ඝ කරුණු සලකා බැලීමෙන් අනතුරුව ප්රධාන මහේස්ත්රාත්වරයා විසින් මෙම නියෝගය නිකුත් කරන ලදී.මෙම නඩු විභාගයේදී වඩාත්ම කැපී පෙනෙන කරුණක් වූයේ හිටපු අධිකරණ අමාත්ය විජේදාස රාජපක්ෂ මහතා ඩුබායි රාජ්යයේ සිදුකළ සංචාරය සහ මෙම සිද්ධියට ඔහුගේ ඇති සබඳතාව පිළිබඳව අල්ලස් කොමිසම විසින් අධිකරණය හමුවේ විශේෂ අනාවරණයක් සිදු කිරීමයි. අල්ලස් කොමිසම වෙනුවෙන් පෙනී සිටි සහකාර නීති අධ්යක්ෂක අනූෂා සම්බන්ධප්පෙරුම මහත්මිය අධිකරණයට දන්වා සිටියේ සැකකරුවන් තිදෙනා හරක් කටාගේ බිරිඳ වන මහේෂිකා මධුවන්ති නමැත්තියගෙන් අල්ලස් මුදල් ලබාගැනීමේ අරමුණින් 2023 වසරේ මාර්තු මස 25 වන දා මෙරටින් පිටත්ව ඩුබායි රාජ්යය බලා ගොස් ඇති බවයි. ඔවුන් එහි රැඳී සිට නැවත ශ්රී ලංකාවට පැමිණ තිබෙන්නේ 2023 මාර්තු මස 29 වන දාය. මෙම සුවිශේෂී කාල වකවානුව තුළදී දෙවන සැකකාර රඛිත රාජපක්ෂගේ පියා වන විජේදාස රාජපක්ෂ මහතා ද ඩුබායි රාජ්යයේ රැඳී සිට ඇති බව ආගමන විගමන තොරතුරු ඇසුරින් තහවුරු වී තිබේ. විජේදාස රාජපක්ෂ මහතා 2023 වසරේ මාර්තු මස 21 වන දා මෙරටින් පිටත්ව ගොස් මාර්තු මස 28 වන දා දක්වා ඩුබායි හි රැඳී සිට ඇති බව විමර්ශනවලදී හෙළි වී ඇත.
මේ හේතුව නිසාම හිටපු අධිකරණ අමාත්ය විජේදාස රාජපක්ෂ මහතා එම වකවානුවේදී කුමන විශේෂ අවශ්යතාවක් සඳහා ඩුබායි රාජ්යයට ගියේද යන්න පිළිබඳව සහ එහිදී ඔහුට හමු වූ පුද්ගලයන් කවුද යන්න පිළිබඳව අල්ලස් කොමිසම මගින් පුළුල් විමර්ශනයක් ආරම්භ කර තිබේ. එමෙන්ම මෙම මහා පරිමාණ අල්ලස් අපරාධය සඳහා විජේදාස රාජපක්ෂ මහතා කිසියම් ආකාරයකින් සම්බන්ධ වී තිබේද නැතහොත් ඔහු විසින් මේ සම්බන්ධයෙන් කිසියම් ක්රියාමාර්ගයක් හෝ මැදිහත්වීමක් සිදු කර තිබේද යන්න සෙවීම සඳහා විශේෂ පරීක්ෂණ ක්රියාත්මක වන බව අල්ලස් කොමිසම අධිකරණය හමුවේ අවධාරණය කළේය. සැකකරුවන් ඩුබායි හි රැඳී සිටි කාලය සහ විජේදාස රාජපක්ෂ මහතා එහි ගත කළ කාලය එකිනෙකට සමපාත වීම හේතුවෙන් මේ පිටුපස ඇති සැබෑ තත්ත්වය සහ ඔවුන් අතර සිදුවූ ගනුදෙනු අනාවරණය කරගැනීම විමර්ශන නිලධාරීන්ගේ ප්රධාන ඉලක්කයක් වී ඇත.
