ශ්රී ලංකාව අන්තර්ජාලය ඔස්සේ සිදුවන වංචාවන් සඳහා කේන්ද්රස්ථානයක් බවට පත්ව ඇති බවට ජාත්යන්තර මාධ්ය වාර්තා කර තිබුණද, මේ වන තුරුත් කැසිනෝ නියාමන අධිකාරිය ක්රියාත්මක කිරීම සඳහා අවශ්ය නියාමන කටයුතු සම්පාදනය කිරීමට රජය අපොහොසත් වී තිබේ. රට තුළ සිදුවන නීතිවිරෝධී සහ නියාමනය නොකළ මාර්ගගත මෙන්ම භෞතික ක්රීඩා කටයුතු හේතුවෙන් රජයට ලැබිය යුතු බදු ආදායම් විශාල වශයෙන් අහිමි වී යන බව රාජ්ය මූල්ය කාරක සභාවේදී අනාවරණය විය.
මෙම කාරක සභාවේ සභාපති පාර්ලිමේන්තු මන්ත්රී ආචාර්ය හර්ෂ ද සිල්වා මහතා විසින් කැසිනෝ නියාමන අධිකාරියේ නිලධාරීන්ගෙන් විමසා සිටියේ අධිකාරිය මෙහෙයුම් මට්ටමට ගෙන ඒම සඳහා නියාමනයන් ක්රියාත්මක නොකිරීමේ හේතු පිළිබඳවයි. නියාමන කටයුතු අදියර කිහිපයක් යටතේ සිදු විය යුතුව තිබූ අතර, පළමු අදියරේ නියාමනයන් 2026 ජූනි මස 30 වැනිදාට පෙර ක්රියාත්මක කර අවසන් විය යුතුව තිබූ බවද මන්ත්රීවරයා එහිදී පෙන්වා දුන්නේය.
කෙසේ වෙතත්, මේ වන තෙක් කිසිදු නියාමනයක් බලාත්මක කර නොමැති බව තහවුරු විය. කැසිනෝ ඇතුළු ක්රීඩා ව්යාපාර මෙහෙයවීම සඳහා අදාළ නියාමන කෙටුම්පත් අවසන් කර ඇති බව එම නිලධාරීන් ප්රකාශ කර සිටියහ. සිංගප්පූරුව ඇතුළු රටවල් තුනක පවතින පද්ධති ආදර්ශයට ගනිමින් සකස් කරන ලද මෙම නියාමනයන් මේ වන විට විශේෂඥ මණ්ඩලයකට යොමු කර ඇති බව ඔවුන් සඳහන් කරයි.
එම නියාමනයන් හරහා බලපත්ර ලබාදීම, ඔන්ලයින් ක්රීඩා පාලනය සහ මුදල් විශුද්ධිකරණය වැළැක්වීමේ ක්රියාමාර්ග හඳුන්වා දීමට නියමිතය. මෙම ක්ෂේත්රය ශක්තිමත් කිරීම සඳහා අවශ්ය උපදෙස් ලබා ගැනීමට එක්සත් රාජධානියේ විශේෂඥයෙකු ලබන මාසයේදී මෙරටට පැමිණීමට නියමිත අතර, මුදල් විශුද්ධිකරණය වැළැක්වීමේ රාමුව ශක්තිමත් කිරීම සඳහා යුරෝපා සංගමයේ ගෝලීය පහසුකම් මධ්යස්ථානයේ සහායද ලබා ගැනීමට නියමිතය.