විජේදාස රාජපක්ෂ මහතාගේ නම මෙම නඩුවට ඈඳෙන තවත් ප්රධානතම කරුණක් වන්නේ අල්ලස් මුදල් හුවමාරු වූ ස්ථානයයි. අල්ලස් කොමිසම අධිකරණයට පෙන්වා දුන්නේ මෙම සැකකරුවන් විසින් රුපියල් කෝටි දෙකක මුදලක් හරක් කටා නමැති සැකකරුගේ බිරිඳට නැවත ලබා දී ඇති බවයි. එම මුදල් ලබා දී තිබෙන්නේ හර්බි හෙවත් නිර්මාණ බණ්ඩාර නමැත්තාගේ මිත්රයෙකු වන ලසන්ත මංජුල ද සිල්වා නොහොත් මිදිගම ලසා නමැති පුද්ගලයා මාර්ගයෙනි. මෙම මුදල් ගනුදෙනුව සිදුව ඇත්තේ නුගේගොඩ, නාවල පාරේ, විජයබා මාවතේ පිහිටි ස්ථානයකදී වන අතර, වැඩිදුර විමර්ශනවලදී අනාවරණය වී ඇත්තේ අදාළ ගනුදෙනුව සිදු වූ නිවස සහ භූමිය විජේදාස රාජපක්ෂ මහතාට අයිති එකක් බවයි. දෙවන සැකකාර රඛිත රාජපක්ෂගේ පියාගේ නිවස වන මෙම ස්ථානයේදී මෙවැනි මුදල් හුවමාරුවක් සිදුවීම පිළිබඳව ද අල්ලස් කොමිසමේ දැඩි අවධානය යොමුව තිබේ.
මෙම සැකකරුවන් අල්ලස් වශයෙන් ලබාගත් සමස්ත මුදල් මෙරටට රැගෙන ආ ආකාරය පිළිබඳව ද අල්ලස් කොමිසම අධිකරණයට කරුණු ඉදිරිපත් කළේය. මූලික විමර්ශනවලදී අනාවරණය වී ඇති පරිදි මෙම අතිවිශාල මුදල් සම්භාරය මෙරටට ගෙනවිත් තිබෙන්නේ නීතිවිරෝධී 'උණ්ඩියල්' ක්රමය ඔස්සේය. සැකකරුවන් සන්තකයේ තිබී විමර්ශන නිලධාරීන් භාරයට ගත් ජංගම දුරකථන පරීක්ෂාවට ලක් කරමින් පවතින අතර, ඔවුන් ඒ හරහා සිදුකර ඇති වට්ස්ඇප් පණිවිඩ සහ ඇමතුම් මෙන්ම අනෙකුත් දුරකථන සන්නිවේදනයන් පිළිබඳව ද තාක්ෂණික විමර්ශන ක්රියාත්මක වේ. මීට අමතරව, මෙම සැකකරුවන්ගේ වත්කම් සහ ක්රියාකාරකම් පිළිබඳව අපරාධයකින් උපයාගත් වත්කම් විශුද්ධිකරණය වැළැක්වීමේ පනත යටතේ ද වෙනමම විමර්ශන සිදු කිරීමට අල්ලස් කොමිසම සූදානම් වේ. එමෙන්ම හරක් කටා නමැති සැකකරු මැඩගස්කරයේ සිට මෙරටට රැගෙන ආ පසු අපරාධ පරීක්ෂණ දෙපාර්තමේන්තුව භාරයේ රඳවා සිටියදී එහි ඇතැම් නිලධාරීන් ක්රියා කළ ආකාරය පිළිබඳව ද මෙහිදී පරීක්ෂණ සිදුවන බව හෙළි විය.
මෙම සිද්ධිය සම්බන්ධයෙන් වෙබ් පිටුවක පළ වූ වාර්තාවන් සහ ඒ ආශ්රිත සිදුවීම් මාලාවක් ද අල්ලස් කොමිසම විසින් අධිකරණයට ඉදිරිපත් කරන ලදී. එම වාර්තා පළ කළ අනූප එරංජිත් රාජපක්ෂ නමැති පුද්ගලයාගේ නිවස ත්රස්ත විමර්ශන කොට්ඨාසය විසින් පරීක්ෂා කර ඔහුව අත්අඩංගුවට ගෙන තිබූ අතර, පසුව අසභ්ය දර්ශන සහිත දෘඪ තැටියක් ළඟ තබා ගැනීම සහ රාජ්ය නිලධාරීන් බිය ගැන්වීම සම්බන්ධයෙන් නඩු පවරා පසුව නිදහස් කර තිබේ. මේ වන විට එම පුද්ගලයා තමන්ට සිදු වූ අසාධාරණය වෙනුවෙන් මූලික අයිතිවාසිකම් පෙත්සමක් සහ වන්දි ඉල්ලා අධිකරණය හමුවේ නඩු පවරා ඇති බව ද අනාවරණය විය.
විත්තිය වෙනුවෙන් පෙනී සිටි ජනාධිපති නීතිඥ අනිල් සිල්වා මහතා දෙවන සැකකාර රඛිත රාජපක්ෂ වෙනුවෙන් කරුණු දක්වමින් සිය සේවාදායකයාගේ පියා වන විජේදාස රාජපක්ෂ මහතාගේ වත්මන් දේශපාලන තත්ත්වය පිළිබඳව විශේෂ ප්රකාශයක් කළේය. ඔහු කියා සිටියේ සැකකරුගේ පියා ප්රසිද්ධ දේශපාලනඥයෙකු වුවද, මේ වන විට ඔහුට කිසිදු දේශපාලන බලයක් නොමැති බවයි. එබැවින් සැකකරුට සිය පියා ලවා කිසිදු පුද්ගලයෙකුට හෝ සාක්ෂිකරුවෙකුට බලපෑම් කිරීමට කිසිදු හැකියාවක් නොමැති බව ජනාධිපති නීතිඥවරයා තර්ක කළේය. සැකකරු ඇප මත මුදා හැරියද ඔහු රටින් පලා නොයන බවත්, සාක්ෂිවලට බලපෑම් නොකරන බවත්, දැනට ඉතිරිව ඇති තාක්ෂණික සාක්ෂි විමර්ශනවලට ඔහුගෙන් බාධාවක් නොවන බවත් පවසමින් ඕනෑම දැඩි කොන්දේසියක් මත ඇප ලබා දෙන ලෙස ඔහු ඉල්ලා සිටියේය.
මීට අමතරව, අල්ලස් කොමිසමේ අධ්යක්ෂ ජනරාල්වරයා විසින් දූෂණ විරෝධී පනතේ 149 වගන්තිය යටතේ ඉදිරිපත් කර ඇති සහතිකය නීත්යානුකූල නොවන බව ද විත්තියේ නීතිඥවරු තර්ක කළහ. විජේදාස රාජපක්ෂ මහතාගේ පුත්රයා වෙනුවෙන් පෙනී සිටි නීතිඥවරුන් මෙන්ම පළමු සැකකරු වූ චරිත් අබේසිංහ වෙනුවෙන් පෙනී සිටි නීතිඥ අශෝක වීරසූරිය මහතා ද ප්රකාශ කළේ, මෙම වරද සිදුවී ඇතැයි කියන්නේ නව දූෂණ විරෝධී පනත ක්රියාත්මක වීමට වසර තුනකට පමණ පෙර බැවින්, එවැනි සහතිකයක් නිකුත් කිරීමට කොමිසමට බලයක් නොමැති බවයි. එමෙන්ම හරක් කටා සහ මිදිගම රුවන් වැනි ප්රබල අපරාධකරුවන්ගේ ප්රකාශ මත පමණක් සැකකරුවන් රිමාන්ඩ් කර ඇති බවත්, සැකකරුට තුන් නිවුන් දරුවන් සිටින අතර ඔහුගේ වාහන ලීසිං ක්රමයට ගෙවමින් පවතින බැවින් ජීවනෝපායට බාධා වී ඇති බවත් විත්තිය පැවසීය. තුන්වන සැකකරු වෙනුවෙන් පෙනී සිටි නීතිඥ ගීත් කරුණාරත්න මහතා ද කියා සිටියේ බන්ධනාගාරය තුළ සැකකරුවන්ගේ ජීවිතවලට පවා තර්ජනයක් පවතින බැවින් ඇප ලබා දිය යුතු බවයි.
ඉදිරිපත් වූ සියලු පාර්ශවයන්ගේ කරුණු දීර්ඝ ලෙස සලකා බැලූ කොළඹ ප්රධාන මහේස්ත්රාත් අසංග එස්. බෝදරගම මහතා විත්තිය විසින් ඉදිරිපත් කළ නෛතික තර්කයන් ප්රතික්ෂේප කළේය. අල්ලස් කොමිසමේ සහතිකයේ වලංගුභාවය පිළිබඳව අධිකරණය දැනටමත් තීන්දු දී ඇති බවත්, සැකකරුවන්ට ඇප ලබාදීම ප්රතික්ෂේප කරන්නේ සහතිකය නිසා අධිකරණයට බලය නැති නිසා නොව, ඔවුන් නිදහස් කිරීමට තරම් කිසිදු සුවිශේෂී කරුණක් අධිකරණය හමුවේ තහවුරු කිරීමට විත්තිය අපොහොසත් වීම නිසා බවත් මහේස්ත්රාත්වරයා අවධාරණය කළේය. නඩු විභාගය අවසන් වන තෙක් සැකකරුවන් රිමාන්ඩ් කරන ලෙස කොමිසම ඉල්ලා සිටියද අධිකරණය එලෙස කටයුතු නොකරන බවත්, ඉදිරියේදී සුවිශේෂී කරුණු මතු වුවහොත් ලිඛිතව ඇප ඉල්ලීම් ඉදිරිපත් කළ හැකි බවත් දැනුම් දුන් මහේස්ත්රාත්වරයා, සැකකරුවන් තිදෙනා ලබන 17 වන දා දක්වා තවදුරටත් රක්ෂිත බන්ධනාගාරගත කිරීමට නියෝග කළේය.